Se ise m̀mê emenyịme se iyomde nditịn̄ emi: “Isua ifan̄ ko ke edem, nnyịn ikenyeneke mme n̄kpọ Ikọ Abasi ke Intanet nte inyenede idahaemi.” Brọda Geoffrey Jackson eketịn̄ ikọ oro ini enye ọsọn̄ọde nnyịn idem ke Se Otu Emi Ẹsede Ẹban̄a Utom Nnyịn Ẹnamde Idiọn̄ọ ke 2020​—Ọyọhọ 6. Enye ama ọdọhọ n̄ko ete: “Ikpanam didie inyene mme n̄kpọ Ikọ Abasi ke ini idiọk udọn̄ọ emi edieke JW Library mîkpodụhe? Ọwọrọ ke mme isua ifan̄ emi ebede, Jehovah ke eketịm nnyịn idem ọnọ utọ ini emi.”

 Didie ke Jehovah eketịm nnyịn idem? Nso ke ẹkenam man ikeme ndinyene app emi ẹkotde JW Library, ndien nso ke oyom ẹnam man enye aka iso enyene ufọn onyụn̄ ọfọn akan nte ekedide?

 Ke May 2013, Otu Emi Ẹsede Ẹban̄a Utom Nnyịn ẹma ẹdọhọ itieutom emi ẹkotde MEPS Programming ke ibuot itieutom nnyịn ẹnam app emi edinyenede Edikabade Eke Obufa Ererimbot eke 2013. Paul Willies emi anamde utom ye MEPS Programming ọdọhọ ete: “Akananam nnyịn ikenyeneke app ndomokiet ke app store ekededi. Edi ima imek mbon emi ẹdinamde utom oro, iyak utom ifan̄ inịm kan̄a, inyụn̄ idiana ye mme itieutom en̄wen inam app oro ye se idisịnede ke esịt. Ikesibọn̄ akam ke ubọk ke ubọk, ndien Jehovah ama an̄wam nnyịn. Ke ọfiọn̄ ition kpọt ebede, ẹma ẹsio app oro ke mbono ofụri isua Watch Tower Bible and Tract Society of Pennsylvania.”

 Utom en̄wen ekedi ndinam app oro akabade library emi ẹdọn̄de ediwak n̄wed ke ediwak usem. Etisịm January 2015, ata ediwak n̄wed nnyịn ke Ikọmbakara ẹma ẹdu ke app oro. Ke ọfiọn̄ itiokiet kpọt ebede, mme owo ẹma ẹkeme ndika do n̄kosion̄o mme n̄wed oro ke ata ediwak usem.

 Tọn̄ọ oro, nditọete nnyịn ẹnam app oro ọfọn akan nte ekedide. Mmọ ẹdọn̄ mme vidio, ẹdọn̄ kpukpru n̄wed, vidio, ye ikwọ mbono esop ke itie kiet. Mmọ ẹnam yak edi okpotụk ufan̄ikọ Bible, afo okụt se N̄wed Ndụn̄ọde etịn̄de aban̄a ufan̄ikọ oro.

