Nso ke Bible Etịn̄ Aban̄a Mfịna Mmọn̄ ke Ofụri Ererimbot?
Kpukpru nnyịn imoyom eti mmọn̄ man ikeme ndidu uwem. Akamba owo UN emi ekerede António Guterres ọdọhọ ke ‘nte mme owo ke ofụri ererimbot ẹyomde mmọn̄, ntre ke mmọn̄ edinen̄ede inana.’ Idem idahaemi, ata ediwak miliọn owo ke ererimbot inyeneke eti mmọn̄ in̄wọn̄.
Strdel/AFP via Getty Images
Ndi iyenyene mmọn̄ emi edikemde kpukpru owo? Mîdịghe, ndi mfịna mmọn̄ edisụk ika iso ntem? Nso ke Bible etịn̄?
Bible etịn̄ ke mmọn̄ oyodu
Bible etịn̄ ke usen kiet usen kiet, ke mmọn̄ idinanake aba. Se ikam idude edi ke eti mmọn̄ oyodu barasuene.
“Mmọn̄ ayasiaha ke wilderness, idịm oyonyụn̄ asiaha ke unaisọn̄ desat. Ndien isọn̄ emi ufiop ọfọpde ayakabade edi n̄kpọdiọhọ mmọn̄, edisat isọn̄ oyonyụn̄ akabade edi idịm mmọn̄.”—Isaiah 35:6, 7.
Ntak emi ikpenịmde se Bible ọn̄wọn̄ọde? Se usụn̄ kiet Bible etịn̄de nte ẹkenamde ekondo nnyịn mi.
Se Bible etịn̄de aban̄a isọn̄ ye nte mmọn̄ esisan̄ade odu
‘Abasi ikobotke isọn̄ ke ikpîkpu, okobot man ẹdụn̄ ke esịt.’—Isaiah 45:18.
Sia nte Abasi okobotde isọn̄ emi ekedide man ikeme ndidu uwem, oro akanam Enye obot nsio nsio n̄kpọ emi ẹdinamde eti mmọn̄ odu barasuene.
“Koro [Abasi] odụride mme ntọi mmọn̄; mmọ ẹdụhọde nte edịm ẹkabade ntụhube esie, ntre obubịt enyọn̄ ọtọi mmọn̄, mmọ ẹduọhọ ubonowo akpakịp.”—Job 36:27, 28.
Ke ikọ ifan̄ kpọt, itie Bible emi etịn̄ ndutịm emi Abasi akanamde man isinyene mmọn̄. Utịn esimia mmọn̄ emi odude ke mme inyan̄ibom ye ke isọn̄ tutu enye akabade uye onyụn̄ ọdọk okoboho ke ikpaenyọn̄ ekem edep nte edịm; emi esinam owo ye mme unam ẹka iso ẹnyene eti mmọn̄.—Ecclesiastes 1:7; Amos 5:8.
“Nyọnọ mbufo edịm ke edikem ini, ndien isọn̄ oyon̄wụm mbun̄wụm, eto ke in̄wan̄ oyonyụn̄ osion̄o mfri esie.”—Leviticus 26:4.
Abasi ama ọn̄wọn̄ọ ndidiọn̄ nditọ Israel eset emi ẹkedide mme ọtọin̄wan̄ ke ndinam mmọ ẹnyene mmọn̄ kpukpru ini man se mmọ ẹtọde on̄wụm ọfọn. Enye ama ọdiọn̄ọ ke man n̄kpọ-in̄wan̄ ekeme ndikọri ọfọn ke ana edịm edep ke nnennen ini.
Abasi ayanam kpukpru se Enye akanamde ọnọ nditọ Israel emi ọnọ kpukpru nti ikọt Esie ke ofụri ererimbot. (Isaiah 30:23) Edi sia ini oro mîdịghe kan̄a, mfịna mmọn̄ osụk okpokpon ke ediwak itie ke ererimbot, ndien kiet ke otu mme mfịna emi edi nte edịm mîdepke. Nso en̄wen ke Abasi edinam man mfịna mmọn̄ etre?
Nte Mfịna Mmọn̄ Editrede
Bible etịn̄ ke Abasi ayada Obio Ubọn̄ Esie etre kpukpru mfịna isọn̄ emi, esịnede mfịna mmọn̄. (Matthew 6:9, 10) Obio Ubọn̄ Abasi edi ukara Abasi ke heaven emi Abasi edidade ikara ofụri isọn̄. (Daniel 2:44; Ediyarade 11:15) Obio Ubọn̄ Abasi ayanam se ukara owo mîkemeke ndinam—enye eyetre ofụri se isinamde inyene mfịna mmọn̄.
Mfịna: Ọkpọsọn̄ ufiop ye ọkpọsọn̄ edịm isiyakke ndutịm emi Abasi akanamde man mmọn̄ odu asan̄a nte akpasan̄ade. Emi esinam mmọn̄ enen̄ede anana onyụn̄ anam ukwọ enen̄ede okpon, edide ukwọ emi otode ọkpọsọn̄ edịm m̀mê enye emi mmọn̄ akpa ọtọde ebe odụk obio.
