1, 2. Nso uwụtn̄kpọ iwụt ufọn edinyene idaha ndida mbiere mme n̄kpọ ẹban̄ade ido ukpono?

DIDIE ke nnyịn ikeme ndidi ndifiọk Abasi? Nte oyom ẹdụn̄ọde kpukpru ukpepn̄kpọ ediwak ido ukpono? Owo idikemeke ndinam oro. Idem edieke nnyịn ikpekemede ndinam oro, didie ke nnyịn ikpọfiọk m̀mê ewe ukpepn̄kpọ enen?

² Ke akpanikọ, ke ikerede iban̄a kpukpru nsio nsio ekikere ẹban̄ade Abasi, nnyịn imoyom usụn̄ ndifiọk se idide akpanikọ, ye idaha oro mme owo ẹkemede ndinyịme. Ke ndinam an̄wan̄a: Yak idọhọ ke ẹneni eneni ke urua ẹban̄a uniọn̄ ubak ọfọn̄. Andinyam ọdọhọ ke ọfọn̄ emi edi yard ita, edi andidep ekere ke iniọn̄ke ntre. Didie ke ẹkeme ndibiere mfịna emi? Ebe ke ndida udomon̄kpọ ndomo ọfọn̄ oro.

3. Ntak emi ẹkewetde Bible?

³ Nte udomon̄kpọ m̀mê idaha ndida mbiere mme n̄kpọ ẹban̄ade ido ukpono odu? Ih, enye edi Bible. Abasi ama anam ẹwet Bible man mme owo ke kpukpru ebiet ẹkeme ndikpep akpanikọ aban̄ade enye. Ẹmịn̄ ediwak biliọn Bible. Ẹkabade enye, ke ofụri ofụri m̀mê ke ubak ubak, ẹsịn ke se ibede usem 2,100. Ekpere ndidi kpukpru owo ẹkeme ndikot akpanikọ aban̄ade Abasi ke usem mmọ.

4. Nso ntọt isịne ke Bible?

⁴ Bible edi ọsọn̄urua enọ otode Abasi. Enye anam mme n̄kpọ oro nnyịn mîkpekemeke ndifiọk ẹn̄wan̄a. Enye etịn̄ aban̄a mbon oro ẹdude ke obio mme spirit. Enye  ayarade mme ekikere, edu, ye uduak Abasi. Enye etịn̄ aban̄a nte Abasi akanamde n̄kpọ ye mme owo ke ediwak tọsịn isua emi ẹkebede. Enye etịn̄ aban̄a mme n̄kpọ oro ẹditịbede ke ini iso. Ndien enye owụt nte nnyịn ikemede ndikụt usụn̄ oro adade esịm nsinsi uwem.

5. Nso iwụt nte ke Bible odu ke n̄kemuyo ye ifiọk ntaifiọk?

⁵ Ediwak ntak ẹdu oro ẹnamde nnyịn ikeme ndinịm ke akpanikọ nte ke Bible enen̄ede edi Ikọ Abasi. Ntak kiet edi nte ke Bible odu ke n̄kemuyo ye ifiọk ntaifiọk. Ke eset, mme owo ke ofụri ererimbot ẹkekere ke ererimbot okodoro ke n̄kpọ. Ke uwụtn̄kpọ, ke Edem Usoputịn Africa, mme owo ẹma ẹnịm ini kiet ko ẹte ke isọn̄ okodoro ke ekpọ urụkikọt, emi okon̄de utịm ike-3,500 ọkpọn̄ isọn̄ ye utịm ike-3,500 ke idak isọn̄. Edi, ke n̄kemuyo ye ifiọk ntaifiọk, andiwet Bible kiet ama ewet ke se ibede isua 3,500 emi ẹkebede ete ke Abasi “ọkọn̄ ererimbot ke ikpîkpu.”—Job 26:7.

