Mme Ntiense Jehovah ẹnam utom Abasi ẹnyụn̄ ẹn̄wam mme owo ẹbe idụt 200. Edi idụt 35 kpọt ke otu idụt emi ẹnyene okụk ekem ndida nnam utom Abasi ke idụt mmọ. Ntre, mme idụt eken emi mînyeneke okụk ikem ndida nnam utom Abasi ke idụt mmọ ẹsida m̀mọ̀n̄ okụk ẹnam utom Abasi?

 Otu Emi Ẹsede Ẹban̄a Utom Mme Ntiense Jehovah ẹsidụn̄ọde ẹfiọk se Mme Ntiense Jehovah ke ofụri ererimbot ẹyomde man ẹkeme ndika iso nnam utom Abasi ke ofụri ererimbot. Mmọ ẹsitịn̄ enyịn ẹbiere m̀mê okụk ifan̄ ke ẹkpebiat ye nte ẹdibiatde okụk. Edieke okụk emi nditọete ẹtịpde ke idụt kiet ẹte ẹda ẹnam utom Abasi ọyọhọde osụhọ, mmọ ẹsinam ẹnọ nyọhọ-nsụhọ oro ẹsọk idụt emi mînyeneke. Emi onyụn̄ etie nte se mme Christian eyo mme apostle ẹkesinamde. (2 Corinth 8:14) Mmọ ẹma ẹsida “nyọhọ-nsụhọ mmọ” ẹn̄wam nditọete mmọ emi mîkenyeneke n̄kpọ.

 Esitie didie nditọete nnyịn ke ini ẹdade okụk emi nditọete ẹtịpde ke idụt en̄wen ẹn̄wam mmọ ntem? Yak ida Tanzania ke uwụtn̄kpọ. Se ibede mbahade iba ke otu mbon idụt oro isinyeneke isịm ekpat naira itiaita ke usen. Okụk emi nditọete ẹketịpde ke idụt en̄wen ke ẹkeda ẹdiọn̄ Ufọkmbono Obio Ubọn̄ emi Esop Mafinga ẹsitiede ẹkpono Abasi. Esop oro ẹkewet ẹte: “Mme owo ẹsiwak etieti ke mbono esop nnyịn tọn̄ọ ẹkediọn̄ Ufọkmbono Obio Ubọn̄ nnyịn! Imọkọm esop Jehovah ye nditọete nnyịn ke ofụri ererimbot ke enọ imaesịt mmọ, emi anamde nnyịn inyene ediye itie emi isitiede ikpono Abasi.”

 Ndusụk nditọete nnyịn ke Sri Lanka inyeneke udia idia ke ntak COVID-19. Imara Fernando ye ekpri eyen esie, Enosh, ikenyeneke udia idia. Edi ẹma ẹda okụk emi nditọete ẹketịpde ke mme idụt en̄wen ẹn̄wam mmọ. Kop se mmọ ẹkewetde mi ke kad ẹnọ esọk nnyịn: “Imọkọm nditọete emi ẹmade nnyịn utọ ima emi ke ini afanikọn̄ emi. Esịt enen̄ede enem nnyịn ndidi nditọeka mbufo. Jehovah akpakam aka iso an̄wam kpukpru nditọete nnyịn ke mme akpatre usen emi.”

 Esịt esinenem nditọete nnyịn ndibuana se mmọ ẹnyenede ye kiet eken inamke n̄kpọ m̀mê mmọ ẹdu ke m̀mọ̀n̄ m̀mê ẹnyụn̄ ẹto ewe idụt. Ke uwụtn̄kpọ, Enosh ama anam ekpri ekebe esisịn okụk do man ọkpọnọ ẹda ẹn̄wam mbon emi mînyeneke okụk. Guadalupe Álvarez emi odụn̄de ke Mexico esinyụn̄ ọnọ se enye ekemede ẹte ẹda ẹn̄wam nditọete. Idịghe nte mme owo ẹnyenyene okụk ke obio mmọ; ediwak owo inyeneke okụk. Kpa ye oro, enye esinọ se enye ekemede ẹte ẹda ẹn̄wam nditọete. Kop se enye etịn̄de mi: “Mmọkọm Jehovah ke mfọn ye ima esie. Mmọdiọn̄ọ ke ẹma ẹda ekpri se nnọde emi ẹsịn ye eke mbon en̄wen, ke oyosụk ekem se ẹdade ẹn̄wam nditọete mi.”

 Esịt esinen̄ede enem nditọete nnyịn ke nsio nsio idụt ndinọ okụk yak ẹda ẹn̄wam nditọete ke idụt en̄wen. Anthony Carvalho emi edide owo kọmiti n̄kọk itieutom nnyịn ke Brazil ọdọhọ ete: “Ke ediwak isua, mme idụt en̄wen ẹkesinọ okụk ẹda ẹn̄wam nnyịn inam utom Abasi ke idụt nnyịn. Emi ama anam ediwak owo ẹdụk esop Abasi. Idahaemi, n̄kpọ afiak ọfọn ke idụt nnyịn, ntre nnyịn imesitiene in̄wam nditọete ke mme idụt en̄wen. Nditọete nnyịn idaha utom ukwọrọikọ nte utom emi inamde ke idụt kiet kpọt, edi ẹda enye nte utom oro inamde ke ofụri ererimbot. Oro anam mmọ ẹsiwa idem ẹnam se ẹkemede ndin̄wam kiet eken nte Ọbọn̄ nnyịn Jesus oyomde mbet esie ẹnam.”

 Didie ke Mme Ntiense Jehovah ẹkpen̄wam nditọete mmọ emi mînyeneke n̄kpọ? Idịghe ndinọ okụk ẹsọk nsio nsio n̄kọk itieutom nnyịn ke ererimbot, edi ndisịn okụk oro ke ekebe “Worldwide Work” mîdịghe ẹsịn ke donate.pr418.com. Mbọk ẹsọsọn̄ọ etieti ke kpukpru enọ imaesịt mbufo.