Jesus ọkọdọhọ mme mbet esie ete: “Mbufo ẹyetie ntiense ẹban̄a mi . . . tutu esịm ata utịt ikpehe isọn̄.” (Utom 1:8) Mfịn, Mme Ntiense Jehovah ke ẹsịn idem ẹnam se Jesus eketịn̄de oro. Edi enyene mme itie ke ererimbot emi Mme Ntiense Jehovah mînen̄ekede ikwọrọ ikọ. Mme owo ke ndusụk itie oro ẹwak etieti, onyụn̄ enyene ndusụk idụt emi Mme Ntiense Jehovah mîwakke. (Matthew 9:​37, 38) Nso ke inam man ikwọrọ ikọ inọ adan̄a ediwak owo nte ikekeme?

 Man ẹkeme ndinam ewụhọ Jesus oro, Kọmiti Utom Otu Emi Ẹsede Ẹban̄a Utom Mme Ntiense Jehovah ẹnọ mme isụn̄utom emi mîdụn̄ke ke Bethel ẹka mme itie emi ẹnen̄erede ẹyom mme ọkwọrọikọ ke ofụri ererimbot. Ibat utọ mme isụn̄utom oro edi owo 3,090. a Ediwak mmọ ẹka ufọkn̄wed ukpep Bible, utọ nte Ufọkn̄wed Mme Ọkwọrọ Obio Ubọn̄. Mme isụn̄utom emi ẹsinyịme ndikpọn̄ idụt mmọ n̄ka idụt en̄wen n̄kodu nnam n̄kpọ Abasi. Nte mmọ ẹsọn̄de idem ke esop, ukpep emi mmọ ẹbọde, ye ifiọk emi mmọ ẹnyenede an̄wam mmọ ẹkeme ndikwọrọ ikọ ẹnyụn̄ ẹdi se mbufa mbet Christ ẹkpebede.

 Ke n̄kọk itieutom kiet kiet, Itieutom Emi Ẹsede Ẹban̄a Mme Esenyịn Circuit, Mme Akpan Asiakusụn̄, ye Mme Isụn̄utom ẹsidiana ye Kọmiti N̄kọk Itieutom ẹn̄wam mme isụn̄utom ẹnyene eti ufọk emi mîsọn̄ke urua ikaha, ẹbọ eti usọbọ, ẹnyụn̄ ẹnyene ekpri okụk ekpatọfọn̄ ẹda ẹse ẹban̄a idemmọ. Ke isua utom 2020, okụk emi Mme Ntiense Jehovah ẹkedade ẹse ẹban̄a mme isụn̄utom ama ebe biliọn naira kiet. Se ẹnamde ẹnọ mme isụn̄utom emi an̄wam mmọ ẹda ofụri odudu mmọ ẹkwọrọ ikọ, ẹsịn ofụri ekikere mmọ ke utom oro, ẹnyụn̄ ẹsọn̄ọ nditọete emi ẹdude ke esop mmọ idem.

 Didie ke mme isụn̄utom emi mîdụn̄ke ke Bethel ẹn̄wam ke utom ukwọrọikọ? Frank Madsen emi edide owo Kọmiti N̄kọk Itieutom Malawi ọdọhọ ete: “Uko ye ifiọk emi mmọ ẹnyenede an̄wam mme esop ẹkeme ndikwọrọ ikọ ke mme efakutom emi ẹkesisọn̄de mmọ ndikwọrọ, utọ nte mme efak emi ẹnyenede ikpọ gate ye mbon ukpeme, ye enye emi ẹsemde usem idụt en̄wen. N̄kpọ en̄wen edi ke mmọ ndisịn idem n̄kpep usem obio emi mmọ ẹdude ye nte ẹnamde n̄kpọ do an̄wam nditọete. Mmọ ẹnyụn̄ ẹnam ọdọn̄ mme uyen ndinam utom ofụri ini nnọ Abasi. Imọkọm Jehovah nte enye anamde inyene mme isụn̄utom oro.”

 Owo Kọmiti N̄kọk Itieutom idụt en̄wen ọdọhọ ete: “Nte mme isụn̄utom ẹdude uwem owụt ke ikọt Jehovah ke ofụri ererimbot ẹdi kiet. Idem mbon emi mîdịghe Mme Ntiense Jehovah ẹkụt ke nnyịn iyakke nte ẹnamde n̄kpọ ke edem nnyịn anam ikûdiana kiet. Mmọ ẹkụt ke nnyịn ndinam se Bible ekpepde anam idi kiet.”

 Didie ke mme isụn̄utom emi mîdụn̄ke ke Bethel ẹn̄wam nditọete ke esop mmọ? Paulo emi otode Timor-Leste ama mme isụn̄utom emi ẹkenọde ẹka esop mmọ. Enye ọdọhọ ete: “N̄kan̄ nnyịn emi esifiop tutu. Edi kpa ye emi mme isụn̄utom emi ẹtode ebiet emi enen̄erede ebịt, mmọ iyakke nte n̄kan̄ emi ofiopde akpan mmọ ndika ukwọrọikọ. Kpukpru usenubọk, mmọ ẹsitiene ẹkedụk mbono an̄wautom. Ndien ke ufọt uwemeyo emi edide esifiop etieti, mmesikụt mmọ ẹfiakde ẹkese mbon emi mmọ ẹkekwọrọde ikọ ẹnọ, mmọ ẹsinyụn̄ ẹka n̄ko ke mbubreyo. Mmọ ẹn̄wam ediwak owo ẹkpep akpanikọ, ami nsịne do. Mmọ ẹda ofụri uwem mmọ ẹsịn idem ẹnam n̄kpọ Jehovah, esinyụn̄ enenem mmọ. Oro an̄wam ofụri esop ẹtiene ẹsịn idem ẹnam n̄kpọ Jehovah.”

 Ketti emi edide asiakusụn̄ ofụri ini ke Malawi etịn̄ nte ebe ye n̄wan kiet emi ẹdide mme isụn̄utom ẹken̄wamde ubon mmimọ. Enye ọdọhọ ete: “Ini ẹkenọde ebe ye n̄wan emi ẹdide isụn̄utom ẹdi esop nnyịn, ami ikpọn̄ n̄kedi Ntiense Jehovah ke ubon nnyịn. Edi mmọ ẹma ẹnen̄ede ẹkpere ubon nnyịn ẹnyụn̄ ẹn̄wam mi. Eti uwụtn̄kpọ mmọ ama anam nditọ mi ẹkụt ke ndinam n̄kpọ Jehovah esinam owo okop inemesịt onyụn̄ anam uwem owo enyene ibuot. Eti uwem mme isụn̄utom oro anam nditọ mi iban ita ẹdidi mme asiakusụn̄ ofụri ini, ebe mi onyụn̄ ọtọn̄ọ ndidụk mbono esop.”

 Ẹsinam didie ẹnyene okụk ẹse ẹban̄a mme isụn̄utom emi mîdụn̄ke ke Bethel? Okụk emi ẹsitịpde man ẹda ẹnam utom Abasi ke ofụri ererimbot ke ẹsida ẹse ẹban̄a mmọ. Ndien ediwak owo ẹsika donate.pr418.com ẹketịp. Imenen̄ede ima nte mbufo ẹsitịpde okụk ke ofụri esịt.