Jacob ama ọfiọk ke Jehovah ikpọn̄ ke ẹkpetuak ibuot ẹnọ, kpa ye emi Jehovah mîkọnọhọ kan̄a ibet emi akpande ukpono ndem. (Ex 20:3-5) Ntre, ke Jehovah ama ọkọdọhọ Jacob afiak ọnyọn̄ Bethel, Jacob ama ọdọhọ kpukpru owo ke ufọk esie ẹduọn̄ọ mme abasi mmọ. Jacob ama ọduọn̄ọ kpukpru mme nsunsu abasi, esịnede mme n̄kpanuen utọn̄; etie nte ẹkesisịne n̄kpanuen emi nte n̄kpọ n̄kpemeidem. (Ge 35:1-4) Imenịm ke se Jacob akanamde oro ama enem Jehovah esịt.

Nso ke ikpanam ndiwụt ke nnyịn inyeneke abasi en̄wen ke mîbọhọke Jehovah? Akpan n̄kpọ kiet edi nnyịn ndisọn n̄kpọ ekededi emi asan̄ade n̄kpọ ye ukpono ndem m̀mê n̄kpọ mme demon. Emi esịne ndiduọn̄ọ n̄kpọ ekededi emi asan̄ade n̄kpọ ye ndedịbe odudu nnyụn̄ nnen̄ede ndụn̄ọde mme n̄kpọ emi isidade inem idem esịt. Ke uwụtn̄kpọ, bụp idemfo ete: ‘Ndi mmesikot n̄wed mîdịghe nse fim emi aban̄ade ifọt, ekpo, m̀mê n̄kpọ emi ẹnamde ke “enyịn efen”? Ndi se ẹsitịn̄de ẹban̄a do esinam etie nte ke mfọni, nduọhọ, m̀mê ukọkibọk idiọkke?’ Ana inen̄ede isua n̄kpọ ekededi emi Jehovah asuade.—Ps 97:10.

ẸSE VIDIO ORO “ẸBIỌN̄Ọ DEVIL,” EKEM ẸBỌRỌ MME MBỤME ORO ẸTIENEDE MI:

• Nso mfịna ke eyen ukpepn̄kpọ Bible kiet emi ekerede Palesa ekenyene?

• Ntak emi ọfọnde itịn̄ inọ mbiowo ke ini owo enyenede mfịna emi aban̄ade n̄kpọ mme demon?

• Edieke iyomde Jehovah ekpeme nnyịn, nso ye nso ke ana ision̄o ubọk ikpọn̄?

• Nso ke Palesa akanam?

• Nso ke mme owo ẹsinam ke edem mbufo, emi mûkputieneke unam, man demon idifịna fi?