1 Juaʉ̃ 1:1-10
1 Naãrãeɗa ɓasia Zocai Ɓai Diabari Beɗea abadada. Idjira waɗibiɗa ɓʉa. Idjia jaradia ɓʉda daiba ũrĩsiɗaa. Idjira dai dauba unusiɗaa idjaɓa jʉwaba tãsiɗaa. Idjia o ɓʉra quĩrãcuita acʉsiɗaa. Idjiɗebemada mʉ̃a naʉ̃ cartaɗe ɓʉbʉrʉa.
2 Maʉ̃ zocai ɓai diabarira Ãcõrẽba naʉ̃ ẽjũãne unubisia. Daiba idjira unusiɗaa idjaɓa idjiɗebemada wãrãda beɗea panʉa. Daiba bãrãa jara panʉa maʉ̃ zocai ɓai diabarira ewariza ɓabarida. Naãrãeɗa idjira dadji Zeza Ãcõrẽ ume bajãne ɓabadjia. Idji bajãne ɓaɗada Ãcõrẽba daia naʉ̃ ẽjũãne unubisia.
3 Daiba unupeɗaɗada, ũrĩpeɗaɗa siɗa bãrãa jara panʉa bãrã siɗa dai ume ãbaa aɓarica dadjirã Zeza Ãcõrẽ ume idjaɓa idji Warra Jesucrito ume bia pananamãrẽã.
4 Jũma maʉ̃gʉra mʉ̃a ɓʉbʉrʉa dadjirãra bio ɓʉsriɗaɗi carea.*
Ãcõrẽra cadjirua neẽ́ ɓʉa
5 Daiba Jesucritoɗeba ũrĩpeɗaɗa bãrãa jara panʉra naʉ̃gʉa: Ãcõrẽra ʉ̃naa quĩrãca ɓʉa ne jũmane jipa ɓʉ bẽrã. Maʉ̃ba idjima pãĩmara ni maãrĩ biɗa neẽ́a.
6 Dadjirãda idji ume ãbaa bia panʉana a panʉbʉrʉ, baribʉrʉ pãĩmane nĩnabʉrʉ, sewa o panʉa. Wãrã beɗeara ẽpẽnaẽ́ panʉa.
7 Baribʉrʉ idji ʉ̃naane ɓʉ quĩrãca dadjirãda ʉ̃naane nĩbaɗibʉrʉ, dadjirã djabarã ume ãbaa bia panania. Idjaɓa idji Warra Jesucrito oa erozoaɗaba dadjirã cadjiruara jũma sʉgʉbaria.
8 Dadjirãda cadjirua neẽ́ panʉana a panʉbʉrʉ, ara dadjiduɓa cũrũga panʉa idjaɓa wãrã beɗeara adua panʉa.
9 Baribʉrʉ Ãcõrẽra beɗea aɓa ɓʉ bẽrã idjaɓa jipa obari bẽrã, dadjirãba cadjirua opeɗaɗada idjía jaraɗibʉrʉ, maʉ̃ cadjiruara idjia quĩrãdoaya. Aɓeɗa jũma dadjirãba biẽ́ opeɗaɗara sʉgʉya.
10 Baribʉrʉ dadjirãba cadjiruada oɗacaaɗa aɗibʉrʉ, Ãcõrẽra sewaiɗa ɓʉaɗa a panʉa idjaɓa idji beɗeara ĩjãnaẽ́ panʉa.*
