1. Nso ke ana nnyịn inam man inem Abasi esịt?

MAN inyene ufiop ufiop itie ebuana ye Abasi, inaha nnyịn ibuana n̄kpọ ndomokiet ye nsunsu ido ukpono. Ana nnyịn inam ido ukpono akpanikọ. Mfịn ediwak miliọn owo ke ofụri isọn̄ ke ẹnam oro.

2. M̀mọ̀n̄ ke ẹkeme ndikụt Mme Ntiense Jehovah, ndien nso idi utom mmọ?

² Nte Bible ekebemde iso etịn̄, mme ata andituak ibuot ẹnam “akwa otuowo” emi “ẹtode ke kpukpru obio ye esien ye idụt ye usem.” (Ediyarade 7:9) Ke idụt 235, ediwak miliọn Mme Ntiense Jehovah ke ẹsịn ifịk ndin̄wam mbon en̄wen ẹkpep ẹban̄a mme ima ima usụn̄ Jehovah ye se enye oyomde.

3. Anie ke Mme Ntiense ẹtuak ibuot ẹnọ, ndien mme orụk utuakibuot ewe ke mmọ ẹfep?

³ Mme Ntiense ẹfiọk nte ke edi Jehovah ikpọn̄ ke odot ẹtuak ibuot ẹnọ. Mmọ ẹsịn ndituak ibuot nnọ ndisọi mbiet ido ukpono. (1 John 5:21) Mmọ isikponoke mme akpan̄kpa ebe ke nditiene mbuana ke ukpeme okpo, m̀mê mme edinam eken oro ẹsịnde udọn̄ ẹnọ mme edinịm ke akpanikọ nsunsu ido ukpono ye “ukpep-n̄kpọ mme demon.” (1 Timothy 4:1) Nte ededi, mmọ ẹsidọn̄ mbon emi owo mmọ akpade esịt ebe ke ndinam un̄wọn̄ọ Abasi oro nte ke ẹyenam mme akpan̄kpa ẹset ẹdụk paradise isọn̄, an̄wan̄a.—John 5:28, 29; Utom 24:15.

4. Nso idi idaha ikọt Abasi kaban̄a mfọni?

⁴ Mme Ntiense inyeneke n̄kpọ ndomokiet ndinam ye mfọni, ubre-idiọn̄, m̀mê ifọt sia ẹfiọkde ẹte ke mme n̄kpọ emi ẹto Devil. Mmọ ibuọtke idem ke mfọni man ẹkpeme mmọ—mmọ ẹbuọt idem mmọ ke Jehovah.—Mme N̄ke 18:10.

5. Ke nso usụn̄ ke Mme Ntiense Jehovah mîdịghe “eke ererimbot”?

⁵ Jesus ọkọdọhọ ete ke mme mbet imọ ikpedịghe “eke ererimbot.” (John 17:16) Jesus ke idemesie ikenyịmeke ndisịn idem ke mbre ukara eyo esie. (John 6:15) Kpasụk ntre, Mme Ntiense isịnke idem ke mbre ukara, ufreidụt, ye en̄wan edinyene akwa idaha ke ererimbot emi. Nte ededi, mmọ ẹsikpe tax mmọ ẹnyụn̄ ẹnịm mme ibet idụt oro mmọ ẹdụn̄de.—John 15:19; Rome 13:1, 7.

6. Mme ndausụn̄ ewe ke mme asan̄autom Abasi ẹtiene kaban̄a ndọ ye usiondọ?

⁶ Sia mmọ ẹtienede ndausụn̄ ukara, Mme Ntiense ẹkụt ẹte mmimọ imesịn ndọ mmimọ ke n̄wed nte ekemde ye ibet. (Titus 3:1) Mmọ ẹtiene ndausụn̄ Abasi, ndien ke ntre idọhọ uwak iban. (1 Timothy 3:2) Ke adianade do, sia mmọ ẹdade mme edumbet Bible ẹsịn ke edinam ke uwem mmọ, mme asan̄autom Abasi isiwakke ndisio ndọ.

