Yak idọhọ ke odụn̄ ke Galilee ke eyo Jesus. Ndien afo oto obio mbufo edi Jerusalem man editiene odụk Usọrọ Mme Ataya. Mbon en̄wen emi ẹkponode Jehovah ẹto nsio nsio obio ẹdi n̄ko, ntre mme owo ẹnen̄ede ẹwak ke Jerusalem. Ekem afo emen ebot emi oyomde ndiwa nnọ Jehovah asan̄a ke ufọt otuowo ebe aka temple. Ke ini esịmde temple, afo okụt ediwak mbon eken emi ẹbetde do man ẹwa uwa mmọ n̄ko. Ke ama akada ebịghi, ini fo edisịm ndinọ oku ebot fo man enye emen akawa ọnọ fi. Kpa idahaoro afo eti ke eyenete fo enyene ikọ ye afo. Ekeme ndidi eyenete fo oro odu ke otu ediwak owo oro ẹdude do ke temple mîdịghe ke otu mbon oro ẹdude ke esịt obio. Jesus ama etịn̄ se akpanamde. (Kot Matthew 5:24.) Didie ke afo ye eyenete emi ẹkeme ndinam emem nte Jesus ọkọdọhọde? Mek nnennen n̄kpọ emi akpanamde ke otu mme n̄kpọ emi ẹsiakde mi.

AKPANA . . .

• aka ekeneme se iketịbede ye eyenete oro n̄kukụre edieke ekerede ke enye ama odot ndiyat esịt ye afo

• odomo ndinen̄ede enye edieke ekerede ke enye ama ọsọp ndiyat esịt n̄kaha mîdịghe ke enye ama etiene edue fi

• enyene ime akpan̄ utọn̄ okop nte eyenete oro etịn̄de se ikabiakde enye, ọkpọkọm se enye etịn̄de inen̄ekede in̄wan̄a fi. Kpe enye ubọk ke ofụri esịt nyụn̄ dọhọ enye efen ọnọ fi ke ukûdiọn̄ọke ke se akanamde oro ama ayat enye

AKPANA EYENETE FO . . .

• asan̄a etịn̄ ọnọ mme owo ke esop man ẹda ye enye

• ọtọk fi, afiak etịn̄ kpukpru se akanamde emi akayatde enye, onyụn̄ ọdọhọ enyịme ke ama edue imọ

• efen ọnọ fi sia enye okụt ke ekpedi ukûsụhọkede idem unyụn̄ unyene uko, ke ukpûdịghe udukpe enye ubọk

Kpa ye oro nnyịn mîwaha aba unam nte ẹkesiwade ke eset, didie ke se Jesus ekekpepde owụt ke edieke nnyịn mînamke emem ye eyenete nnyịn ke Abasi idinyịmeke utuakibuot nnyịn?