Mãẽ. Ãcõrẽba sopua ɓʉda idjia ĩjãbadara cacua biẽ́ panʉne. Bibliaba jara ɓʉda ẽberã cacua biẽ́ ɓeara: “Dji cacua ʉɓʉaẽ́ ɓʉɗe Jeowaba carebaida” (Salmo 41:3). Ara naʉ̃da beɗea ũbea cawaɗida carebaɗi carea dadjirãba enfermeda nẽãrãbari neẽ́ panʉbʉrʉ:

1.   Ʉ̃taa dji idiɗida Ãcõrẽa zarea diaɗamãrẽã. Ãcõrẽ Beɗeaba jara ɓʉda “Ãcõrẽba bãrã sora, bãrã crĩcha siɗa necai ɓʉya”, jãʉ̃ra poya carebaida necai pananamãrẽã idjaɓa ʉɓʉa ɓeaɗi carea (Pilipo 4:6, 7).

2.   Bia quĩcha ɓeaɗida. Ãcõrẽ Beɗeaba jara ɓʉ: “So ɓʉsriɗa ɓʉra nẽãrã bia quĩrãca ɓʉda, baribʉrʉ sopua ɓaibʉrʉ bia ɓaẽ́da” (Proverbios 17:22). Ɓʉsriɗa ɓaibʉrʉ, jãʉ̃gʉba carebaɗida dadjirãa bia ɓai carea.

3.   Ãcõrẽneba ne edaɗida bio quĩchaɗadua. Ne biada jʉ̃ã panʉbʉrʉ poya droaɗida cacua biẽ́ panʉmĩna (Romano 12:12). Ãcõrẽ Beɗeaba jara ɓʉda ewari aɓaʉɗe ni aɓaʉba jaraẽ́a: “Mʉ̃ra cacua biẽ́ nũmʉda” (Isaías 33:24). Ãcõrẽba ne quĩrãtanoa cacua biẽ́ ɓeara jõbiya. Ni aɓaʉ nẽãrã diabadarãba poya jõbiɗacada. Idjaɓa carebaya ẽberã drõã ɓabadara cũdrara ɓeaɗi carea, maʉ̃ bʉrʉ Ãcõrẽ Beɗeaba jara ɓʉ: “Dji cacua ʉɓʉa ɓaida cũdra quĩrãca; idjaɓa zarea ɓaida idjira cũdra quĩrãca ɓasida” (Job 33:25).

 Beɗeada: Beɗea ɓeara Jeowaɗebemarãba bio ĩjã panʉmĩna Jeowaɗeda, jʉrʉɗida nẽãrã diabarira dadji cacua biẽ́ panʉbʉrʉ (Marco 2:17). Baribʉrʉ jaraɗacada dewararãa cãrẽ nẽãrã doɗida. Ẽberãza jaraɗibara cãrẽ nẽãrãdrʉ poya doɗida.