Enen̄ede enem nnyịn ndinyene obufa ediye ekpri n̄wed ye obufa n̄wed emi idisidade ikpep mme owo Bible! Akam nnyịn edi yak Jehovah an̄wam nnyịn ikeme ndida n̄wed emi nnam ediwak owo ẹdi mbet Jesus. (Mt 28:18-20; 1Co 3:6-9) Didie ke ikeme ndida mbufa n̄wed emi nneme ikọ Abasi ye mme owo?

Sia Du Ata Uwem ke Nsinsi! owụtde nnyịn obufa usụn̄ emi idisidade ikpep mme owo Bible, ọkpọfọn anam se ẹwetde mi ke ini eben̄ede idem ndikekpep owo Bible ye ke ini osụk ekpepde owo Bible. *

• Kot se ẹwetde nyụn̄ neme mme mbụme oro ẹdude do

• Kot mme itie N̄wed Abasi oro ẹwetde “kot” nyụn̄ nam an̄wan̄a eyen ukpepn̄kpọ Bible fo

• Bre mme vidio oro ẹdude do nyụn̄ da mme mbụme emi ẹdude neme se idude ke vidio oro

• Domo ndikụre ukpepn̄kpọ kiet ke usen kiet

Ke ini ọkwọrọde ikọ, nọ owo ediye ekpri n̄wed Du Ata Uwem ke Nsinsi! kan̄a man ese m̀mê enye ayama ndikpep Bible. (Se ekebe oro “ Nte Ọkpọnọde Owo Ediye Ekpri N̄wed Du Ata Uwem ke Nsinsi! ke Akpa Ini.”) Edieke ekpepde enye ediye ekpri n̄wed oro ama, ndien enye osụk oyom ndika iso n̄kpep n̄kpọ, nọ enye n̄wed Du Ata Uwem ke Nsinsi! nyụn̄ tọn̄ọ ke ọyọhọ ukpepn̄kpọ 04. Edieke edide ke ekpep owo n̄kpọ ke n̄wed nnyịn ekededi, kpọn̄ n̄wed enye oro nyụn̄ tọn̄ọ ndikpep enye n̄wed Du Ata Uwem ke Nsinsi! Afo edimek ebiet emi ẹditọn̄ọde ke obufa n̄wed oro.

ẸSE VIDIO ORO NTE ISIKPEPDE OWO BIBLE, EKEM ẸBỌRỌ MME MBỤME EMI:

• Nso ke owo edikpep ke obufa n̄wed emi?

• Ntak emi okpowụtde owo emi oyomde ndikpep Bible vidio emi?

• Didie ke akpan̄wam owo emi afo ekpepde Bible ọfiọk mme n̄kpọ emi enye edinamde onyụn̄ anam mmọ?—Se ekebe oro “ Se Ikpehe Kiet Kiet Aban̄ade ye Se Enye Edin̄wamde Owo Anam”