Ndi emesidori enyịn ke ini iso ọyọfọn? Ediwak owo ẹsidori enyịn ke ini iso ọyọfọn kpa ye ofụri mfịna oro akade iso mfịn. Edi, ndi imekeme ndinen̄ede nnịm ke n̄kpọ ọyọfọn? Ih! Bible etịn̄ ata akpan ntak oro anamde inịm ke n̄kpọn̄ ọyọfọn.

•  Bible ọdọhọ ke n̄kpọ editie didie ke ini iso?

•  Ndi se Bible etịn̄de aban̄a ini iso ibietke akpanikọ?

•  Mme n̄kpọ emi ẹdisan̄a didie itịbe?

•  Ini ewe ke mme n̄kpọ emi ẹditịbe?

•  Didie ke se Bible etịn̄de emi ekeme ndin̄wam nnyịn mfịn?

 Bible enyịme ke mme owo ẹsobo ediwak mfịna. Edi, Bible ọn̄wọn̄ọ ke mme mfịna emi ididịghe ke nsinsi. Se uwụtn̄kpọ ifan̄ mi.

•   Mfịna: Unana itieidụn̄

   Se Bible etịn̄de: “Mmọ ẹyebọp ufọk ẹnyụn̄ ẹdụn̄ ke esịt.”​—Isaiah 65:21.

   Nte ini iso editiede: Mme owo ẹyedụn̄ ke ufọk mmọ ẹkop idem inem.

•   Mfịna: Unana utom ye ubuene

   Se Bible etịn̄de: “Ndimek ikọt mi ẹyedia ufọn utom ubọk mmọ ọyọhọ ọyọhọ.”​—Isaiah 65:22.

   Nte ini iso editiede: Kpukpru owo ẹyekop inem uwem ẹnyụn̄ ẹnyene nti utom.

•   Mfịna: Ukwan̄ikpe

   Se Bible etịn̄de: “Amaedi mbọn̄, mmọ ẹyekara nte mbọn̄ ke unenikpe.”​—Isaiah 32:1.

   Nte ini iso editiede: Owo idikpehe ukwan̄ikpe inọ owo ke ntak ebiet emi enye otode, ntak emi enye mîwọrọke etop m̀mê ke ntak emi enye mîdịghe imọ owo. Ẹdinam n̄kpọ ye kpukpru owo ukem ukem.

•   Mfịna: Unana nti udia ye biọn̄

   Se Bible etịn̄de: “Uwak n̄kpasịp ẹyedu ke isọn̄;ọyọyọhọ ọduọhọ ke mme enyọn̄ obot.”​—Psalm 72:16.

   Nte ini iso editiede: Kpukpru owo ẹyenyene nti udia ẹdia. Owo ndomokiet ididụkke idap biọn̄ m̀mê ndidọn̄ọ ke ntak emi mînyeneke eti udia idia.

•   Mfịna: Ubiatibet ye afai

   Se Bible etịn̄de: “Mmọ ẹyetie ke idak vine mmọ ye ke idak eto fig mmọ, ndien ididụhe owo eke edinamde mmọ ẹdịghe.”​—Micah 4:4.

   Nte ini iso editiede: Ndịk idinamke owo ndomokiet sia mme idiọkowo ididụhe aba, ndien “ndinen owo ẹyeda isọn̄ ẹnyene.”​—Psalm 37:10, 29.

•   Mfịna: Ekọn̄

   Se Bible etịn̄de: “Idụt idimenke akan̄kan̄ itiene idụt, mmọ idinyụn̄ ikpepke aba ekọn̄.”​—Isaiah 2:4.

   Nte ini iso editiede: Emem oyodu ke ofụri isọn̄. (Psalm 72:7) Owo ndomokiet idituaha ke ntak emi ẹwotde owo esie ke ekọn̄, owo idinyụn̄ ifeheke ikpọn̄ ufọk ke ntak ekọn̄.

•   Mfịna: Udọn̄ọ

   Se Bible etịn̄de: “Baba andidụn̄ kiet ididọhọke ite: ‘Ndọdọn̄ọ.’”​—Isaiah 33:24.

   Nte ini iso editiede: Owo ndomokiet idibiomoke ndo m̀mê ndidọn̄ọ. (Isaiah 35:5, 6) Bible akam ọn̄wọn̄ọ ke “n̄kpa idụhe aba.”​—Ediyarade 21:4.

•   Mfịna: Ndibiat isọn̄

   Se Bible etịn̄de: “Wilderness ye edisat ebiet ẹyedara, ndien unaisọn̄ desat ayadara onyụn̄ asiaha ikọn̄ nte saffron.”​—Isaiah 35:1.

