Ọkpọsọn̄ ntịme emi akade iso ke ofụri ererimbot ke ntak pọlitiks anam mme owo ẹdikama nsia ke ubọk.

•   Ke Mexico, ẹma ẹwot mbon pọlitiks 39 emi ẹkeyomde nditiene n̄ka ukara ndien akananam ibat mbon emi ẹwotde ke ntak election ke Mexico iwakke ntre. Se itetịn̄ emi, mme ntịme eken oro ẹkesịnde ke ini election 2023 ye 2024 ama anam nsia eyemede mme owo.

•   Ndondo emi, ntịme okpon etieti ke Europe ke ntak pọlitiks. Ke uwụtn̄kpọ, ẹma ẹdomo ndiwot adaibuot ukara Slovakia ke May 15, 2024.

•   Ke July 13, 2024, ẹma ẹdomo n̄ko ndiwot Donald Trump, akani adaibuot ukara United States. Se iketịbede emi anam idem enen̄ede akpa mbon United States.

 Nso inam ntịme okpon ntem ke ntak pọlitiks? Ndi ntịme emi eyetre? Nso ke Bible etịn̄?

 Bible ama etetịn̄ ke eyo nnyịn emi, emi ẹdiọn̄ọde nte mme akpatre usen, ke mme owo ẹyenyene nsio nsio edu emi ẹdinamde ntịme ye afai enen̄ede odu.

•   ‘Ndiọkeyo emi ọsọn̄de ndiyọ oyodu ke mme akpatre usen. Koro mme owo ẹyenana esịtekọm, inyeneke nsọn̄ọnda, inyịmeke ndidụk ediomi ekededi, ẹtie obom obom, ẹdi mme andida owo nnọ, ẹsọn̄ ibuot, ẹkohode idem.’​—2 Timothy 3:1-4.

 Bible ama etetịn̄ n̄ko ke iyokop iban̄a ndutịme, utọ nte mme owo ndisọn̄ ibuot nnyụn̄ nsịn ntịme ye ukara ke eyo nnyịn emi. (Luke 21:9) Edi, ntịme ye ofụri ubahade emi ididịghe ke nsinsi.

 Bible etịn̄ ke Abasi oyosobo kpukpru ukara owo efep onyụn̄ emen ukara esie eke heaven edi.

•   ‘Abasi enyọn̄ oyowụk obio ubọn̄ emi edinuakde onyụn̄ osobo kpukpru mme obio ubọn̄ eken, ndien enye ayada ke nsinsi.’​—Daniel 2:44.

 Obio Ubọn̄ Abasi eyenen̄ede anam mme owo ẹdiana kiet onyụn̄ anam emem odu ke ofụri ererimbot.

•   Ẹkot Jesus Christ, emi edide Edidem Obio Ubọn̄ Abasi, “Ọbọn̄ Emem,” ntre enye oyokụt ete ke emem odu ke isọn̄ emi inyụn̄ ‘inyeneke utịt.’​—Isaiah 9:6, 7.

•   Idem idahaemi, mbon emi ẹdidude ke Obio Ubọn̄ Abasi ke ẹkpep nte mmọ ẹkpedude ke emem. Oro anam Bible ọdọhọ ete: “Mmọ ẹyeda akan̄kan̄ mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ eto. Idụt idimenke akan̄kan̄ itiene idụt, mmọ idinyụn̄ ikpepke aba ekọn̄.”​—Isaiah 2:3, 4.

 Edieke oyomde ndidiọn̄ọ n̄kpọ en̄wen mban̄a se inemede emi, mbọk kot ibuotikọ emi “Nso ke Obio Ubọn̄ Abasi Edinam?” nyụn̄ se vidio emi Nso Idi Obio Ubọn̄ Abasi?