7. Didie ke Mme Ntiense ẹma kiet eken?

⁷ Mme Ntiense ẹma kiet eken. Ima emi, ke adianade ye ima oro mmọ ẹmade Abasi, adian mmọ ọtọkiet ke ata itie nditọete, okposụkedi mmọ ẹtode nsio nsio ekpụk ye idụt. Ke ini afanikọn̄ etịbede m̀mê ke ini nnanenyịn, Mme Ntiense ẹsisọp ndin̄wam kiet eken. Mme Ntiense ẹwụt ima ke usụn̄ emi mmọ ẹdude uwem.—John 13:35.

8. Ndiọi edinam ewe ke ikọt Abasi ẹfep?

⁸ Ikọt Jehovah ẹnam utom ọkpọsọn̄ ndidu eti uwem edinam akpanikọ. Mmọ ẹfep uyịpinọ, nsu, oburobụt ido, ukpammịn, ye mme edinam unana edinam akpanikọ ke mbubehe. Mme ebe isimiaha iban mmọ. Mbemiso ẹkekabarede ẹdi Mme Ntiense, ndusụk mmọ ẹma ẹsinam mme n̄kpọ emi, edi ye un̄wam Jehovah mmọ ẹma ẹtre. “Ẹma ẹyet [mmọ] ẹsana” ke enyịn Abasi.—1 Corinth 6:9-11.

9. Nso ke n̄wed kiet eketịn̄ aban̄a mme ufọkabasi ukọkudọn̄ọ ke Africa?

⁹ Nte ededi, ediwak ido ukpono ẹdọhọ ke imenyene akpanikọ. Mmọ ẹkeme ndinyan ubọk n̄wụt mme akpa-owo-idem utom ndisọn̄ọ se mmọ ẹdọhọde. Ke uwụtn̄kpọ, kaban̄a se ẹkotde ufọkabasi ukọkudọn̄ọ ke Africa, n̄wed kiet ọdọhọ ete: “[Mbufa otu Christian] ẹmebọ mme ebre mfọni utom mmọ ẹnam akamba akamba . . . Mmọ ẹdọhọ ke mmimọ imekeme nditịn̄ ini iso inyụn̄ inam mme utịben̄kpọ. Mme prọfet mmọ ẹsikụt n̄kukụt ẹnyụn̄ ẹsiak ndap. Mmọ ẹsikama edisana mmọn̄, edisana aran, ntọn̄, tiande, ye incense ndida n̄kọk nnyụn̄ mbiọn̄ọ mme udọn̄ọ.”

10, 11. Ntak emi mme inua-okot utịben̄kpọ mfịn mîwụtke nte ke ido ukpono edi eke Abasi?

¹⁰ Mme andibuana ke mme ido ukpono emi ẹdọhọ ke mme utịben̄kpọ oro ẹsọn̄ọ ke Abasi ọdiọn̄ ido ukpono mmimọ. Edi mme inua-okot utịben̄kpọ isọn̄ọke nte ke ido ukpono enyene unyịme Jehovah. Satan esinọ ndusụk mme nsunsu andituak ibuot odudu ndinam ‘mme utom odudu.’ (2 Thessalonica 2:9) N̄ko-n̄ko, Bible ama ebem iso etịn̄ ete ke mme utịbe utịbe enọ ẹtode Abasi, utọ nte editịn̄ ntịn̄nnịm ikọ, editịn̄ ikọ ke usem, ye san̄asan̄a ifiọk, “ẹyekabade ẹdi ikpîkpu.”—1 Corinth 13:8.

