STRASBOURG, France—Ke November 27, 2012, Esopikpe Europe Oro Esede Aban̄a Unen Owo ama ọdọhọ ukara Armenia ẹkpe owo 17 emi ẹkesịnde ndinam utom ekọn̄ ke ntak ido ukpono, euro 112,000 ($145,226), oro edi ₦22,510,030.00, nte isop ye nte okụk oro mmọ ẹkebiatde ke ikpe.

Ke 2005, n̄kparawa 17 emi ẹdide Mme Ntiense Jehovah ẹma ẹnam utom en̄wen oro ukara ẹnọde utu ke utom ekọn̄. Edi ke ini mmọ ẹkedide ẹdifiọk ke mbonẹkọn̄ ẹse ẹban̄a utom emi, ubieresịt mmọ ikayakke mmọ ẹka iso ẹnam utom emi, ntre mmọ ẹma ẹkpọn̄. Ẹma ẹmụm mmọ ẹnyụn̄ ẹkot mmọ ikpe. Ẹma ẹsịn ndusụk mmọ ke n̄kọbi-ntem ke ediwak ọfiọn̄, ndien nte ini akakade, ẹma ẹbiere n̄kpọkọbi isua iba esịm ita ẹnọ owo 11.

Esopikpe Europe ama ebiere ete ke ibet inyịmeke ẹkot mmọ ikpe m̀mê ẹsịn mmọ ke ufọk-n̄kpọkọbi koro ke 2005, idụhe ibet ndomokiet ke Armenia oro ọkọdọhọde ke inaha owo ọkpọn̄ utom en̄wen oro ukara ẹnọde. Esopikpe oro ama etịn̄ ete ke ukara Armenia ẹma ẹbiat unen ye ifụre ido ukpono Mme Ntiense nte ẹwetde ke ọyọhọ Ikpehe 5 ke Ediomi Europe Oro Aban̄ade Unen Owo. Okposụkedi emi ukara Armenia ẹkebiatde ikpe owo 17 emi ẹfep, ukara oro ikekpehe mmọ se Esopikpe ọkọdọhọde ẹkpe ke ndikokot mmọ ikpe nnyụn̄ n̄kọbi mmọ nte mîdotke. Ntem, Esopikpe oro ama ọdọhọ ke ana ukara Armenia ẹkpe isop emi ke ndikabiat mmọ enyịn̄ ye ke okụk oro nditọete emi ẹkebiatde ke ikpe oro.

Mbemiso ẹkebierede ikpe enye emi, Esopikpe Europe ama obobiom ukara Armenia ikpe utịm ikata ke ikọ oro aban̄ade edida san̄asan̄a. Ke ofụri ikpe inan̄ emi, mbon ukara Armenia ẹma ẹnọ Mme Ntiense Jehovah oro ẹkesịnde ndinam utom ekọn̄ ke ntak ido ukpono ufen, ẹnyụn̄ ẹnam n̄kpọ ye mmọ ke ata idiọk usụn̄ nte n̄kpọ eke ẹdọhọde ke mmọ ẹdi mme abiatibet.

André Carbonneau, kpa ekpeibet Mme Ntiense emi, ọdọhọ ete: “Ubiereikpe emi Esopikpe Europe ọnọde mi an̄wam ẹtre ufen emi ẹkenọde Mme Ntiense Jehovah emi. Edikan emi Esopikpe Europe ọnọde Mme Ntiense ke Armenia mi ekpenyene ndiwụt mme idụt eken emi ẹdude ke N̄ka Europe ọkọrọ ye mme idut nte Eritrea, South Korea, ye mme idụt oro ẹdude ke Central Asia ke Mme Ntiense Jehovah ẹnyene unen ndisịn ndinam utom ekọn̄.”

Mbon Oro Ekemede Ndikot:

David Semonian, Ọfis Usuanetop, tel. +1 718 560 5000

Armenia: Tigran Harutyunyan, tel. +374 93 900 482