NTAK EMI EDIDE AKPAN N̄KPỌ: Ke ini idade ini ikpep Bible, ikọ Abasi eyenen̄ede an̄wan̄a nnyịn, ndien editie nte n̄kpọ eke ifiọkde “se idide ubom ye uniọn̄ ye ukon̄ ye utụn̄ọ” Ikọ Abasi. (Eph 3:18) Ndisikpep Ikọ Abasi ayanam ikûkpebe idiọk ererimbot emi, onyụn̄ anam ‘isọn̄ọ imụm ikọ uwem ikama.’ (Php 2:15, 16) Ke ini ikpepde Bible ke idem nnyịn, imekeme ndimek n̄wed ekededi oro imade ndikpep. Nso ke ikpanam man inen̄ede idia ufọn ke ini ikotde inyụn̄ ikpepde Bible?

NTE AKPANAMDE:

• Dụri udịm mîdịghe sịn kọlọ ke mme ufan̄ikọ Bible nyụn̄ wet mme akpan n̄kpọ ke mben Bible oro esidade ekpep n̄kpọ; emekeme ndinam emi ọkpọkọm esikot Bible ke fon m̀mê kọmputa

• Nte osụk okotde Bible, bụp idemfo mme mbụme emi: ‘Nso? Ntak-a? Ini ewe? Didie? M̀mọ̀n̄? ye Anie?’

• Yom usụn̄ fiọk se iketịbede ini oro. Da mme n̄kpọ oro inyenede nam ndụn̄ọde. Emekeme ndidụn̄ọde ibuotikọ kiet kiet m̀mê ufan̄ikọ kiet kiet

• Tie kere se okotde man okụt nte ekemede ndinanam se okotde

• Da se ekpepde du uwem ke usen ke usen.—Lu 6:47, 48

ẸSE VIDIO ORO NTE EKPEKPEPDE BIBLE MAN ETỊM AN̄WAN̄A FI, EKEM ẸBỌRỌ MME MBỤME EMI:

• Nso ke ndusụk owo ẹtịn̄ ẹban̄a nte mmọ ẹsikpepde Bible?

• Ntak emi ikpesibọn̄de akam mbemiso itọn̄ọde ndikpep n̄kpọ?

• Nso ikeme ndinam se ikotde ke Bible enen̄ede an̄wan̄a nnyịn?

• Nso utọ idiọn̄ọ ke ikeme ndisịn ke Bible nnyịn ke ini ikpepde n̄kpọ?

• Ntak emi enen̄erede ọfọn isitie ikere se ikpepde ke Ikọ Abasi?

• Nso ke ikpada se ikpepde inam?