Ke July 2022, ama akpa mme owo idem nte mbon ntịme ẹketopde mme owo ke nsio nsio itie ke ererimbot:

•   “Idem ama akpa mme owo ke Japan ini ẹketopde akani adaibuot ukara mmo emi ekerede Shinzo Abe, sia utọ n̄kpọ emi isisọpke itịbe ke Japan, ibet inyụn̄ inyịmeke mme owo ẹkema ikan̄.”​—July 10, 2022, The Japan Times.

•   “Ke Denmark idem ama akpa mme owo ini mbon ntịme ẹketopde owo ita ewot ke akammba ufọkurua ke Copenhagen.”​—July 4, 2022, Reuters.

•   “Ke South Africa mbon ntịme ẹma ẹtop owo 15 ewot ke itie unwọn̄ mmịn ke Soweto.”​—July 10, 2022, The Guardian.

•   “Ke utịt urua mbemiso July 4 emi utom m̀mê ufọkn̄wed mîkodụhe, mbon ntịme ẹma etop se iwakde ibe owo 220 ewot ke U.S. A.”​—July 5, 2022, CBS News.

 Ndi oyodu ini owo mîdiwotke owo ntịme ntịme ntem? Nso ke Bible etịn̄ aban̄a n̄kpọ emi?

 Bible okot eyo nnyịn emi “mme akpatre usen,” ini emi mme owo etiede afai afai, ẹnyụn̄ ẹnamde n̄kpọ ntịme ntịme. (2 Timothy 3:1, 3) Nte n̄kpọ etiede ke ererimbot idahaemi anam idem enen̄ede enyek mme owo. (Luke 21:11) Edi, Bible etịn̄ ke ini ke edi emi afai mîdidụhe aba ndien ‘mme owo ẹyedụn̄ ke ebietidụn̄ emem ye ke ebiet ifụre ye ke ebiet nduọkodudu emi anade sụn̄.’ (Isaiah 32:18) Se idinamde afai etre?

 Abasi oyosobo mbon ibak ye mme n̄kpọ ekọn̄ mmọ.

•   “Edi ẹyesobo mme idiọkowo ẹfep ke isọn̄.”​—Mme N̄ke 2:22.

•   “Enye [Abasi] amanam ekọn̄ etre tutu esịm utịt isọn̄. Obụn̄ utịgha onyụn̄ okpok eduat n̄ken̄e n̄ken̄e; ọfọp mme chariot ekọn̄ ke ikan̄.”​—Psalm 46:9.

 Abasi eyekpep kpukpru owo ndidu ke emem ndien emi ayanam afai okûdu aba.

•   “Mmọ idinamke ibak, idinyụn̄ ibiatke n̄kpọ ke ofụri edisana obot mi; koro ifiọk Jehovah ọyọyọhọ isọn̄ kpa nte mmọn̄ ofụkde inyan̄.”​—Isaiah 11:9.

•   Idem idahaemi, Abasi ke ekpep mme owo ke ofụri ererimbot nditre afai nnyụn̄ ntre ndikama n̄kpọ ekọn̄ ekededi, enye ke ekpep mmọ ndida “akan̄kan̄ mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ eto.”​—Micah 4:3.

 Okpoyom ndidiọn̄ọ se Bible etịn̄de aban̄a ini emi ndịk mîdinamke mme owo aba, kot ibuotikọ emi “Freedom From Fear—Is It Possible?”

 Edieke oyomde ndidiọn̄ọ nte afai edisan̄ade itre ke nsinsi, kot ibuotikọ emi “Peace on Earth at Last!”