Ke April 16, 2012, ke Perm’, obio kiet ke ufọt ufọt Russia, ẹma ẹdọhọ Aleksandr Solovyov emi edide kiet ke otu Mme Ntiense Jehovah ekpe 1,000 ruble (n̄kpọ nte ₦4,650.) ke ntak emi enye ekenịmde ‘edinam ido ukpono emi ukara mînọhọ unen ndinịm’ ke ebiet emi enye ọkọbọde ke ukpe okụk.

Ke ebiereikpe akwa esop obio ama akakpan̄ utọn̄ okop se ẹkedọhọde nte Solovyov anamde, enye ama okpụhọde se ekpri esop obio ẹkebierede onyụn̄ ọdọhọ enye okûkpe isop oro.

Ebiereikpe ama okot ubiereikpe esie ndien ekem ọwọn̄ọde ese Ntiense oro ẹketebede ikpe do onyụn̄ ọdọhọ ete: “Kpa ye emi ẹbọpde ibetnte ẹmama ẹnyụn̄ ẹsaride ndusụk owo, idịghe 1937 edi emi, emi ekedide ẹma ẹkụt akpanikọ, ẹbọp enyịn. Utom unọ ukpep mbufo akpakam anam idụt nnyịn ẹnyene eti ye edinen ido.”

Ke July 1937, Stalin emi akakakrade ukara ufịk ke Soviet Union, ama ọbọp Ọyọhọ Ibet 00447, emi ekedi ntọn̄ọ ini oyomonsia. Ẹma ẹsimụm mbon emi ẹkekerede ke ẹnyene isio isio ekikere ye ukara ẹka esopikpe kpa ye emi akpan ntak mîkodụhe. N̄wetnnịm n̄kpọ ukara owụt ke ẹma ẹnọ ata ediwak tọsịn owo ẹka ufọk-n̄kpọkọbi emi ẹnamde ọkpọsọn̄ utom, ndien ẹma ẹbiere n̄kpa ẹnọ ẹnyụn̄ ẹwot se ibede owo 300,000.