Oyobio, ukwọ m̀mê n̄kpọ ntre enen̄ede abiat n̄kpọ ke nsio nsio itie usen ifan̄ emi. Ke ini utọ n̄kpọ emi etịbede, ana ẹnam ata eti ndutịm man ẹkeme ndin̄wam mbon oro n̄kpọ emi etịbede ọnọ. Emi anam Otu Emi Ẹsede Ẹban̄a Utom Nnyịn ẹdọhọ kpukpru n̄kọk itieutom ẹnyene Itieutom Unọ Un̄wam ke Ini Afanikọn̄ (Disaster Relief Department).

Ke ini nditọete emi ẹnamde utom ke itieutom emi ẹkopde ke oyobio, ukwọ m̀mê n̄kpọ ntre etịbe ke idụt mmọ, mmọ ẹsisọsọp ẹkot mbiowo emi ẹdude ke ebiet emi n̄kpọ oro etibede man ẹfiọk nte ẹkemede ndin̄wam nditọete do. Edieke afanikọn̄ emi abiatde n̄kpọ okpon akan se nditọete emi ẹdude do ẹkemede ndin̄wam, n̄kọk itieutom eyemek mbon emi ẹdotde man ẹse ẹban̄a nte ẹdin̄wamde nditọete oro. Mbon emi ẹnamde utom ke itieutom emi ẹkeme ndidọhọ nditọete ẹto ebiet en̄wen ẹken̄wam nditọete emi, ẹnyụn̄ ẹkeme ndidọhọ ẹnọ mme n̄kpọ oro ẹnen̄erede ẹyom mîdịghe mmọ ẹdedep mme n̄kpọ emi ẹdeme ẹnọ nditọete oro.

Ndinam n̄kpọ ntem enyene ediwak ufọn. Nditiene ndutịm oro esop Abasi ẹnamde esinam ẹdiọn̄ọ se ẹkpenamde, esinam owo inamke n̄kpọ kiet ikaba, isinyụn̄ iyakke ẹbiat okụk awak akan se ẹkpebiatde.

Nditọete oro n̄kọk itieutom ẹmekde ẹsidiọn̄ọ ibat okụk emi edikemde ndida n̄n̄wam nditọete emi ye ibat owo emi edikemde ndida nnam utom. Mmọ ẹkeme ndiyom usụn̄ mmehe ye mbon emi ukara ẹdọhọde ẹn̄wam mmọ, man ẹsọsọp ẹn̄wam mmọ. Ntre, ifọnke ẹtie ke idem mbufo ẹbọ nditọete okụk ẹnọ ẹsọk mbon emi afanikọn̄ esịmde, ẹkûnyụn̄ ẹnọ n̄kpọ ekededi ẹsọk nditọete emi, m̀mê ndika ebiet emi afanikọn̄ etịbede ibọhọke ẹdọhọ mbufo ẹnam ntre.

Edi imosụk ikeme ndin̄wam ke ini afanikọn̄ etịbede. (Heb 13:16) Sia imade nditọete nnyịn, nso ke ikpanam? Ata akpan n̄kpọ emi ikpanamde ekpedi ndisiak nditọete emi afanikọn̄ emi esịmde ye mbon ẹdikade ikan̄wam mmọ ke akam nnyịn. Imekeme n̄ko nditịp okụk nsịn ke ekebe Worldwide Work. Otu Emi Ẹsede Ẹban̄a Utom Nnyịn, ẹsiteme mme n̄kọk itieutom se mmọ ẹkpedade okụk oro nditọete ẹtịpde ẹnam. Edieke edimade nditiene n̄n̄wam, wet n̄kpọ yọhọ fọm Local Design/Construction Volunteer Application (DC-50).

ẸSE VIDIO ORO MMỌN̄ ABIAT N̄KPỌ KE BRAZIL, EKEM ẸBỌRỌ MBỤME EMI:

Nso ke enen̄ede ama ke nte Mme Ntiense Jehovah ẹken̄wamde nditọete oro m̀mọn̄ akabiatde n̄kpọ mmọ ke Brazil ke 2020?