Nso ke Bible Etịn̄ Aban̄a Nte Udia Ananade Mfịn?
“Udia eyekem kpukpru owo.” Se mme andikara ererimbot emi ẹduakde ndinam nnọ kpukpru owo edi oro. Ndinọ kpukpru owo udia. a Edi, ndi oyodu ini emi mme owo mîdisitiehe biọn̄ aba? Nso ke Bible etịn̄?
Bible ama etetịn̄ ke udia idikemke mme owo ubọk ke eyo nnyịn emi
Bible ama etịn̄ ke udia idikemke mme owo ubọk idahaemi, enye okokot eyo nnyịn emi “mme akpatre usen.” (2 Timothy 3:1) Idịghe Abasi edi ntak emi udia mîkemke mme owo ubọk, edi Enye ama ebebem iso etịn̄ ke n̄kpọ emi eyetịbe. (James 1:13) Se mme prọfesi Bible iba oro ẹwụtde oro mi.
‘Akan̄ . . . oyodu ke nsio nsio ebiet.’ (Matthew 24:7) Prọfesi emi ama etetịn̄ ke akan̄ oyodu ke nsio nsio ebiet. Mbon oro ẹsikpepde nte ẹsinamde udia ye nte ẹsimende udia ẹka nsio nsio itie ẹdọhọ ẹte: “Akan̄ okpon etieti ke ererimbot emi, ndien edi eyo esiere nti udia anana. Ekpri se idude ikam ikemke-kem mme owo.” b Ediwak miliọn owo ke nsio nsio idụt ikemeke ndinyene udia emi mmọ ẹyomde, ndien emi esinam ediwak mmọ ẹkpan̄a.
“Sese! obubịt enan̄-mbakara ọwọrọ edi; ndien andidoro enye ke edem akama udomon̄kpọ ke ubọk.” (Ediyarade 6:5) Ke prọfesi oro, enan̄-mbakara oro ye andiwat enye ẹda ẹban̄a akan̄ ke mme akpatre usen emi. c Udomon̄kpọ oro awat enan̄-mbakara oro akamade owụt nte edidomode-domo udia inọ mme owo, ndien udia idinyụn̄ ikemke mme owo. Nte awat enan̄-mbakara emi awatde, uyo owo ke ọdọhọ ke ekọmurua n̄kpọudia eyenen̄ede ọdọk, ntre yak mme owo ẹkûbaha udia. (Ediyarade 6:6) Emi owụt se inam udia anana mfịn ke ofụri ererimbot, ndien ediwak biliọn owo inyụn̄ ikemeke ndinyene nti udia.
Se edinamde man akan̄ etre
Mme anam-ndụn̄ọde ẹdọhọ ke udia emi odude ke ererimbot nnyịn emi awak ekem se kpukpru owo ẹdia. Ntre, nso inam ndien udia okûkem owo ubọk? Bible onyụn̄ ọdọhọ ke Jehovah, d emi okobotde nnyịn edinam nso man etre mfịna emi?
Mfịna: Ukara owo ikemeke nditre ubuene ye mme n̄kpọ eken oro ẹsinamde mme owo ẹtie biọn̄.
Se Abasi edinamde man mfịna oro etre: Obio Ubọn̄ Abasi ayada itie ukara owo. (Daniel 2:44; Matthew 6:10) Mfịn, ediwak owo emi ẹdide ubuene isikemeke ndidep udia ndia, edi iditiehe ntre ke Obio Ubọn̄ Abasi. Kop se Bible etịn̄de aban̄a Jesus Christ, emi edide Edidem Obio Ubọn̄ oro: “Enye ayanyan̄a ubuene emi esemede oyom un̄wam, ye owo ukụt ye owo ekededi emi mînyeneke andin̄wam. . . . Uwak n̄kpasịp ẹyedu ke isọn̄; ọyọyọhọ ọduọhọ ke mme enyọn̄ obot.”—Psalm 72:12, 16.
Mfịna: Ekọn̄ esibiat n̄kpọ, onyụn̄ esinam n̄kpọ ọsọn̄. Ndien emi esinam udia idụhe se mme owo ẹdiade.
Se Abasi edinamde man mfịna oro etre: “[Jehovah] amanam ekọn̄ etre tutu esịm utịt isọn̄. Obụn̄ utịgha onyụn̄ okpok eduat n̄ken̄e n̄ken̄e; ọfọp mme chariot ekọn̄ ke ikan̄.” (Psalm 46:9) Abasi ayabiat n̄kpọekọn̄, onyụn̄ osobo kpukpru mbon oro ẹsin̄wanade ekọn̄ ẹfep. Emi ayanam udia ekem owo ubọk. Kop se Bible etịn̄de mi: “Edinen owo ayafiari, ndien ediwak emem oyodu.”—Psalm 72:7.
Mfịna: Ọkpọsọn̄ ufiop, mmọn̄ nditọ mmen obio ye mme n̄kpọ ntre esiwot mme unam ye n̄kpọ-in̄wan̄.