   Nte ini iso editiede: Abasi ayanam ofụri isọn̄ edi paradise nte enye okoyomde ke ntọn̄ọ.​—Genesis 2:15; Isaiah 45:18.

 Emekeme ndikere ke ibietke. Edi ikpama ada ini ekpep Bible man ọdiọn̄ọ se enye etịn̄de aban̄a ini iso. Ntak-a? Sia mme un̄wọn̄ọ Bible idịghe ukem ye enye oro mme owo ẹsin̄wọn̄ọde m̀mê ẹtịn̄de. Mme un̄wọn̄ọ Bible ẹto Abasi. Se se inamde un̄wọn̄ọ Abasi okpụhọde ye eke owo mi:

•   Abasi esinam akpanikọ. Bible ọdọhọ ke Abasi ‘îkemeke ndisu nsu.’ (Titus 1:2) N̄kpọ en̄wen edi ke Abasi kpọt ekeme nditịn̄ se iditịbede ke ini iso. (Isaiah 46:10) Ediwak n̄kpọ do ke Bible emi owụtde ke se Abasi esitịn̄de esisu. Edieke oyomde ndidiọn̄ọ mme n̄kpọ en̄wen, se vidio emi Nnyịn Isan̄a Didie Ifiọk ke Se Ẹwetde ke Bible Enen?

•   Abasi enyene odudu ndikọk kpukpru mfịna nnyịn. Bible ọdọhọ ke Abasi enyene odudu ndinam “kpukpru n̄kpọ oro enye amade ndinam.” (Psalm 135:5, 6) Emi ọwọrọ ke idụhe n̄kpọ ndomokiet emi ekemede ndikpan Abasi ndinam se enye ọn̄wọn̄ọde. Se ikande oro edi ke Abasi oyom ndin̄wam nnyịn sia enye amade nnyịn.​—John 3:16.

 Edi, emekeme ndikere, ‘Edieke edide Abasi enyene odudu onyụn̄ oyom ndin̄wam nnyịn, ntak isụk inyenede utọ ediwak mfịna emi?’ Man okụt ibọrọ mbụme oro, se vidio emi Ntak Emi Abasi Ayakde Mme Owo Ẹbọ Ufen?

 Abasi edida Obio Ubọn̄ esie emi odude ke heaven inam se enye ọn̄wọn̄ọde. Enye emek Jesus Christ edi Andikara Obio Ubọn̄ oro, onyụn̄ ọnọ enye odudu ndise mban̄a isọn̄ ye mbon oro ẹdude ke esịt. Ini Jesus okodude ke isọn̄, enye ama esikọk mme owo udọn̄ọ, ọnọ mme owo udia, anam oyobio etre, onyụn̄ anam mme akpan̄kpa ẹset. (Mark 4:39; 6:41-44; Luke 4:40; John 11:43, 44) Enye okowụt se imọ idinamde nte Edidem Obio Ubọn̄ Abasi.

 Se vidio emi Nso Idi Obio Ubọn̄ Abasi? man okụt mme n̄kpọ oro Obio Ubọn̄ Abasi edinamde inọ fi.

 Idibịghike! Inam didie idiọn̄ọ? Bible ama etetịn̄ mme n̄kpọ mme n̄kpọ emi ẹditịbede emi ẹdiwụtde ke Obio Ubọn̄ Abasi ọmọn̄ ọsọsọp ọtọn̄ọ ndikara isọn̄ emi. (Luke 21:10, 11) Se itịbede ke ererimbot mfịn onyụn̄ edi ukem ye se Bible eketịn̄de.

 Edieke oyomde ndidiọn̄ọ mme n̄kpọ en̄wen, kot ibuotikọ emi “Ini Ewe ke Obio Ubọn̄ Abasi Edikara Isọn̄ Emi?”

 Owo kiet emi eketienede ewet Bible ekemen idotenyịn oro Bible ọnọde nnyịn odomo ye “ukwak ubom ukpọn̄ nnyịn.” (Mme Hebrew 6:19) Ukem nte ukwak ubom esimụmde nsụn̄ikan̄ akama ke ini oyobio, idotenyịn oro Bible ọnọde nnyịn ke n̄kpọ ọyọfọn ke ini iso esin̄wam nnyịn iyọ mme mfịna oro inyenede mfịn. Idotenyịn emi ekeme ndinam esịt ana nnyịn sụn̄, anam ibuot iyon̄ke nnyịn, onyụn̄ anam ikop inem idem.​—1 Thessalonica 5:8.