Se Abasi Edinamde: Obio Ubọn̄ Abasi ọyọdiọn̄ kpukpru se mme owo ẹbiatde onyụn̄ anam isọn̄ emi afiak eketie nte eketiede. Abasi ọn̄wọn̄ọ ete: “Sese! Mmanam kpukpru n̄kpọ ẹdi mbufa.” (Ediyarade 21:5) Mmọn̄ oyodu barasuene ke mme ebiet emi ẹkedide edisat isọn̄, mme eto, mme unam, ye mme owo ẹyekeme ndidu uwem idem ke mme ebiet emi mmọ mîkemeke ndidu uwem idahaemi. (Isaiah 41:17-20) Ke Obio Ubọn̄ Abasi, Jesus Christ idiyakke mme odudu oro mme n̄kpọ obot ẹnyenede ẹsịn mfịna ke isọn̄ aba.
Ini Jesus okodude ke isọn̄, enye ama anam ofụm akwa oyobio odobo ndiwụt odudu oro Abasi ọnọde enye. (Mark 4:39, 41) Ke ini Jesus emi edide Edidem Obio Ubọn̄ Abasi edikarade isọn̄ emi, mme afanikọn̄ nte unyekisọn̄, ikan̄ ndita obio ye mmọn̄ nditọ ndụk obio ẹyetre. Mme owo ẹyenyene ata emem, ẹdu ke ifụre idinyụn̄ ifeheke ndịk mme n̄kpọ isụk ibatde mi.
Mfịna: Mme idiọkowo ye mme kọmpeni emi ẹmade okụk ẹkan uwem owo ẹbiat mmọn̄ inyan̄, akpa mmọn̄ ye mme mmọn̄ emi odude ke idak isọn̄. Emi iyakke inyene eti mmọn̄.
Se Abasi Edinamde: Abasi ọyọdiọn̄ isọn̄ emi onyụn̄ anam mme akpa, inyan̄, mme idịm ye isọn̄ utọ n̄kpọ ẹfọn. Isọn̄ emi ayakabade edi Paradise. Bible ọdọhọ ete: “Wilderness ye edisat ebiet ẹyedara, ndien unaisọn̄ desat ayadara onyụn̄ asiaha ikọn̄ nte saffron.”—Isaiah 35:1.
Nso ke Abasi edinam mbon oro ẹbiatde isọn̄ emi mînyụn̄ idaha uwem owo ke n̄kpọ? Abasi ọn̄wọn̄ọ ‘ndisobo mbon oro ẹbiatde isọn̄.’—Ediyarade 11:18; Mme N̄ke 2:21, 22.
Mfịna: Ubonowo ẹbaha mmọn̄ eti eti, ndien ofụri mmọn̄ emi mme owo ẹbahade awak akan se edịm esinamde inyene.
Se Abasi Edinamde: Obio Ubọn̄ Abasi ayanam ẹnam uduak Abasi mi ke isọn̄ idịghe uduak owo. (Matthew 6:9, 10) Mbon emi ẹdidude ke Obio Ubọn̄ Abasi ẹyekpep ata nti n̄kpọ sia Isaiah 11:9 ọdọhọ ke “ifiọk Jehovah ọyọyọhọ isọn̄.” a Utọ ifiọk idinyenede mi ye ima emi idimade Abasi ye mme n̄kpọ emi Enye okobotde ayanam inen̄ede ise iban̄a ediye isọn̄ nnyịn emi ye kpukpru se Abasi okobotde ọdọn̄ ke esịt.
Edieke oyomde ndidiọn̄ọ mme n̄kpọ en̄wen emi Obio Ubọn̄ Abasi edinamde, mbọk kot ibuotikọ emi “Nso ke Obio Ubọn̄ Abasi Edinam?”
Kot Isaiah, ibuot 35, man okụt nte ẹdinamde isọn̄ emi edi Paradise.
Se vidio emi Ntak Emi Abasi Okobotde Isọn̄ Emi? man okụt se Abasi ọn̄wọn̄ọde ndinam nnọ mme owo ye isọn̄ emi.
a Ata enyịn̄ Abasi edi Jehovah. (Psalm 83:18) Kot ibuotikọ emi “Anie Edi Jehovah?”
Strdel/AFP via Getty Images
Ekeme Ndidi Ayama Mmọ Emi N̄ko
ẸKÛTIE KE NDUE-IDEM!
Ọkpọsọn̄ Ndaeyo—Nso ke Bible Etịn̄ Aban̄a Emi?
Ndi ẹkeme nditre mfịna emi ke ofụri ererimbot? Ndi idotenyịn ndomokiet odu ke n̄kpọ ọyọfọn ke ini iso?
BIBLE EKEME NDIBỌRỌ MBỤME FO
Nso ke Bible Etịn̄ Aban̄a Oto-obot Afanikọn̄?
Ndi Abasi esinam enye etịbe? Ndi Abasi esin̄wam mbon oro oto-obot afanikọn̄ esịmde?
ESSENTIAL BIBLE TEACHINGS
Nso Idi Obio Ubọn̄ Abasi?
Ini Jesus okodude mi ke isọn̄, enye ama esima ndikwọrọ mban̄a Obio Ubọn̄ Abasi. Mme owo ẹsima ndibọn̄ akam ẹte Obio Ubọn̄ oro edi.
ABAN̄A NNYỊN
Dọhọ Mmọ Ẹdi Ufọk
Se nte Bible ekemede ndibọrọ mbụme fo, mîdịghe kpep n̄kpọ ban̄a Mme Ntiense Jehovah.
