ATA ỌKPỌSỌN̄ ABASI edi Andikara ekondo. Uwem nnyịn eke idahaemi ye eke ini iso ẹkọn̄ọ ke enye. Enye enyene odudu ndinọ utịp onyụn̄ enyene odudu ndimia ufen. Enye enyene odudu ndinọ uwem ye odudu ndibọ uwem. Edieke nnyịn inyenede unyịme esie, nnyịn iyokụt unen; edieke nnyịn mînyeneke unyịme esie, nnyịn idikwe unen. Edi akpan n̄kpọ didie ntem nte utuakibuot nnyịn edi se enye enyịmede!

Mme owo ẹtuak ibuot ke ediwak usụn̄. Edieke ido ukpono etiede nte ọkpọusụn̄, nte kpukpru usụn̄ ido ukpono ẹnyene unyịme Abasi? Baba, mmọ inyeneke. Jesus, kpa prọfet Abasi, ama owụt ete ke usụn̄ iba kpọt ẹdu. Enye ọkọdọhọ ete: “Inua-otop emi adade owo aka nsobo atara, ọkpọusụn̄ onyụn̄ an̄wan̄a; mme andidụk ke esịt ẹnyụn̄ ẹwak. Koro inua-otop emi adade owo esịm uwem afafaha, usụn̄ onyụn̄ esịre; ndien mme andikụt enye iwakke.”—Matthew 7:13, 14.

Orụk ido ukpono iba kpọt ẹdu: kiet adade esịm uwem ndien eken adade esịm nsobo. Uduak ediye uduot ekpri n̄wed emi edi man an̄wam fi okụt usụn̄ oro adade esịm nsinsi uwem.