1. Nso iditịbe edieke nnyịn ‘isan̄ade ikpere Abasi’?

JEHOVAH ama mbon oro ẹnamde n̄kpọ esie. Edieke afo atuakde ibuot ọnọ Jehovah, enye ọyọdiọn̄ fi idahaemi ye ke ini iso. Bible ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.”—James 4:8.

2. Didie ke nnyịn ikeme ndisan̄a n̄kpere Abasi, ndien didie ke emi ekeme nditụk akam nnyịn?

² Man asan̄a ekpere Abasi, ana afo ekpep onyụn̄ ada Ikọ esie esịn ke edinam. Ke ini afo ọbọn̄de akam ke n̄kemuyo ye uduak esie, Jehovah ayakpan̄ utọn̄ okop akam fo onyụn̄ ọbọrọ mmọ. Christian apostle John ekewet ete: “Nnyịn imonyụn̄ ibụre ifiọk iban̄a [Abasi], ite, edieke nnyịn iben̄ede n̄kpọ ekededi nte ekemde uduak Esie, Enye ọbiọn̄ utọn̄ ke eben̄e nnyịn; ndien edieke nnyịn ifiọkde ite, Enye ọbiọn̄ utọn̄ ke eben̄e nnyịn, nnyịn imonyụn̄ ifiọk ite, imọbọ se ikeben̄ede Enye.”—1 John 5:14, 15.

3-7. Didie ke nnyịn ikeme ndinyene eti ibuot otode Abasi, ndien didie ke enye ekeme ndin̄wam nnyịn?

³ N̄ko-n̄ko, nte afo asan̄ade ekpere Abasi, enye ọyọnọ fi eti ibuot ndise mban̄a mme mfịna uwem eke usen ke usen. Bible ọdọhọ ete: “Edieke owo mbufo ekededi ananade eti ibuot, yak enye eben̄e Abasi.”—James 1:5.

⁴ Didie ke eti ibuot otode Abasi ekeme ndin̄wam fi? N̄kpọ kiet edi-o, enye ekeme ndin̄wam fi ndifiọk mme n̄kpọ oro mînemke Jehovah esịt. Afo emekeme n̄ko ndifiọk ntak emi mme n̄kpọ emi ẹkwan̄ade ye se afo ekemede ndinam man efep ndinam mmọ. Utọ ifiọk oro ekeme ndikpeme fi nsio ke ediwak mfịna oro ẹnọmọde mme owo ke ofụri ofụri. Ke uwụtn̄kpọ, ndisụk ibuot nnọ item Abasi oro ọdọhọde isana ke ido uwem ekpeme ikọt Abasi ọbiọn̄ọ uyomo idịbi oro owo mîyomke, mme udọn̄ọ ẹmende ẹto idan̄, ye ndọ unana inemesịt m̀mê ndọ oro owụrede.

⁵ Nso efen ke eti ibuot otode Abasi ekeme ndinam nnọ fi? Enye ekeme ndinam uwem fo enen̄ede enyene ufọn. Enye ekeme ndin̄wam fi ndinam nti ubiere ke mme ata ata idem n̄kpọ, utọ nte edifam okụk fo. Afo eyekeme ndibịne nti utịtmbuba ndinyụn̄ nsịn mme utịtmbuba oro mînyeneke ufọn oro ebịghide.

⁶ Eti ibuot otode Abasi ekeme n̄ko ndin̄wam fi ke itie ebuana fo ye mbon efen. Afo emekeme ndinyene inem inem uwem ubon. Afo emekeme ndinyene ata itie ufan oro ebịghide ye mbon en̄wen, ndien afo emekeme ndibọ ukpono, idem otode mbon oro mînamke n̄kpọ Abasi.

⁷ Akande oro, afo ndinyene eti ibuot otode Abasi oyokpụhọde ekikere fo kaban̄a uwem. Enye ayan̄wam fi ndiyọ mme mfịna ye edikpu ke uwem. N̄ko, afo eyenyene in̄wan̄-in̄wan̄ ekikere oro adade ukem ukem kaban̄a ini iso. Nte utịp, in̄wan̄-in̄wan̄ ekikere eyetịp esịn ke nsọn̄idem fo ke n̄kan̄ eke ekikere ye ke n̄kan̄ eke obụk.—Mme N̄ke 14:30; Isaiah 48:17.

