Nditọete nnyịn ke ibuot itieutom Mme Ntiense Jehovah ke ẹkama enyịn ẹse se ikade iso ke ntak idiọk udọn̄ọ coronavirus (COVID-19) emi. Ikọ Abasi ama etetịn̄ ke ndiọi udọn̄ọ ẹyedu ke mme akpatare usen. (Luke 21:11) Ke ini idiọk udọn̄ọ ọtọn̄ọde ndisuana ke obio, ọfọn inam n̄kpọ man nnyịn ye mbon en̄wen idimen udọn̄ọ oro.—Mme N̄ke 22:3.

Ndusụk owo ẹkeme ndibụp m̀mê n̄kpọ etetie didie ye nditọete nnyịn ke mme obio emi udọn̄ọ emi enen̄erede omụm isọn̄. Idiọk udọn̄ọ COVID-19 emi anam ofịs nnyịn ke Italy, Japan, South Korea, ye ke nsio nsio idụt ẹkpuhọde nte ẹnamde ndusụk n̄kpọ. Ke ndusụk idụt, owo inyịmeke isenowo ẹdụk esịt Bethel, ẹnyụn̄ ẹdọhọ mme esop ẹtre kan̄a ndika n̄kese Bethel. Ukara ẹkpan mme owo ke nsio nsio obio ndiboho ke itie kiet enen̄ede awak, emi anam ofịs nnyịn ẹdọhọ yak ẹtre kan̄a ndinịm mbono ke mme itie mbono nnyịn. Adianade do, ẹkpuhọ nte ẹnịmde mbono esop ye nte ẹkwọrọde ikọ ke ndusụk itie. Didie ke nditọete nnyịn ẹka iso ẹkpep ikọ Abasi ẹnyụn̄ ẹsọn̄ọ kiet eken idem ke utọ ini afanikọn̄ emi.—Jude 20, 21.

Item Bible ifan̄, oro odude mi ke idak, enen̄ede an̄wam nditọete nnyịn ke ini afanikọn̄ emi. Item emi ekeme ndin̄wam fi ye ubon fo n̄ko, ekpedi udọn̄ọ emi omụm mme owo ke obio odude.

• Kûyak Idem Enyek Fi. Ke ini udọn̄ọ ọtọn̄ọde ndisuana, imọdiọn̄ọ ke ana inen̄ede ikpeme idem, inyụn̄ inam se ededi oro ikemede man nnyịn idimen udọn̄ọ oro. Edi ikpanaha iyak oro anam nsia eyemerede nnyịn.—Mme N̄ke 14:15; Isaiah 30:15.

• Nam Se Ukara Ẹdọhọde. N̄kpọ ama etịbe, utọ nte udọn̄ọ emi, ukara ẹsikpan mme owo ndinam ndusụk n̄kpọ man ẹkpeme mmọ. Ntre edieke ukara ẹkpande mme owo ke n̄kan̄ mbufo ndinam ndusụk n̄kpọ, mbọk sụk ibuot nọ mmọ nyụn̄ nam se mmọ ẹdọhọde.—Rome 13:1.

• Sana Idem. Enen̄ede ọfọn isida suọp iyet ubọk ke ini ke ini, inyụn̄ isifiọn̄ọ hand sanitizer emi esịnede alcohol. Akpana isikwọhọde itie ubọkowo esisọpde otụk ke ufọk nnyịn ye ke Ufọkmbono Obio Ubọn̄. Mme dọktọ ẹdọhọ yak owo okûkọm owo ubọk, sia oro esisọp anam owo emen udọn̄ọ emi. Itieutom emi ẹsede n̄kpọ ẹban̄a nsọn̄idem ofụri ererimbot (World Health Organization) ẹtịn̄ mme n̄kpọ en̄wen emi anade owo ekpeme idem.

• Wụt ke Amama Mbon En̄wen. Kpukpru nnyịn imọdiọn̄ọ ke enen̄ede ọfọn isidụk ikọ Abasi nnyịn inyụn̄ ika ukwọrọikọ. Edi edieke udọn̄ọ omụmde nnyịn, mbọk ọfọn itie ke ufọk man udọn̄ọ oro idibe mbon en̄wen. Oro oyowụt ke imama nditọete nnyịn ye mme mbọhọidụn̄ nnyịn.—Matthew 22:39.

• Nam Se Ẹdọhọde ke Esop Odude. Ke obio emi udọn̄ọ emi esịmde, n̄kọk itieutom ẹkeme ndidọhọ ẹtre ndinịm mme mboho ikọ Abasi nnyịn kan̄a. Ẹma ẹtọtọn̄ọ ẹnam emi ke nsio nsio idụt oro COVID-19 omụmde ediwak owo, utọ nte Italy, Japan, ye South Korea. Etiene nte n̄kpọ etiede ke n̄kan̄ mbufo, mbiowo ẹkeme ndinam mbufo ẹsise mbono esop ke fon, ke TV, m̀mê ẹsikpan̄ utọn̄ ẹkop ke radio. Mme asuanetop ẹkeme ndikot owo ke fon n̄kwọrọ ikọ, mîdịghe ẹnọ nte etop m̀mê ẹwewet ke leta.

Ndusụk se ẹkewetde ke mme n̄wed nnyịn ẹban̄a nte owo ekpekpemede idem ke ini udọn̄ọ edi emi.

• “Kpeme Idem Man Udumen Udọn̄ọ” Ẹdemede! No. 6 2016, page 4-6

• “Se Akpanamde Mbak Udusọp Udọn̄ọ” Ẹdemede! July-August 2015, page 2-7

• “You Can Improve Your Health: Key 4—Protect Your Health” Awake! March 2011, page 7—odu ke Ikọmbakara