NTAK EMI EDIDE AKPAN N̄KPỌ: Edieke nditọ ukpepn̄kpọ Bible nnyịn ẹbemde iso ẹtie ke idemmọ ẹkpep n̄wed emi isikpepde mmọ, se idikpepde mmọ ọyọsọsọp an̄wan̄a mmọ, mmọ idinyụn̄ isọpke ifre mme n̄kpọ oro. Ndien oro ekeme ndinam mmọ ẹnam se mmọ ẹkpepde ẹnyụn̄ ẹsịn idem ẹnam n̄kpọ Abasi. Idem ke ini mmọ ẹma ẹkena baptism, ana mmọ ẹsitịm idem ẹnọ mbono esop ye ukwọrọikọ man ẹka iso “ẹdu ke ukpeme.” (Mt 25:13) Edieke mmọ ẹfiọkde ndikpep n̄kpọ ke idemmọ, ẹsinyụn̄ ẹnamde oro ke ubọk ke ubọk, mmọ ẹyedia ufọn ke nsinsi. Ke ini inyenede mbufa nditọ ukpepn̄kpọ Bible, ana ibabak idọhọ mmọ ẹsitịm idem ẹnọ ukpepn̄kpọ Bible mmọ.

NTE AKPANAMDE:

• Nịm eti uwụtn̄kpọ. (Ro 2:21) Kere ban̄a eyen ukpepn̄kpọ fo ke ini etịmde idem ọnọ ukpepn̄kpọ esie. (km 11/15 3) Yak enye okụt n̄wed fo emi okodụride udịm ke ibọrọ

• Ndondo oro owo akabarede edi eyen ukpepn̄kpọ fo, dọhọ enye esitịm idem ọnọ ukpepn̄kpọ esie. Nam enye ọfiọk ke oro edi akpan n̄kpọ, nyụn̄ nam enye okụt nte oro edin̄wamde enye. Tịn̄ nte enye ekemede ndinyene ini ntịm idem. Ndusụk mme asuanetop ẹsikpọn̄ n̄wed mmọ oro mmọ ẹkedụride udịm ke ibọrọ ẹnọ eyen ukpepn̄kpọ mmọ akama ke ini ẹkpepde enye n̄kpọ man eyen ukpepn̄kpọ oro okụt ke ọfọn ndisitịm idem nnọ ukpepn̄kpọ. Toro enye ke ini enye etịmde idem ọnọ ukpepn̄kpọ

• Wụt enye nte ẹkpetịmde idem. Ndusụk nditọete ẹsisio usen kiet ẹda ẹkpep obufa eyen ukpepn̄kpọ Bible mmọ nte enye ekpesitịmde idem ọnọ ukpepn̄kpọ esie