Se Abasi edinamde man mfịna oro etre: Abasi idiyakke mme n̄kpọ oro Enye okobotde abiat n̄kpọ aba, ndien emi ayanam n̄kpọ-in̄wan̄ esehe onyụn̄ eye idem. Bible ọdọhọ ete: “[Jehovah] anam oyobio odobo, man mbufụt inyan̄ odobo ana. . . . Enye anam wilderness akabade n̄kpọdiọhọ mmọn̄, onyụn̄ anam edisat ebiet akabade idịm mmọn̄. Ndien enye anam mbon ọbiọn̄ ẹdụn̄ do. . . Ndien mmọ ẹsuan n̄kpasịp ke in̄wan̄ ẹnyụn̄ ẹtọ in̄wan̄ vine, man mmọ ẹn̄wụm nti mbun̄wụm.”—Psalm 107:29, 35-37.
Mfịna: Mbon ibụk oro ẹmade ediwak udori ẹsinam udia oro mîfọnke owo ke idem, mîdịghe iyakke udia oro esịm ediwak owo.
Se Abasi edinamde man mfịna oro etre: Obio Ubọn̄ Abasi oyosobo kpukpru mbon oro mînamke akpanikọ ye mme idiọkowo ẹfep. (Psalm 37:10, 11; Isaiah 61:8) Bible ọdọhọ ke Jehovah Abasi edi “Enye emi ekpede ikpe mmọ eke ẹtụkde, Enye emi ọnọde mbon ọbiọn̄ udia.”—Psalm 146:7.
Mfịna: Ẹkpebahade udia oro odude ke ererimbot ke itie ita, ẹsidọduọn̄ọ mbahade kiet kpukpru isua.
Se Abasi edinamde man mfịna oro etre: Ke Obio Ubọn̄ Abasi, owo idibahake udia. Ini Jesus okodude mi ke isọn̄, enye ama okụt ete ke owo ibahake udia. Ke uwụtn̄kpọ, isan̄ kiet enye ama ọnọ se ibede owo 5,000 udia ke utịbe utịbe usụn̄. Ekem enye ama ọdọhọ mme mbet esie ete: “Ẹtan̄ mben̄e emi ẹsụhọde ẹbon ọtọkiet, man n̄kpọ ndomokiet okûtak.”—John 6:5-13.
Obio Ubọn̄ Abasi eyetre kpukpru se isinamde biọn̄ odu, ntre kpukpru owo eyenyene nti udia emi edikemde mmọ se ẹdia. (Isaiah 25:6) Edieke oyomde ndidiọn̄ọ ini emi Abasi edinamde se Enye etịn̄de emi, kot ibuotikọ emi “Ini Ewe ke Obio Ubọn̄ Abasi Edikara Isọn̄ Emi?”
a Se mbon United Nations ẹken̄wọn̄ọde ke 2015, man udia ekeme ndikem mme owo ubọk ke 2030.
b Se mbon Food and Agriculture Organization of the United Nations, mbon International Fund for Agricultural Development, mbon United Nations Children’s Fund, mbon United Nations World Food Programme, ye mbon World Health Organization ẹketịn̄de.
c Edieke oyomde ndinen̄ede ndiọn̄ọ mme awat enan̄-mbakara inan̄ oro n̄wed Ediyarade etịn̄de, kot ibuotikọ emi “Mmanie Ẹdi Mme Awat Enan̄-Mbakara Inan̄?”
d Jehovah edi ata enyịn̄ Abasi. (Psalm 83:18) Kot ibuotikọ emi “Anie Edi Jehovah?”
Ekeme Ndidi Ayama Mmọ Emi N̄ko
BIBLE EKEME NDIBỌRỌ MBỤME FO
Nso Idi Idiọn̄ọ “Mme Akpatre Usen,” M̀mê “Utịt Ini”?
Bible ama etetịn̄ mme n̄kpọ oro ẹdiwụtde ke idu ke mme akpatre usen.
MME IBUOTIKỌ EN̄WEN
Ndi Enyene Ini Emi N̄kpọ Edifọnde ye Kpukpru Owo Ukem Ukem?
Enyene ukara emi edinamde n̄kpọ ọfọn ama ke ofụri isọn̄. Ukara oro ayanam mme owo ibueneke aba inyụn̄ ikereke m̀mê iyenyene se ididade idu uwem.
ENYỌN̄-UKPEME
Mmanie Ẹdi Mme Awat Enan̄-Mbakara Inan̄?
Se nte ekemede ndifiọk se n̄kukụt emi ọwọrọde.
ESSENTIAL BIBLE TEACHINGS
Nso Idi Obio Ubọn̄ Abasi?
Ini Jesus okodude mi ke isọn̄, enye ama esima ndikwọrọ mban̄a Obio Ubọn̄ Abasi. Mme owo ẹsima ndibọn̄ akam ẹte Obio Ubọn̄ oro edi.
