SE ẸSIDADE OKỤK ORO ỌNỌDE ẸNAM
Nte In̄wamde Nditọete Nnyịn ke Ofụri Ererimbot ke Ini Udọn̄ọ COVID-19
JULY 1, 2021
Ini Esop Emi Ẹsede Ẹban̄a Nsọn̄idem Ererimbot ẹkedọhọde ke March 2020 ke udọn̄ọ COVID-19 edi udọn̄ọ ofụri ererimbot, ediwak owo ikekereke ke isua kiet eyebe udọn̄ọ oro iduakke unyọn̄. Ke ntak udọn̄ọ oro, idem ediwak miliọn mme owo sịm Mme Ntiense Jehovah idịghe aba nte ekedide, okụk asat mmọ ke ubọk, editịmede esịt inyụn̄ idịghe ekpri. Mme Ntiense Jehovah ẹnam nso ẹn̄wam mme owo, ẹnyụn̄ ẹnam didie yak mme n̄kpọ oro ẹsịm mmọ ubọk ke ini udọn̄ọ emi?
Ẹn̄wam Mbon Emi Ẹyomde Un̄wam
Mme Kọmiti Unọ Un̄wam emi Kọmiti Mme Anam-Ndutịm Otu Emi Ẹsede Ẹban̄a Utom Mme Ntiense Jehovah ẹnamde ẹsiak ke nsio nsio itie ke ererimbot ke ntak udọn̄ọ COVID-19 ẹbe 950. Ke ndusụk itie, Mme Ntiense Jehovah emi ẹdude ke n̄kan̄ oro ke mbon kọmiti emi ẹda ẹn̄wam nditọete mmọ emi ẹdude do. Ke mme itie en̄wen, se ukara ẹnọde ke Mme Ntiense Jehovah ẹda ẹn̄wam idem. Mbon emi Mme Kọmiti Unọ Un̄wam ẹn̄wamde ẹwak etieti.
Yak ida se itịbede ke Paraguay inọ uwụtn̄kpọ. N̄wedmbụk n̄kpọntịbe kiet ọkọdọhọ ke “ata ediwak mbon Paraguay ke ẹkpa biọn̄ ke ufọk” ke ntak nsọn̄ọn̄kpọ emi COVID-19 adade edi. Edi ini ẹtịn̄de ikọ oro, Kọmiti Unọ Un̄wam ke Paraguay ẹma ẹtọtọn̄ọ ndinọ mme owo ekwo emi ẹdọn̄de se ẹdidade in̄wam idem ke urua iba. Udia ye se ẹdade ẹnam idem ye ufọk asana ke ẹkedọn̄ do. Se ẹkedọn̄de ke ekwo kiet kiet akakpa n̄kpọ nte ₦12,000.
Nso ke mbon Kọmiti Unọ Un̄wam emi ẹn̄wamde Mme Ntiense oro ẹsinam man mmọ ke idemmọ idimen udọn̄ọ COVID-19, idinyụn̄ inọ mbon en̄wen? Mmọ ẹsifụk ibuo ye inua inyụn̄ ikpereke mme owo ikaha. Mmọ ẹsikụt ẹte ke itie se kọmpeni emi ẹdọhọde ẹnọ nditọete udia ẹtiede ẹnam udia oro asana, ke mmọ ẹtiene kpukpru mbet man owo idisuan udọn̄ọ. Mmọ ẹsikụt n̄ko ẹte ke kpukpru mbon emi ẹdọn̄de n̄kpọ ke mme ekwo oro ẹfọrọ n̄kpọ ke ubọk, ẹfụk n̄kpọ ke ibuo ye inua, ẹsịne san̄asan̄a ọfọn̄idem emi mme anam utọ utom oro ẹkpesịnede, ẹnam moto mmọ asana, ẹkama ibọk emi ẹsidade ẹwot n̄kpri unam udọn̄ọ ẹkwọhọde moto oro, ẹnyụn̄ ẹbon mme ekwo oro ke itie emi ẹma ẹkeda ibọk oro ẹkwọhọde yak asana. Mbon emi ẹsimende mme ekwo oro ẹsọk nditọete isikpereke mmọ idem ikaha.