6. Nso idi n̄kponn̄kan uyarade nte ke Bible oto Abasi?

⁶ N̄kponn̄kan uyarade nte ke Bible enen̄ede oto Abasi edi mfọnmma n̄wetnnịm n̄kpọ esie ke ndibem iso ntịn̄ ini iso. Ke mîbietke mbiaidiọn̄, Abasi enen̄ede ọfiọk ini iso; kpukpru n̄kpọ oro enye etịn̄de esidi akpanikọ kpukpru ini.

7. Nso idi ndusụk ntịn̄nnịm ikọ Bible oro ẹkesude ke eset?

⁷ Ediwak ntịn̄nnịm ikọ Bible ke mme itie ikie ẹma ẹsu ke eset. Ke uwụtn̄kpọ, Bible ama etịn̄ nnennen nnennen ke isua 700 ke mbemiso, ete ke Jesus edimana ke obio Bethlehem, ndien oro ama osu. (Micah 5:2; Matthew 2:3-9) Ke adianade ye ediwak ntịn̄nnịm ikọ eken ẹban̄ade Jesus, Bible ama ebem iso etịn̄ n̄ko ete ke n̄wan emi mîfiọkke erenowo ediman enye ndien ke akpatre ẹyeda enye ẹnọ ke mbak silver 30. Mme ntịn̄nnịm ikọ emi n̄ko ẹma ẹsu. Ke akpanikọ, idụhe owo ndomokiet emi ekpekekemede ndibem iso ntịn̄ mme n̄kpọ oro!—Isaiah 7:14; Zechariah 11:12, 13; Matthew 1:22, 23; 27:3-5.

8. Nso idi ndusụk ntịn̄nnịm ikọ Bible oro ẹsude mfịn, ndien nso ke mmọ ẹwụt?

⁸ Ediwak ntịn̄nnịm ikọ Bible ẹsu ke  eyo nnyịn. Mmọ emi ẹdi ibat ibat ke otu mmọ:

• “Idụt ayadaha an̄wana [ekọn̄] ye idụt, obio edidem kiet oyonyụn̄ adaha an̄wana ye obio edidem efen: ikpọ unyek-isọn̄ ẹyedu; akan̄ ye mme idiọk udọn̄ọ ẹyenyụn̄ ẹdu ke nsio-nsio ebiet.”—Luke 21:10, 11.

• ‘Ukwan̄ido ọyọtọt.’—Matthew 24:12.

• “Ke ukperedem ini . . . mme owo ẹyedi mme ama idem, ye mme ama inyene; . . . ẹsọn̄ ibuot ye ete ye eka, . . . ẹyak idiọkitọn̄ akan mmọ ubọk, ẹtie obom-obom, ẹnyụn̄ ẹsua se ifọnde; mmọ ẹdi . . . mbon n̄kohodeidem; mmọ ẹma mbre ẹkan Abasi.”—2 Timothy 3:1-5.

Nte afo unyịmeke nte ke mme n̄kpọ emi ke ẹtịbe idahaemi? Ntịn̄nnịm ikọ Bible ndidi akpanikọ nnyụn̄ nnen owụt nte ke Bible idịghe ikpîkpu n̄wed. Enye edi Ikọ Abasi eke odudu spirit!—2 Timothy 3:16.

9, 10. Nso iwụt nte ke Abasi iyakke ẹkpụhọde Bible?

⁹ Yak idọhọ ke afo ekedi andinyene ufọkutom ndien ke afo ama adian udịm udịm ibet ke obukpọk ntọt ọnọ mbonutom fo. Edieke ndusụk asua ẹkekpụhọrede se afo ekewetde, nso ke afo akpanam? Nte afo ukpûnen̄ekede se ẹkekpụhọrede oro? Ke ukem usụn̄ oro, Abasi iyakke mme owo ẹkpụhọde akpanikọ Ikọ esie, kpa Bible.

¹⁰ Mbon oro ẹkedomode ndikpụhọde mme ukpepn̄kpọ Ikọ Abasi ikekwe unen. Ke ini nnyịn imende Bible oro nnyịn inyenede mfịn idomo ye mme Bible eset, mmọ ẹdi ukem. Emi owụt nte ke owo ikpụhọkede Bible ke ediwak isua oro ẹkebede.