Agostinho emi odụn̄de ke Brazil ọdọhọ ete: “N̄kokpon ke in̄wan̄. Ima ibuene etieti. Akana ntre n̄wed n̄kanam utom man n̄n̄wam ubon nnyịn.” Ekedi Agostinho esesịm isua 33, enye ọdiọn̄ọ ndikot n̄wed nnyụn̄ n̄wet n̄kpọ. Enye ọdọhọ ete: “Ndidiọn̄ọ ndikot n̄wed nnyụn̄ n̄wet n̄kpọ ama anam ẹnen̄ede ẹkpono mi onyụn̄ anam nnen̄ede n̄kụt ke mmedi n̄kpọ.”

Ke ufan̄ isua 70 emi ebede, Mme Ntiense Jehovah ẹkpep se ibede owo 250,000 ndikot n̄wed nnyụn̄ n̄wet n̄kpọ. Agostinho esịne ke otu oro. Nso isinam Mme Ntiense Jehovah ẹkpep mme owo ndikot n̄wed nnyụn̄ n̄wet n̄kpọ? Didie ke oro an̄wam mme owo?

Mme Ntiense Jehovah ẹkekwọrọ ikọ ke idụt 115 ke 1935. Man mme isụn̄utom ẹkeme ndinam mbon emi ẹkesemde nsio nsio usem ẹkop Ikọ Abasi, mmọ ẹma ẹsibre utịn̄ikọ emi ẹkekabarede ke usem mmọ ẹnọ mmọ. Ndusụk ini mmọ ẹma ẹsinọ mme owo n̄wed ke mme usem oro. Kpa ye oro ediwak owo ẹkemade Bible, ama ọsọn̄ ndusụk mmọ ndikpep Bible sia mmọ ikọdiọn̄ọke ndikot n̄wed nnyụn̄ n̄wet n̄kpọ.

Sia mme owo mîkekemeke ndikot Bible ke idemmọ, ama ọsọn̄ mmọ ndidiọn̄ọ nte ẹkpenamde se Bible etịn̄de. (Joshua 1:8; Psalm 1:2, 3) Ama onyụn̄ ọsọn̄ mmọ ndinam se akpanade Christian anam. Ke uwụtn̄kpọ, edieke ete ye eka mîkekemeke ndikot n̄wed, edinenen̄ede isọn̄ mmọ ndikpep nditọ mmọ se idude ke Bible. (Deuteronomy 6:6, 7) Edinyụn̄ isọsọn̄ mbufa Mme Ntiense Jehovah emi mîkekemeke ndikot n̄wed ndinen̄ede mfiọk ndida Bible n̄kpep mme owo n̄kpọ.

Ọtọn̄ọde ke n̄kpọ nte 1940 tutu esịm 1950 ebe, Nathan H. Knorr ye Milton G. Henschel emi ẹketienede ẹda usụn̄ ke utom Mme Ntiense Jehovah ẹma ẹka nsio nsio idụt ẹken̄wam nditọete ẹdiọn̄ọ nte ẹkpenen̄erede ẹkwọrọ ikọ. Ke mme idụt emi ediwak owo mîkekemeke ndikot n̄wed nnyụn̄ n̄wet n̄kpọ, mmọ ẹma ẹdọhọ n̄kọk itieutom ẹdọhọ mme esop ẹtọn̄ọ ndikpep mme owo ndikot n̄wed nnyụn̄ n̄wet n̄kpọ.

N̄kọk itieutom ẹma ẹwet ẹdọhọ mme esop nte ẹdisan̄ade ẹkpep. Ke ndusụk idụt, ukara ẹma ẹnyenyene mme n̄wed ye mme usụn̄ emi mmọ ẹkesidade ẹkpep mme owo ndikot n̄wed nnyụn̄ n̄wet n̄kpọ. Mme Ntiense Jehovah ẹma ẹnyụn̄ ẹda mme n̄wed ye mme usụn̄ oro ẹkpep mme owo. Idụt kiet ntre ekedi Brazil. N̄kọk itieutom ẹma ẹbọ ukara mme n̄wed ye mme n̄kpọ eken emi ẹsidade ẹkpep n̄kpọ ẹnyụn̄ ẹnọ ẹsọk mme esop. Ke mme idụt efen, Mme Ntiense Jehovah ẹma ẹsio mme n̄wed ye mme usụn̄ ndida n̄kpep nte ẹkotde n̄wed ẹnyụn̄ ẹwetde n̄kpọ.

Ẹkekpep ikpọ owo ye nditọwọn̄, irenowo ye iban. Ẹkenịm ufọkn̄wed emi man ẹkpep mme owo ndikot n̄wed ke usem emana mmọ. Ekpededi usem emana mme owo ama awak ke esop emi ẹkenịmde ufọkn̄wed oro, ẹma ẹsinịm ke kpukpru mme usem oro.

Didie ke ufọkn̄wed emi an̄wam mme owo? Ntiense Jehovah kiet ke Mexico ọdọhọ ete: “Se Bible etịn̄de an̄wan̄a mi idahaemi, oro anam Ikọ Abasi odụk mi esịt. Sia mma ndiọn̄ọ ndikot n̄wed, idem isinyekke mi ndineme nneme ye mme mbọhọidụn̄ mi, oro onyụn̄ anam n̄keme ndikwọrọ ikọ nnọ ata ediwak owo.”

Ufọkn̄wed emi anam Bible enen̄ede an̄wan̄a mme owo, edi idịghe n̄kukụre ufọn emi enye anamde edi oro. Isaac emi otode Burundi ọdọhọ ete: “Ami ndidiọn̄ọ ndikot n̄wed nnyụn̄ n̄wet n̄kpọ an̄wam mi nnen̄ede ndiọn̄ọ utom ubọpn̄kpọ. Ubọkutom mi edidi oro idahaemi. Mmonyụn̄ nnyene ikpọ ikpọ utom ubọpn̄kpọ emi nsede enyịn.”

Jesusa emi otode Peru ekedi isua 49 ini enye ọtọn̄ọde ufọkn̄wed oro. Enye ọdọhọ ete: “Sia ndide n̄wan ufọkndọ, ọfọn ndion̄ọ enyịn̄ n̄kpọ emi nyomde ndidep ye urua emi ẹwetde ẹdian do. Akpa akpa, ama esisọn̄ mi. Ufọkn̄wed emi an̄wam mi tutu. Idahaemi mma n̄ka ndidep n̄kpọ nnọ ubon mi, idem isinyekke mi.”

Ke ediwak isua idahaemi, ikpọ owo ukara ke nsio nsio idụt ẹtoro Mme Ntiense Jehovah nte mmọ ẹkpepde mme owo ndikot n̄wed nnyụn̄ n̄wet n̄kpọ. Mme Ntiense Jehovah ke ẹka iso ndinịm ufọkn̄wed emi. Ke ini ke ini, mmọ ẹsinyụn̄ ẹkpụhọ mme usụn̄ ye mme n̄kpọ emi mmọ ẹdade ẹnịm ufọkn̄wed emi. Mmọ ẹwet ẹnyụn̄ ẹmịn̄ n̄kpọ nte n̄kpri n̄wed miliọn 224 ke usem 720 ẹda ẹkpep mme owo ndikot n̄wed nnyụn̄ n̄wet n̄kpọ. Mme n̄wed emi ẹn̄wam mbon oro mînen̄ekede idiọn̄ọ n̄wed. *