Toto ke eset, ukara ẹsin̄wam ikọt Jehovah ndusụk ini. (Ezr 6:1-12; Es 8:10-13) Idem ke eyo nnyịn emi, “isọn̄”—emi adade aban̄a ndusụk ndutịm ererimbot emi ẹsinamde n̄kpọ ye eti ibuot—ẹsin̄wọn̄ “mmọn̄” oro adade aban̄a ukọbọ emi “dragon,” oro edi, Satan kpa Devil, otopde osio ke inua esie. (Edi 12:16) Ndusụk ini, Jehovah, “Abasi emi anyan̄ade nnyịn,” ekeme ndinam mme andikara ẹn̄wam ikọt esie.—Ps 68:20; N̄ke 21:1.

Edi, nso ke akpanam edieke ẹsịnde fi ke ufọk-n̄kpọkọbi ke ntak emi anamde n̄kpọ Abasi? Nịm ke Jehovah ke ekpeme fi. (Ge 39:21-23; Ps 105:17-20) Fiọk ete ke Abasi iditreke ndidiọn̄ fi ke ntak emi ọbuọtde idem ye enye. Ti n̄ko ke nditọete fo ke ofụri ererimbot ẹma nte afo ọsọn̄ọde ada ye Abasi.—Php 1:12-14; Edi 2:10.

ẸSE VIDIO ORO ẸSION̄O NDITỌETE NNYỊN KE UFỌK-N̄KPỌKỌBI KE KOREA, EKEM ẸBỌRỌ MME MBỤME EMI:

• Ke ediwak isua emi ebede, ntak emi ẹkesisịnde ata ediwak nditọete nnyịn ke ufọk-n̄kpọkọbi ke South Korea?

• Mme ikpe ewe akanam ẹsion̄o ndusụk nditọete nnyịn do ke ufọk-n̄kpọkọbi mbemiso ini n̄kpọkọbi mmọ okụrede?

• Didie ke ikeme ndin̄wam nditọete nnyịn emi ẹsụk ẹdude ke ufọk-n̄kpọkọbi ke ntak emi mmọ ẹnamde n̄kpọ Abasi?

• Nso ke ikpanam idahaemi isụk inyenede ifụre mi?

• Anie ke ikpotoro ini ekededi oro ikande ke ikpe?