¹¹ Jesus ama odụri owo utọn̄ ete: “Idịghe kpukpru owo emi ẹkotde Mi ẹte, Ọbọn̄, Ọbọn̄, ẹdidụk ke Obio Ubọn̄ Heaven; edi owo eke anamde uyo Ete Mi emi odude ke heaven. Ediwak owo ẹyedọhọ Mi ke usen oro, ẹte, Ọbọn̄, Ọbọn̄, nte nnyịn iketịn̄ke nte prophet ke enyịn̄ Fo, inyụn̄ idaha enyịn̄ Fo iduọn̄ọ mme demon, inyụn̄ idaha enyịn̄ Fo inam ediwak n̄kpọ odudu? Ndien nyọdọhọ mmọ adan̄aoro, nte, Akananam ndiọn̄ọke mbufo: ẹdian̄ade Mi, mbufo mme anam-ukwan̄n̄kpọ.”—Matthew 7:21-23.

12. Mmanie ẹdidụk ke Obio Ubọn̄ heaven?

¹² Mmanie, ndien, ẹdidụk ke Obio Ubọn̄ heaven? Edi mbon oro ẹnamde uduak Jehovah.

13. Nso idi utom oro Abasi etemede ikọt esie ndinam mfịn, ndien mmanie ẹnam emi?

¹³ Nso ke Abasi aduak aban̄a ikọt esie mfịn? Jesus ọkọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt.” (Matthew 24:14) Emi edi utom oro Mme Ntiense Jehovah ẹnamde ifịk ifịk.

14. Nso idi Obio Ubọn̄ Abasi, ndien mmanie ẹdikara ke Obio Ubọn̄ oro?

¹⁴ Ke “ofụri ekondo,” Mme Ntiense Jehovah ke ẹtan̄a Obio Ubọn̄ Abasi nte ukara eke heaven oro edikarade ofụri isọn̄ ke edinen ido. Mmọ ẹkpep nte ke Jehovah ama emek Christ Jesus ndidi Edidem Obio Ubọn̄ oro, ke adianade ye owo 144,000 oro ẹdide nsan̄a mme andikara oro ẹmekde ẹsio ke otu ubonowo.—Daniel 7:14, 18; Ediyarade 14:1, 4.

15. Nso ke Obio Ubọn̄ oro edisobo efep?

¹⁵ Mme Ntiense ẹsida Bible ẹwụt mme owo nte ke Obio Ubọn̄ Abasi oyosobo ofụri editịm n̄kpọ Satan efep. Nsunsu ido ukpono ye mme ukpepn̄kpọ esie oro ẹsuenede Abasi ẹnyụn̄ ẹnọde Devil ubọn̄ ididụhe aba! (Ediyarade 18:8) Kpukpru ukara owo oro ẹdude ke ntuaha ye Abasi, ẹyebe ẹfep n̄ko!—Daniel 2:44.

16. Mmanie ẹdidi mme andidu ke idak Christ Jesus, ndien mmọ ẹdidụn̄ ke m̀mọ̀n̄?

¹⁶ Akan oro, Mme Ntiense Jehovah ẹnam ẹdiọn̄ọ nte ke Christ Jesus ayada utịbe utịbe ufọn ọsọk kpukpru mbon oro ẹnamde se Abasi oyomde. Mmọ ẹdidi mme andidu ke idak ukara esie ke isọn̄. Bible ọn̄wọn̄ọ ete: “Enye ayanyan̄a ubuene ke ini enye esemede; ye owo ukụt, ye owo eke mînyeneke andinyan̄a. Enye ayatua eyen unana ye ubuene mbọm, onyụn̄ anyan̄a ukpọn̄ mme ubuene.”—Psalm 72:12, 13.

17. Mmanie kpọt ẹtan̄a Obio Ubọn̄ Abasi?

¹⁷ Idụhe mbon efen oro ẹnamde uduak Abasi ebe ke ndikwọrọ eti mbụk Obio Ubọn̄. Mme Ntiense Jehovah kpọt ẹnam ẹdiọn̄ọ Obio Ubọn̄ Abasi ke ofụri isọn̄.