NTAK EMI EDIDE AKPAN N̄KPỌ: Kpukpru n̄wed ye vidio oro ẹdude ke Mme Akpan N̄kpọutom Nnyịn ẹsinam mme owo ẹdiọn̄ọ jw.org. Oro akam edi akpan ntak oro inyenede kad jw.org ye tract oro Anie Ekeme Ndibọrọ Mbụme Emi Afịnade Ata Ediwak Owo? Emekeme ndida jw.org nnọ owo n̄wed m̀mê vidio emi odude ke Mme Akpan N̄kpọutom Nnyịn. Emekeme ndinọ owo n̄wed m̀mê vidio emi ke e-mail mîdịghe ọnọ enye link emi edimende enye ika ebiet emi n̄wed m̀mê vidio oro odude ke jw.org. Emi ekeme ndinen̄ede nnyene ufọn ke ini ọkwọrọde ikọ ọnọ owo emi esemde usem en̄wen. N̄ko, owo ekeme ndibụp mbụme emi ibọrọ mîdụhe ke mme n̄wed emi ẹdude ke Mme Akpan N̄kpọutom Nnyịn. Edieke idiọn̄ọde ebiet emi nsio nsio n̄kpọ ẹdude ke ikpehe Intanet nnyịn, iyọfiọk nnennen ebiet oro ikpakade ke ini iyomde n̄kpọ ke jw.org.

NTE AKPANAMDE:

• Ikpehe oro ẹkotde “SE BIBLE EKPEPDE”. Edieke ọkwọrọde ikọ ọnọ ete m̀mê eka ndien enye oyom ndinen̄ede mfiọk n̄kpọ mban̄a nte ikpọbọkde nditọ, ka SE BIBLE EKPEPDE > NDỌ YE UBON.

• Ikpehe oro ẹkotde “SE ẸDỌN̄DE”. Edieke ọkwọrọde ikọ ke ufọkn̄wed ndien afo oyom ndiwụt eyen ufọkn̄wed mbufo n̄kpọ ke ediye ekpri n̄wed oro, Ibọrọ Mbụme 10 Emi N̄kparawa ye N̄kaiferi Ẹsibụpde, ka SE ẸDỌN̄DE > MME N̄WED YE NDIYE N̄KPRI N̄WED.

• Ikpehe oro ẹkotde “ABAN̄A NNYỊN”. Edieke ọkwọrọde ikọ ọnọ owo itieutom mbufo ndien enye oyom ndikot n̄kpọ mban̄a se nnyịn inịmde ke akpanikọ, ka ABAN̄A NNYỊN > MBỤME EMI ẸSIWAKDE NDIBỤP.

ẸSE VIDIO ORO DIỌN̄Ọ SE IDUDE KE NSIO NSIO IKPEHE KE JW.ORG, EKEM ẸNEME IKPEHE EMI OWO AKPAKADE EDIEKE ENYE OYOMDE NDIN̄WAM:

• owo emi mînịmke ke Abasi odu

• owo emi afanikọn̄ etịbede ọnọ

• eyenete emi mîwọrọke an̄wautom aba

• owo emi ọkọkwọrọde ikọ inọ, emi oyomde ndifiọk m̀mê isida okụk ke m̀mọ̀n̄ inam utom nnyịn

• owo emi oyomde ndifiọk ebiet emi enye okpodụkde mbono esop ke idụt mmọ