 Ibat fon, tablet, m̀mê mme n̄kpọ ntre emi mme owo ẹsidade ẹkụbọde JW Library kpukpru usen ẹsisịm miliọn 8, ndien ke ọfiọn̄ kiet ẹsibe miliọn 15! Nso ke oyom ẹnam man edi ẹma ẹtotụk enye, enye okụbọde inyụn̄ inọhọ owo mfịna? Brọda Willies ọdọhọ ete: “Isidịghe ẹma ẹnanam app ẹma, utom okụre. Ke inam n̄kpọ man ikeme ndidọn̄ mbufa n̄kpọ inyụn̄ inam enye enen̄ede enyene ufọn onyụn̄ emem mme owo utom ndida enye nnam n̄kpọ. Sia mme kọmpeni emi ẹsinamde fon, tablet, ye mme n̄kpọ ntre ẹsiwakde ndikpụhọde n̄kpọ ke mme n̄kpọ oro, nnyịn n̄ko imesidi anam anam nnyịn ikpụhọde n̄kpọ ke JW Library man ẹkpetụk enye ke fon, tablet, m̀mê mme n̄kpọ ntre, enye osụk okụbọde inyụn̄ inọhọ owo mfịna. N̄kpọ efen edi ke ana ikụt ite ke imaka iso inam utom ke JW Library man ẹkeme ndisụk mbre, n̄kot, mîdịghe n̄kpan̄ utọn̄ n̄kop se ima ikododu, inyụn̄ inam enye afiak okpon ekem se ẹdọn̄de mbufa n̄wed, vidio, ikwọ, ye mme n̄kpọ eken.” Ẹkpemen kpukpru n̄wed emi ẹdude ke nsio nsio usem ke JW Library ẹtọ ẹdian kiet, ẹsịm n̄kpọ nte 200,000. Ẹkpemen vidio, ikwọ, ye mme n̄kpọ ntre emi ẹdude ke nsio nsio usem ke JW Library ẹtọ ẹdian kiet, ẹbe 600,000!

 Man ika iso inam kpukpru se isụk itịn̄de oro ke app emi, idịghe kọmputa ikpọn̄ ke ẹsiyom. Enyene ndusụk ndutịm kọmputa emi anade ikpekpe okụk inọ mme andinyene man ẹyak ida inam se iyomde ndinam. Enyene ndutịm kọmputa kiet isikpede ₦621,000 kpukpru isua. N̄kpọ en̄wen edi ke okụk emi MEPS Programming ẹsibiatde kpukpru isua ẹdep mbufa kọmputa, tablet, ye fon ẹto nsio nsio kọmpeni emi ẹnamde mmọ ẹsibe ₦4,000,000. Ẹsideme mbufa n̄kpọ oro man ẹkụt ẹte ke mbon emi ẹnyenede utọ n̄kpọ oro ẹkpekụbọde JW Library, idinọhọ mmọ mfịna.

 JW Library anam ibat okụk emi ẹsidade ẹmịn̄ n̄wed ẹnyụn̄ ẹnọde aka nsio nsio itie ẹnen̄ede osụhọde. Ẹyak ida Ẹdụn̄ọde N̄wed Abasi ke Usen ke Usen inọ uwụtn̄kpọ. Ibat Ẹdụn̄ọde eke 2013 emi ikemịn̄de ama ekpere ndisịm miliọn 12. Edi eke 2020, ikemịn̄ n̄kpọ nte miliọn ition kpọt kpa ye edide ima inyene mbufa asuanetop 700,000 idian ke ibat mme asuanetop emi ẹma ẹkedodu ke ofụri ererimbot. Se ikanamde ibat n̄wed oro osụhọde ntre edi ke ediwak nditọete nnyịn ẹdikama JW Library a ẹkot text idahaemi.

 Owo ikemeke ndibat usụn̄ emi JW Library an̄wamde mme owo. Geneviève emi odụn̄de ke Canada ọdọhọ ke imọ imawak ndikpep n̄kpọ idahaemi ke ntak app emi. Enye ọdọhọ ete: “Ntịn̄ akpanikọ, ekpedi esidi mma nyom ndikpep n̄kpọ ami nsan̄a ntan̄ kpukpru n̄wed ndidade n̄kpep n̄kpọ, n̄kereke ke n̄kpesikpep n̄kpọ kpukpru usenubọk. Edi mma mmemen tablet mi n̄kụbọde app oro, kpukpru se nyoyom ẹdọn̄ọ do. Ndikpep n̄kpọ kpukpru usen ntem anam nnen̄ede mbuọt idem ye Jehovah nnyụn̄ nnen̄ede n̄kpere enye.”

