Edi eyo esiere mme owo ẹdọdiọn̄ ẹdiọk ido. Mbon udọn̄ọ emi mînyeneke ido ẹsifiori n̄kpo ẹtịn̄ ikọ ye mme dọktọ nte mmọ ẹmade; ndusụk mbon oro ẹkade ndidia udia ke itie udia ẹsisụn̄i mbon oro ẹnyamde udia ẹnọ mmọ; ndusụk mbon oro ẹdụkde ubomofụm ẹsitie en̄wan en̄wan inyụn̄ imaha ndinam se mbon oro ẹnamde utom ke ubomofụm ẹdọhọde; nditọwọn̄ emi ẹsisọn̄de ibuot ẹsisak, ẹnyụn ẹdọhọ ke iyanam mme andikpep mmọ n̄kpọ ẹnyụn̄ ẹnanam; ndien ndusụk mbon pọlitịks ẹsinam mme n̄kpọ emi edide owo ama okop enye akpan̄a nsa, ke ini ndusụk mmọ ẹsinamde nte mmimọ imọfọn tutu.

 Bible edi ata eti n̄wed emi an̄wamde mme owo ẹdiọn̄ọ nte ẹkpedude eti uwem. Enye eṭn̄ n̄ko se inamde mme owo ẹkûnyene ido aba mfịn.

 Ke ofụri ererimbot, edi eyo esiere mme owo ẹdiọk ido.

•   Ndụn̄ọde oro ẹkenamde ye mme owo ke nsio nsio idụt ke America owụt ke mmọ ẹkere ke mbon United States ẹnen̄ede ẹdiọk ido ẹkan nte akanam edide ke ufan̄ isua 22 oro ẹbede.

•   Ke ndụn̄ọde en̄wen oro ẹkenamde ye se ibede owo 32,000 ke idụt 28, owo 20,800 ẹkedọhọ ke mme owo ẹnana ido ẹkan nte akanam edide.

 Bible ama etetịn̄ ke nte mme owo ẹdidude uwem mfịn edi oro.

•   “Ndiọkeyo emi ọsọn̄de ndiyọ oyodu ke mme akpatre usen. Koro mme owo ẹyedi mme ama idem, mme ama okụk, ẹtan̄ idem, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, . . . ẹtie obom obom, [inyụn̄] imaha eti ido.”​—2 Timothy 3:1-3.

 Edieke oyomde ndidiọn̄ọ n̄kpọ en̄wen mban̄a nte prọfesi emi osude mfịn, mbọk kot ibuotikọ emi “Did the Bible Predict the Way People Think and Act Today?”

 Ke ererimbot emi edide eyo esiere mme owo ẹnen̄ede ẹdiọk ido mi, ediwak miliọn owo ẹdikụt ke Bible edi ata eti n̄wed emi an̄wamde mme owo ẹnyene eti ido. Item esie oro aban̄ade nte ikpodude uwem edi se ‘ẹsọn̄ọde ẹmụm ẹkama ke nsinsi.’ (Psalm 111:8) Se uwụtn̄kpọ ifan̄ mi:

•   Se Bible etịn̄de: “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.”​—Matthew 7:12.

   Se ọwọrọde: Ana isifọn ido inyụn̄ ikpono mme owo, nte inyụn̄ iyomde mmọ ẹnam ye nnyịn.

•   Se Bible etịn̄de: “Ke emi mbufo ẹma ẹkeduọn̄ọ nsu, yak owo mbufo kiet kiet etịn̄ akpanikọ ọnọ mbọhọidụn̄ esie.”​—Ephesus 4:25.

   Se ọwọrọde: Ana inam akpanikọ ke kpukpru se itịn̄de inyụn̄ inamde.

 Edieke oyomde ndidiọn̄ọ n̄kpọ en̄wen mban̄a ibuotikọ emi, mbọk kot:

•   Enyọn̄-Ukpeme emi ibuotikọ edide “Se Idin̄wamde Fi Ọdiọn̄ọ​—Se Ifọnde ye Se Idiọkde.”

•   Ibuotikọ emi “Nte Bible Ekemede Ndin̄wam Fi Esiyọ Owo.”