Owo Ibahake Okụk Emi Ẹtịpde
Ọtọn̄ọde ke akpa ini emi ẹketọn̄ọde ndin̄wam Mme Ntiense Jehovah ke ini udọn̄ọ COVID-19 emi tutu esịm January 2021, okụk emi Kọmiti Mme Anam-Ndutịm ẹkenyịmede ẹda ẹn̄wam mmọ ebe biliọn naira duop. Nditọete ke mme ọfis nnyịn ye mbon Kọmiti Unọ Un̄wam ibiatke okụk oro ntịme ntịme; mmọ ẹsida ini ẹyom itie emi ẹnyamde se ẹyomde ndidep yak ọfọn udep. Kop uwụtn̄kpọ kiet mi. Ke Chile, nditọete ke kọmiti oro ẹma ẹyom ndidep udia kiet emi ebietde ọkọti. Se mmọ ẹkeyomde ndidep ama awak; ekedi kilogram 750. Edi ke ufan̄ ọfiọn̄ kiet, udia oro ama ọdọk urua utịm ikaba akan se ẹkesinyamde! Kpa ye oro, nditọete oro ẹma ẹnyịme ndidep. Edi ke hour iba ama ekebe, anyam n̄kpọ oro ama ọdọhọ mmọ ke owo emi ama ekededep ukem udia oro ama emen ediyak ete ke imọ idepke aba. Ntre utu ke enye ndinyam enye emi akakpade enan̄ do nnọ nditọete, enye ama akabade anyam enye emi ekemende ediyak do ke akani urua emi ẹkenyamde ke ọfiọn̄ emi ekebede!
Edi nditọete oro ẹkeka ndimen udia oro, andinyam ama osio ndisi mfi efịp ete ke imọ idinyamke aba, ke mmọ ẹtiene mbon n̄ka en̄wen ẹmen udia ẹnọ mbon emi mmọ ẹmade kpọt. Brọda kiet ke otu mmọ ama ọsọsọp ọbọn̄ akam ke esịt, ekem ọdọhọ enye ke mbemiso mmimọ idide, ke ẹma ẹkot nditọete ke esop kiet kiet man ẹdiọn̄ọ mbon emi ẹkpen̄wamde. Nditọete oro ẹma ẹdọhọ enye n̄ko ke sia mbon emi ẹyomde ndin̄wam ẹtode nsio nsio itie, ke se ẹnọde ubon kiet oyokpụhọde ye se ẹnọde ubon en̄wen, ke ẹdinọ mmọ se idinen̄erede ifọn ye mmọ, n̄ko ke okụk emi Mme Ntiense Jehovah ẹdade ẹnam kpukpru oro edi enọ imaesịt, ke Mme Ntiense emi ẹnamde utom oro ẹnam ke mfọn n̄ko. Se anyam n̄kpọ oro okokopde ama enem enye. Enye ama enyịme ndien ndinyam ke akani urua oro. Ini nditọete oro ẹkeyomde ndifiak ndep udia oro, enye ama akam adian se iwakde isịm kilogram 400 ọnọ mmọ ke mfọn.
“Mmọ Ẹma Mbon Mmọ Ata Ima”
Akamba sista kiet emi ekerede Lusu odụn̄ ke Liberia ye mbonubon mmọ ition, onyụn̄ edi ebeakpa. Usenubọk usen kiet, nte mmọ ẹkesụk ẹdiade udia ẹnyụn̄ ẹkotde text usen oro, eyeyen esie emi edide isua itiaba ama akama enyịn ese ufọk onyụn̄ okụt ke udia isụhọke ndomo mben̄e. Enye ama obụp ete, “Ididia nso?” Lusu ama ọdọhọ enye ke imọ imọdọdọhọ Jehovah an̄wam mmimọ, ke imenịm ke enye ayan̄wam. Uwemeyo usen oro, mbiowo esop mme Lusu ẹma ẹkot enye ẹte edibọ udia. Enye ọdọhọ ete: “Eyeyen mi oro ọdọhọ ke idahaemi imọ imọdiọn̄ọ ke Jehovah esikop akam onyụn̄ ọbọrọ sia Jehovah ama ọbọrọ okịm.”
Ndise emi nditọwọn̄ ke Democratic Republic of Congo ẹkedrọde ẹda ẹkọm nditọete ke udia emi ẹkenọde mmọ
Enyene mma kiet ke Democratic Republic of Congo emi edide mbọhọidụn̄ ubon kiet emi ẹdide Mme Ntiense Jehovah. Ke enye ama okokụt nte Mme Ntiense Jehovah en̄wen ẹmende udia ẹsọk ubon oro, enye ama ọdọhọ ete, “Udọn̄ọ COVID-19 emi ama okụre, ididi Mme Ntiense Jehovah sia mmọ ẹse ẹban̄a mbon mmọ ke ini afanikọn̄ emi.” Ebe esie ama obụp enye ete, “Oyom ndidi Ntiense Jehovah ke ntak ekpat edesi kiet?” Enye ama ọdọhọ ete, “Ikam idịghe ke ntak oro, edi ekpat edesi kiet oro owụt ke mmọ ẹma mbon mmọ ata ima.”
Se ẹtatde ubọk ẹtịp anam Mme Ntiense Jehovah ẹkeme ndisọsọp n̄n̄wam nditọete mmọ ke ini udọn̄ọ emi esịmde ofụri ererimbot mi. Ẹmenam etieti nte ẹsikade donate.pr418.com ẹketịp okụk.