Ẹdọhọ ke n̄kpọ nte owo biliọn ition ẹdise mbon mbre mbuba emi ẹtode idụt 206 ẹdi nditiene mbre mbre Olympic eke isua 2024 emi. Thomas Bach, emi edide president International Olympic Committee, ọkọdọhọ ete: “Mbre Olympic emi kpukpru nnyịn idide mi anam mme owo ke ofụri ererimbot ẹdiana kiet. Ntre yak ikop inem mbre Olympic emi anamde mme owo ke ofụri ererimbot ediana kiet mi, kpa ye oro itode nsio nsio idụt.”

 Ndi Olympic ekeme ndinen̄ede nnam mme owo ẹdiana kiet? Ndi oyodu ini emi ididianade kiet inyụn̄ idu ke ata emem?

 Olympic isua emi iban̄ake mbre mbuba kpọt. Nsio nsio mbre oro ẹbrede anam ikụt mme mfịna oro ẹkade iso ke ofụri ererimbot emi mîyakke mme owo ẹdiana kiet. Mme mfịna emi ẹsịne mme unen oro owo enyenede ndinam n̄kpọ, ndisari owo ke ntak ebiet emi enye otode, ke ntak ido ukpono emi enye akade, m̀mê owo ndikere ke imọ imedi n̄kpọ ikan mbon en̄wen.

 Mme mbre mbuba oro ẹsibrede ke ofụri ererimbot utọ nte Olympic ẹsinam mme owo ẹnyene se ẹdade ẹnọ idem inemesịt. Edi mme mbre mbuba emi ẹsinam ẹkụt ke mme owo ẹnam n̄kpọ ẹnyụn̄ ẹkere n̄kpọ ke usụn̄ emi owụtde ke mmọ idianake kiet. Mme mbre emi ẹsinam mme owo ẹdọdiọn̄ ẹkere ẹnyụn̄ ẹnam n̄kpọ ntem utu ke ndikere m̀mê ndinam n̄kpọ ke usụn̄ emi edinamde emem ye edidianakiet odu.

 Bible ama etetịn̄ aban̄a eyo nnyịn emi ke mme owo ẹyenyene mme edu emi mîdiyakke mmọ ẹdiana kiet ye mbon en̄wen. (2 Timothy 3:1-5) Edieke oyomde ndidiọn̄ọ n̄kpọ en̄wen mban̄a profesi Bible emi, mbọk kot ibuotikọ emi “Did the Bible Predict the Way People Think and Act Today?”

 Bible anam inyene idotenyịn ke mme owo ke ofụri ererimbot ẹyediana kiet ẹnyụn̄ ẹdu ke ata emem. Enye ọn̄wọn̄ọ ke kpukpru owo ke isọn̄ ẹyediana kiet ke ukara eke heaven emi ẹkotde “obio ubọn̄ Abasi.”​—Luke 4:43; Matthew 6:10.

 Jesus Christ emi edide Edidem Obio Ubọn̄ oro ayanam emem odu ke ofụri isọn̄. Bible ọdọhọ ete:

•   “Edinen owo ayafiari . . . ndien ediwak emem oyodu.”​—Psalm 72:7.

•   “Enye ayanyan̄a ubuene emi esemede oyom un̄wam . . . Enye ayafak ukpọn̄ mmọ osio ke ufịk ye afai.”​—Psalm 72:12, 14.

 Idem ke eyo nnyịn emi, mme n̄kpọ oro Jesus ekesikpepde anam ediwak miliọn mme owo emi ẹtode idụt 239 ẹdiana kiet. Nte mme Christian, Mme Ntiense Jehovah ke ofụri ererimbot ẹkpep ndidu ke emem ye mbon en̄wen. Edieke oyomde ndidiọn̄ọ nte mmọ ẹsinamde emi, kot Enyọn̄-Ukpeme emi ibuotikọ edide “Se Idin̄wamde Nnyịn Itre Ndisua Owo.”