8. Edieke afo anamde n̄kpọ Abasi, nso ke afo mûdufeheke?

⁸ Edieke afo anamde n̄kpọ ata Abasi, afo  ọyọbọhọ ndịk oro ẹsifịnade mbon oro mînamke n̄kpọ esie. Sia ọfiọkde ete ke mme akpan̄kpa idụhe uwem edi ẹdu ke udi, afo udufeheke mbon oro ẹma ẹkekpan̄a. Ke ntak oro afo enyenede mbuọtidem ke un̄wọn̄ọ Abasi ndinam mme akpan̄kpa ẹset, afo udufeheke ndịk n̄kpa. Ndien sia afo ọfiọkde ete ke Abasi enyene ofụri odudu, afo udufeheke ndịk ifọt ye odudu idiọn̄.—John 8:32.

9-11. Mmanie ẹdidụn̄ ke Paradise, ndien mmanie mîdidụn̄ke?

⁹ Edieke afo asan̄ade ekpere Abasi, afo udukopke ndịk uban̄a ini iso. Nte nnyịn ima ikokụt, Bible ama ebem iso etịn̄ aban̄a ediwak mfịna oro nnyịn ikụtde ke isọn̄ mfịn. Jehovah asian nnyịn ete ke mme n̄kpọ emi ẹdi ke ibio ini; ke mîbịghike Obio Ubọn̄ Abasi ayanam isọn̄ emi edi paradise.—Luke 21:10, 11, 31; 23:43.

¹⁰ Edi sụk mbon oro ẹsan̄ade ẹkpere Jehovah ẹnyụn̄ ẹnamde n̄kpọ esie ẹdidụn̄ ke Paradise. Bible ọdọhọ ete: “Osụk esisịt idiọk owo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”—Psalm 37:10, 11.

¹¹ Mbon oro ke nsọn̄ibuot ẹsịnde ndisụk ibuot nnọ ndinen ibet Abasi ẹyetaba uwem mmọ ke nsinsi. (2 Thessalonica 1:8, 9) Mmọ ididụhe aba. Mmọ ẹyediana ye Satan ye mme demon esie ke nsinsi n̄kpa. (Ediyarade 20:10, 14) Edi mbon oro ẹkpepde ẹban̄a Jehovah ẹnyụn̄ ẹnamde n̄kpọ esie ẹyenyene akwa idatesịt ke Paradise isọn̄.

12. Nso ke Bible etịn̄ aban̄a ini iso?

¹² Jehovah enyene mme utịbe utịbe n̄kpọ oro enye enịmde ebet mbon oro ẹmade enye! Kam se se Ikọ esie etịn̄de aban̄a uwem ke Paradise isọn̄:

• Ediwak udia ndidia: “Uwak ibokpot [m̀mê udia] ẹyedu ke isọn̄ ke nsom ikpọ obot.”—Psalm 72:16.

• Nti ufọk: “Ndien mmọ ẹyebọp ufọk ẹnyụn̄ ẹdụn̄ ke esịt.”—Isaiah 65:21.

• Inem inem utom: “Edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu.”—Isaiah 65:22, 23.

• Udọn̄ọ ididụhe: “Andidụn̄ ididọhọke ite, Ndọdọn̄ọ.”—Isaiah 33:24.

• Mme obiomo ndo ididụhe: “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ eyenek nte edop [ayara okoyo], edeme imụm oyonyụn̄ ọkwọ.”—Isaiah 35:5, 6.

• Ubiak, eseme, n̄kpa ididụhe: “Enye [Abasi] ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:4.

• Ekọn̄ ididụhe: “Enye [Abasi] anam ekọn̄ etre tutu esịm ke utịt ekondo.”—Psalm 46:9.

• Nsinsi uwem: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

13. Anie ikpọn̄ ekeme ndinam isọn̄ emi edi paradise, ndien ntak-a?

¹³ Mme owo ikemeke ndida mme utọ n̄kpọ emi ndi, edi Jehovah enyene odudu ndinam se ededi oro enye ọdọhọde ke imọ iyanam. N̄kpọ ndomokiet ikemeke ndikpan enye ndinam se enye oyomde ndinam. Bible ọdọhọ ete: “Koro ikọ baba kiet eke otode Abasi idinanake odudu.”—Luke 1:37.

14. Didie ke afo ekeme ndisan̄a ke usụn̄ oro adade esịm nsinsi uwem?

¹⁴ Jehovah ke ada Mme Ntiense esie ọnọ mme owo ke kpukpru ebiet ifet ‘ndibe ke mfafaha inua-otop ndụk’ ndinyụn̄ nsan̄a ke usụn̄ oro adade esịm nsinsi uwem. Afo akpakam odu ke otu mbon inemesịt oro ẹyerede ikot emi. Akpakam afo anam ido ukpono akpanikọ onyụn̄ enyene edidiọn̄ Jehovah ke nsinsi!—Matthew 7:13, 14.