Kpukpru isua, ẹsikot mbon oro ẹnamde san̄asan̄a utom ofụri ini ẹnọ Abasi ke nsio nsio itie ke ererimbot ẹdidụk Ufọkn̄wed Gilead. Ẹsinịm ufọkn̄wed emi ke Patterson ke New York. a Ke ufọkn̄wed emi, ẹsikpep nditọete nte mmọ ẹkpetịmde ẹnam utom oro esop Abasi ẹnọde mmọ. Se ẹsikpepde mmọ esinam mmọ ẹkeme ndisọn̄ọ nditọete ke nsio nsio esop idem onyụn̄ an̄wam mmọ ẹkeme ndinam utom asan̄a ọfọn ke nsio nsio n̄kọk itieutom.

 Nditọ Ufọkn̄wed Gilead ẹsito nsio nsio idụt. Ke uwụtn̄kpọ, owo 56 ẹkedụk ọyọhọ klas 147 oro ẹkenịmde ke 2019, ndien mmọ ẹketo nsio nsio idụt 29. Mbon emi ẹsikotde ẹdi Ufọkn̄wed Gilead ẹdi mbon emi ẹnamde san̄asan̄a utom ofụri ini ẹnọ Abasi, utọ nte mbon Bethel, mme esenyịn circuit, mme isụn̄utom, m̀mê mme akpan asiakusụn̄.

 Ẹsibak ẹtọn̄ọ ndutịm mbemiso usen oro ufọkn̄wed emi editọn̄ọde. Ke uwụtn̄kpọ, Itieutom Emi Ẹsede Ẹban̄a Ukaisan̄ ke Ibuot Itieutom Nnyịn ẹsidep tiket ubomofụm ẹnọ kpukpru mbon oro ẹkotde ẹdi ufọkn̄wed emi. Ẹkebiat n̄kpọ nte ₦410,000 ẹdep tiket uka ye unyọn̄ọ ẹnọ eyen ufọkn̄wed kiet kiet emi okodụkde ọyọhọ klas 147 ke Patterson. Edi nditọ ufọkn̄wed emi ẹketode Solomon Islands ẹkedụk ubomofụm inan̄ ẹkesịm Patterson, ẹnyụn̄ ẹdụk ubomofụm ita ẹnyọn̄, oro ọwọrọ ke isan̄ mmọ ama ebe itiat 22,000. Ẹkekpe n̄kpọ nte ₦876,000 ẹnọ owo mmọ kiet kiet. Itieutom Emi Ẹsede Ẹban̄a Ukaisan̄ ke Ibuot Itieutom Nnyịn ẹsida kọmputa ẹyom tiket ubomofụm emi ememde urua man owo idibiat okụk ikaha. Ẹma ẹkụt tiket emi ememde urua, ẹsidọhọ ẹnịm itie ẹnọ mmimọ. Edi ẹsika iso ẹda kọmputa ẹyom m̀mê ẹyekụt enye emi ememde urua akan oro. N̄ko, ẹsida tiket mfọn oro kọmpeni ubomofụm ẹkenọde owo ẹnọ owo en̄wen ada aka isan̄ utu ke ndidep tiket en̄wen.

 Ẹsiyom ediwak mbon oro ẹkotde Ufọkn̄wed Gilead ẹnyene n̄wedisan̄ mbemiso ẹdụkde United States. Ntre, Itieutom Oro Ẹsede Ẹban̄a Ibet ke Ibuot Itieutom Nnyịn ẹsin̄wam mmọ ẹnyene n̄wedisan̄ emi ẹsinọde nditọ ufọkn̄wed. Ẹsibiat n̄kpọ nte ₦195,000 ẹbọ n̄wedisan̄ ẹnọ eyen ufọkn̄wed kiet kiet.

 Nso ufọn ke mbon emi ẹkekade Ufọkn̄wed Gilead ẹnam ẹnọ nnyịn? Hendra Gunawan edi ebiowo ke esop kiet ke Asia. Ebe ye n̄wan emi ẹkekade Gilead ẹdu ke esop mmọ. Enye ọdọhọ ete: “Nnyịn ikenyeneke asiakusụn̄ ofụri ini ke esop nnyịn. Edi ke ini ebe ye n̄wan emi ẹkedide esop nnyịn, nte mmọ ẹkesịnde idem ẹkwọrọ ikọ ama anam ndusụk owo ẹtọn̄ọ ndisiak usụn̄. Nte ini akakade, sista kiet ke esop nnyịn ama akam aka Ufọkn̄wed Mme Ọkwọrọ Obio Ubọn̄!”

 Sergio Panjaitan anam utom ke Bethel ke Asia ye mbon emi ẹkekade Ufọkn̄wed Gilead. Enye ọdọhọ ete: “Se ẹkekpepde mmọ ke Gilead in̄wamke mmọ kpọt, etiene an̄wam nnyịn n̄ko. Ẹma ẹkpep mmọ ata ediwak n̄kpọ, edi mmọ iyakke oro anam mmọ ẹkere ke mmimọ imọfọn ikan mbon en̄wen. Utu ke oro, mmọ ẹsikpep mbon en̄wen se ẹkekpepde mmọ. Emi esisọn̄ọ nnyịn idem onyụn̄ anam nnyịn ikeme ndisọn̄ọ mbon en̄wen idem n̄ko.”

 Ẹsida okụk ke m̀mọ̀n̄ ẹnịm ufọkn̄wed emi? Okụk oro ẹsitịpde man ẹda ẹnam utom ofụri ererimbot ke ẹsida ẹnam emi, ndien ediwak owo ẹsika donate.pr418.com ẹketịp okụk emi. Imọkọm mbufo etieti ke okụk oro ẹsitịpde man ẹda ẹnịm ufọkn̄wed emi nditọete ẹsitode nsio nsio itie ẹdidụk mi.