Akamba mbono 2020 emi ibuotikọ ekedide ‘Ẹdat Esịt Kpukpru Ini’! ekedi kiet ke otu n̄wọrọnda mbono emi Mme Ntiense Jehovah ẹnịmde ke eyo nnyịn emi. Ẹma ẹkabade mbono emi ẹsịn ke se ibede usem 500, ndien nditọete ẹketie ke ufọk mmọ ẹse mbono emi. Ama enyene ediwak n̄kpọ emi akanamde utom emi ọsọn̄. Mme akabade n̄wed ẹkenyene ekpri ini ndikụre utom emi, ndien ediwak mmọ ikenyeneke kpukpru se ẹkpedade ẹnam utom emi.

Eyenete kiet emi esitienede akabade n̄wed ke usem Kikuyu ke Kenya ọdọhọ ete: “Sia ẹma ẹkeberi n̄kọk itieutom ke ntak udọn̄ọ coronavirus, nnyịn ikenyeneke ediwak nditọete emi ikpadade i-rekọd mbono emi. Ntre nditọete ẹma ẹtie ke ufọk mmọ ẹ-rekọd ndusụk ikpehe mbono emi ẹnọ ẹsọk nnyịn. Ama enem nnyịn etieti ndikụt nte spirit Jehovah an̄wamde nnyịn inam utom emi.”

Nditọete oro ẹsikabarede n̄wed ẹsịn ke usem Korean ye ke Usem Idiọn̄ọ Mbon Korea ẹkenyene ukem mfịna emi. Mbon oro ẹsitode ufọk ẹdin̄wam mmọ ke utom Bethel ikekemeke ndidụk ndin̄wam ke utom emi.

Ntre man ekeme ndi-rekọd ofụri mbono emi, nditọete ẹma ẹda ufọk mmọ ẹnam studio. Mmọ ẹkenyene ediwak ke otu n̄kpọ emi ẹkedade ẹ-rekọd mbono emi. Ke adianade do, sia owo mîkenịmke mbono circuit ndomokiet, n̄kọk itieutom ẹma ẹda ndusụk kamara Itie Mbono ẹ-rekọd mbono emi ẹsịn ke usem idiọn̄ọ.

Ke Venezuela, Intanet ama ọdiọk tutu, ndien emi ama amia ndusụk mme akabade n̄wed ufen. Ndusụk mmọ ikonyụn̄ inyeneke n̄kpọutom ndida nnam utom. Edi mmọ ẹma ẹda se mmọ ẹkenyenede ẹnam utom emi ẹsio. Ke uwụtn̄kpọ, enyene itie emi mme akabade n̄wed ẹkedade matras mmọ ẹnam studio man ẹda ẹ-rekọd n̄kpọ.

Ke Juba emi odude ke South Sudan, ndusụk nditọete do ẹsikabade n̄wed nnyịn ẹsịn ke usem Zande. Kiet ke otu nditọete oro ọkọdọhọ ete: “Ke ini ẹkedọhọde nnyịn ke imọn̄ i-rekọd ofụri mbono oro, mma n̄kere ke idụhe-du nte idikemede ndinam emi! Mma n̄kere nte idisan̄ade i-rekọd mme utịn̄ikọ ye vidio emi awakde ebe 90 ke ufan̄ ọfiọn̄ iba. Idahaemi utom emi ama okokụre mi, mmokụt ke idụhe n̄kpọ ndomokiet emi ekemede ndikpan Jehovah ndinam uduak esie. Nte enye esinamde n̄kpọ akpa owo idem tutu!”—Matthew 19:26.

Akamba mbono 2020 emi ibuotikọ ekedide ‘Ẹdat Esịt Kpukpru Ini’! ekedi ata eti enọ emi Jehovah ọnọde nnyịn. Enye oyom “kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.”—1 Timothy 2:4.