Ediwak mbon emi ẹdọhọde ke idi mme mbet Jesus Christ ẹdodụk ẹnyịne ke pọlitiks. Se itịbede ke ofụri ererimbot edi oro. Ekpenyene mbon pọlitiks mîdịghe n̄ka pọlitiks emi mmọ ẹkụtde ke ẹnyịme se ufọkabasi mmimọ ẹnịmde, mîdịghe ẹnyịme nte mmimọ iyomde ẹdu uwem, mmọ ẹsifịk ubọk ẹnọ utọ mbon oro, mîdịghe ẹda ẹnọ n̄ka pọlitiks oro. Nte mme owo ẹkpemade ndidu uwem m̀mê nte ẹkpemade ẹnam n̄kpọ ye mbon en̄wen ke mbon pọlitiks ẹsiwak ndida ndep esịt mbon ido ukpono. Nte ikpọ owo ido ukpono ẹsiyomde itie ke ukara idịghe edịbe. N̄ko, ndusụk idụt ẹkam ẹmek ido ukpono kiet emi ẹdọhọde ke idi eke mme Christian ẹte ke enye edi ido ukpono idụt mmimọ.

 Ekere didie? Ndi akpana mme mbet Jesus Christ ẹsịn idem ke pọlitiks? Nte Jesus okodude uwem ekeme ndin̄wam fi okụt ibọrọ mbụme oro. Enye ọkọdọhọ ete: “N̄kenịm uwụtn̄kpọ nnọ mbufo, nte, kpa nte n̄kanamde ye mbufo, mbufo ẹkpenam kpa ntre.” (John 13:15) Nso utọ uwụtn̄kpọ ke Jesus ekenịm ke n̄kpọ pọlitiks emi?

 Ihih. Jesus ikesịnke idem ke pọlitiks ererimbot emi.

 Jesus ikoyomke itie ke ukara. Ini Satan kpa Devil ọkọnọde enye “kpukpru mme obio ubọn̄ ererimbot,” Jesus ama esịn. Enye ikoyomke ukara ererimbot emi. (Matthew 4:8-10) a Isan̄ en̄wen, mbon emi ẹkekụtde ke Jesus enyene mme edu emi ẹdinamde enye edi eti andikara ẹma ẹdomo ndinyịk enye nsịn ke pọlitiks. Bible ọdọhọ: “Ke Jesus ọfiọkde ete mmọ ẹyom ndimụm imọ nnịm ke edidem, enye afiak ọnyọn̄ obot sụk enye ikpọn̄.” (John 6:15) Jesus ikanamke n̄kpọ isịn ke inemesịt owo, utu ke oro enye ama esịn ndisịn idem ke pọlitiks.

 Jesus ikesisịnke uyo ke n̄kpọ pọlitiks. Ke uwụtn̄kpọ, ekesiyayat mme Jew eyo Jesus ndikpe tax nnọ ukara Rome. Mmọ ẹkeda nte ke ẹfefịk mmimọ. Ini mmọ ẹkedomode ndinam Jesus esịn uyo ke ikọ tax oro, enye iketịn̄ke m̀mê akpana ẹkpe m̀mê ẹkûkpe sia enye oro ediwọrọ pọlitiks. Enye ọkọdọhọ mmọ ete: “Ẹnọ Caesar se inyenede Caesar, ẹnyụn̄ ẹnọ Abasi se inyenede Abasi.” (Mark 12:13-17) Enye ikenyeneke n̄kan̄ emi enye adade ọnọ, edi ama owụt ke akpana mmọ ẹkpe tax emi mbon ukara Rome ẹkedọhọde sia Caesar ọkọdọn̄ mmọ. Ke ukem ini oro, enye ama owụt ke idịghe kpukpru se ukara ẹdọhọde ẹnam ke mmọ ẹdinam. Ikpanaha owo emen utuakibuot emi enye akpatuakde ọnọ Abasi, m̀mê n̄kpọ en̄wen ntre emi enye akpanamde ọnọ Abasi akanam ọnọ ukara.​—Matthew 4:10; 22:37, 38.

 Jesus ekesikpep mme owo aban̄a ukara Abasi emi odude ke heaven; enye n̄ko akada ọnọ ukara oro. (Luke 4:43) Enye ikesịnke idem ke pọlitiks sia enye ama ọdiọn̄ọ ke ukara Abasi edinam isọn̄ emi etie nte Abasi okoyomde, idịghe ukara owo. (Matthew 6:10) Enye ama ọdiọn̄ọ ke ukara owo idikarake ke ibuot ukara Abasi, edi ke ukara Abasi oyosobo kpukpru ukara owo efep, enye ikpọn̄ onyụn̄ odu.​—Daniel 2:44.

 Ihih. Jesus ọkọdọhọ mme mbet esie ẹkûdi “ubak ererimbot,” mmọ ikonyụn̄ idịghe. (John 15:19) Mmọ ikesịnke idem ke pọlitiks ukem nte Jesus. (John 17:16; 18:36) Utu ke oro, mmọ ẹkekwọrọ ẹnyụn̄ ẹkpep mme owo ẹban̄a ukara Abasi. Se Jesus ọkọdọn̄de mmọ edi oro.​—Matthew 28:18-20; Utom 10:42.

 Se ikebehede mme Christian eyo mme apostle ikan ekedi ndikop uyo Abasi, edi mmọ ẹma ẹdiọn̄ọ ke ana mmimọ ikpono ukara n̄ko. (Utom 5:29; 1 Peter 2:13, 17) Mmọ ẹma ẹsinịm ibet ukara ẹnyụn̄ ẹkpe tax. (Rome 13:1, 7) Kpa ye oro mmọ mîkesisịnke idem ke pọlitiks, mmọ ẹma ẹsida ibet ukara ye mme n̄kpọ emi ukara ẹnamde ẹnọ mbio obio ẹn̄wam idem.​—Utom 25:10, 11; Philippi 1:7.

 Bible anam inen̄ede ikụt ke Jesus ikesịnke idem ke pọlitiks, mme Christian emi ẹkedude mbemiso eyo nnyịn ikonyụn̄ isịnke. Oro anam Mme Ntiense Jehovah ke ofụri ererimbot ẹkûsịn idem ke pọlitiks sia mmọ n̄ko ẹdi mme Christian. Mmọ ẹkpebe mme Christian eyo mme apostle; mmọ “ẹkwọrọ eti mbụk obio ubọn̄” emi Jesus ọkọdọhọde ẹkwọrọ.​—Matthew 24:14.