Mãwãẽ́a. Ãcõrẽ beɗea jaraẽ́ ɓʉda bacuru ãcõrẽ oɗa quĩrãca dji idida, aɓabe bʉrʉ ʉ̃taa dji idida Ãcõrẽa Jesuɗeba. Jesuba jarasia dji nĩbabadarãa mãwã ʉ̃taa dji idiɗida: “Dairã Zeza bajãne ɓʉ, bʉ trʉ̃ra bio biya quirua” (Mateo 6:9). Jesuba jaraca bãdjia dadjirãba ʉ̃taa dji idiɗida bacuru ãcõrẽ quĩrãca oɗa idjaɓa nezoca bajãnebema biɗa. Aɓabe ʉ̃taa dji idida Ãcõrẽa.

 Idjaɓa Jesuba jarasia “–Maʉ̃ ora mʉ̃́a. Mʉ̃neba Ãcõrẽra wãrãda cawa panʉa idjaɓa zocai ɓai arada eropanʉa. Mʉ̃neba wãnaẽ́bʉrʉ ni aɓaʉda mʉ̃ Zezamaa poya jũẽnaẽ́” (Juaʉ̃ 14:6). Aɓabe bʉrʉ ʉ̃taa dji idida Jesuɗeba (Hebreo 7:25).

¿Dadjirãba poya ʉ̃taa dji idida Ãcõrẽa idjaɓa bacuru ãcõrẽ quĩrãca oɗa biɗa?

 Ãcõrẽba beɗea die diasiɗe idjia jarasia: “Bãrãba aɓabe mʉ́abʉrʉ iwiɗiɗida idjaɓa bia beɗeaɗida” (Exodo 20:5). ¿Cãrẽda jara quĩrĩã ɓʉda “aɓabe mʉ́abʉrʉ”? Dji beɗeada Biblia Americaɗebema jara ɓʉda: “Idjidrʉ Ãcõrẽ aɓabe wãrã arada ɓeida, idjia bio biara ɓʉda awara bacuru ãcõrẽ quĩrãca oɗa cãyãbara”. Ãcõrẽba jara ɓʉda aɓabe bʉrʉ idjidrʉ ĩjãnida idjaɓa ĩjãni carea aɓabe bʉrʉ ʉ̃taa dji idida idjia (Isaías 48:11).

 Dadjirãba ʉ̃taa dji idi panʉbʉrʉ awara, nezoca bajãnebema wa bacuru ãcõrẽ quĩrãca oɗa, Ãcõrẽba bio quĩrũ ɓaida. Dji carta Apocalipsiba jara ɓʉda Juaʉ̃ba bajãnebema nezoca jĩrũ caita chĩrãne ɓarru coɓesiɗe bia beɗeai carea, bajãnebema nezocaba idjía quẽãsia, nãwã jarasia: “Jãwã orãdua, ãtebʉrʉ Ãcõrẽabʉrʉ bia beɗeadua. Mʉ̃ra Ãcõrẽ nezocada jãwã quirua bʉ quĩrãca idjaɓa djabarã Jesuba jaradiaɗa ĩjã ɓea quĩrãca” (Apocalipsi 19:10).