ẸKÛTIE KE NDUE-IDEM!

Ekọn̄ Ukraine Anam Udia Etetịm Anana ke Ererimbot

BRE

Ke May 19, 2022, N̄ka Esop Edidiana Mme Idụt emi ẹdiọn̄ọde nte United Nations Security Council ẹdọhọ ke ata ikpọ owo ukara emi ẹwakde ẹbe 75 ẹdọhọ ke ‘COVID-19 ye nte ẹbiatde isọn̄ anam udia anana ke ererimbot emi. Edi ke ekọn̄ emi Russia ẹn̄wanade ye Ukraine akam ababiat n̄kpọ ama; ekọn̄ emi ọmọn̄ anam akan̄ odu ke ndusụk ebiet ke ererimbot.’ N̄wedmbụk n̄kpọntịbe emi ẹkotde The Economist ama adian do ete ke ekọn̄ emi aman mfịna en̄wen, oro edi akan̄, adian ye mfịna ererimbot emi. Bible ama ọdọdọhọ ke akan̄ oyodu ke eyo nnyịn emi, onyụn̄ etịn̄ se nnyịn ikpanamde ke ini akan̄ odude.

Bible ama ọdọhọ ke akan̄ oyodu

Jesus ọkọdọhọ ete: ‘Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen, ndien akan̄ oyodu ke nsio nsio ebiet.’—Matthew 24:7.
N̄wed Ediyarade asiak mme awat enan̄-mbakara inan̄ emi ẹdade ẹban̄a n̄kpọ. Awat enan̄-mbakara kiet ada aban̄a ekọn̄. Enye emi etienede enye ke edem ada aban̄a akan̄, oro edi, ini emi udia mîdikemke owo ubọk onyụn̄ enen̄erede ọsọn̄ urua. Ediyarade 6:5, 6 ọdọhọ ete: ‘Ndien obubịt enan̄-mbakara ọwọrọ edi; ndien andidoro enye ke edem akama udomon̄kpọ ke ubọk. Ndien n̄kop uyo emi ọdọhọde ete: “Udomo wheat kiet ke denarius kiet, (oro edi, okụk utom usen), ye udomo barley ita ke denarius kiet, (kpa okụk utom usen).”’

Prọfesi Bible emi aban̄ade akan̄ ke osu ke eyo nnyịn emi Bible okotde “mme akpatre usen.” (2 Timothy 3:1) Edieke oyomde ndifiọk se Bible etịn̄de aban̄a “mme akpatre usen emi” ye mme awat enan̄-mbakara inan̄ emi N̄wed Ediyarade etịn̄de aban̄a, se vidio emi, The World Has Changed Since 1914, nyụn̄ kot ibuotikọ emi, “Mmanie Ẹdi Mme Awat Enan̄-Mbakara Inan̄?”

Se nte Bible ekemede ndin̄wam fi

Nti item emi ẹkemede ndin̄wam fi ke ini afanikọn̄, utọ nte ini nsọn̄ọn̄kpọ m̀mê unana udia, ọyọyọhọ Bible. Se ndusụk nti item emi ke ibuotikọ emi “Se Akpanamde ke Ini Okụk Asatde Fi ke Ekpat.”
Bible n̄ko ọnọ nnyịn idotenyịn nte ke n̄kpọn̄ ọyọfọn. Bible ọdọhọ ke ini ke edi emi “uwak n̄kpasịp,” oro edi ediwak udia edidude ke isọn̄ emi, ndien kpukpru owo ẹyenyene se ẹdiade barasuene. (Psalm 72:16) Edieke oyomde ndifiọk idotenyịn emi Bible ọnọde nnyịn aban̄a nte n̄kpọn̄ editiede, ye se ikpanamde afo enịm se Bible etịn̄de emi, kot ibuotikọ emi, “A Real Hope for a Better Tomorrow.”