 App emi enen̄ede an̄wam ke ini udọn̄ọ COVID-19. Charlyn emi otode United States ọdọhọ ete: “Ke ntak udọn̄ọ COVID-19 omụmde ofụri ererimbot, mbọhọ obufa n̄wed nnyịn ndomokiet emi ẹmịn̄de-mịn̄ ke se ibede isua kiet. Edi JW Library an̄wam nnyịn inyene se idin̄wamde nnyịn ika iso ibuọt idem ye Jehovah. Mmọkọm Jehovah ke utọ eti enọ emi.”

 Faye emi odụn̄de ke Philippines etịn̄ se isịnede ediwak owo ke esịt ete: “Se idude ke app emi an̄wam mi nnen̄ede n̄kpere Jehovah. Akpa n̄kpọ nsinamde mma ndemede usenubọk esidi ndika do n̄koyom n̄kpọ n̄kot. Ini nsụk nnamde n̄kpọ, mmesibre n̄kpọ do n̄kop. Nsida enye ntịm idem nnọ mbono esop. Mma nyom ndikekpep owo Bible, mmesida enye ntịm idem. N̄kpenyene ufan̄, mmesibre vidio do nse. Ekpedi nda mbet n̄kpọ, mmesikụbọde n̄kpọ m̀mê Bible do n̄kot. Idụhe se ẹmende ẹdomo ye enye.”

 App emi esin̄wam n̄ko ini ikwọrọde ikọ. Ke uwụtn̄kpọ, ini sista kiet ke Cameroon okosụk ọkwọrọde ikọ, enye ama oyom ndikot itie Bible emi sista en̄wen okokotde ọnọ owo urua ifan̄ ke edem. Edi enye iketịghi aba ebiet emi ufan̄ikọ oro okodude ke Bible. Enye ọdọhọ ete: “Se ifọnde ekedi ke mma nti ikọ kiet ke ufan̄ikọ oro. Mma n̄kụbọde Bible ke JW Library n̄kataip ikọ oro. Inikiet inikiet, itie Bible oro ama ọwọrọ edi. App emi an̄wam mi n̄kụt ata ediwak ufan̄ikọ Bible emi nsifrede ndusụk ini.”

 Nte ẹsikade donate.pr418.com ẹkeda nsio nsio usụn̄ emi ẹdude do ẹsio esịt ẹtịp n̄kpọ akanam ẹkeme ndisio app emi, anam ẹnam enye enen̄ede enyene ufọn ọnọ nditọete, ẹnyụn̄ ẹnam enye enen̄ede ọfọn akan nte ekedide. Mbọk ẹsọsọn̄ọ nte ẹsitatde ubọk ẹtịp n̄kpọ.

1. October 2013​—Ẹsio app emi ndien enye asan̄a ye Edikabade Eke Obufa Ererimbot eke 2013

2. January 2015​—Ẹdọn̄ mme n̄wed eken ke Ikọmbakara, ekem ẹdọn̄ mme n̄wed ke ediwak usem en̄wen

3. November 2015​—Ẹnam ẹkeme ndisịn kọlọ ke ikọ

4. May 2016​—Ẹsịn ebiet emi edide okpotụk enye emen fi aka se ẹdinamde ke mbono esop

5. May 2017​—Ẹnam ẹkeme ndiwet n̄kpọ ndọn̄ ke app oro

6. December 2017​—Ẹdọn̄ mbufa n̄kpọ ke Study Bible

7. March 2019​—Ẹnam ẹkeme ndikosion̄o mme n̄kpọ emi ẹkopde uyo uyo, ẹkeme ndida do nse vidio, ẹnyụn̄ ẹnam yak edi okpotụk ufan̄ikọ Bible afo okụt se N̄wed Ndụn̄ọde etịn̄de aban̄a itie oro

8. January 2021​—Ẹdọn̄ mme n̄kpọ emi ẹsan̄ade ye n̄wed Du Ata Uwem ke Nsinsi!