1 Juaʉ̃ 2:1-29
2 Djabarã, bãrãra mʉ̃ warrarã quĩrãca ɓeaa. Mʉ̃a naʉ̃gʉra ɓʉbʉrʉa bãrãba cadjiruara orãnamãrẽã. Baribʉrʉ aɓaʉba cadjiruada oibʉrʉ, aɓa eropanʉa dadji Zeza Ãcõrẽa dadjirã carea beɗea djuburiabarida. Maʉ̃ beɗea djuburiabarira Jesucritoa. Idjira ne jũmane jipa ɓʉa.
2 Idjira beusia Ãcõrẽba dadjirã cadjiruada quĩrãdoamãrẽã. Aɓabe dadjirã cadjirua carea beuẽ́ basía, ãtebʉrʉ beusia jũma naʉ̃ ẽjũãne duanʉrã cadjirua carea biɗa.
3 Ãcõrẽba obi ɓʉda dadjirãba ĩjã o panʉbʉrʉ, ebuɗa ɓʉa idjira wãrãda cawa panʉda.
4 Baribʉrʉ aɓaʉba jaraibʉrʉ: “Mʉ̃a idjira cawa ɓʉa,” maʉ̃ne idjia obi ɓʉda ĩjã oẽ́ ɓʉbʉrʉ, maʉ̃ ẽberãra sewaiɗa ɓʉa. Idjia wãrã beɗeara adua ɓʉa.
5 2:5-6 Baribʉrʉ Ãcõrẽ beɗea ĩjã o ɓʉba Ãcõrẽra wãrãda quĩrĩã ɓʉa. Ãcõrẽ ume ãbaa ɓʉaɗa a ɓʉra nĩbaida ɓʉa Jesucrito nĩbaɗa quĩrãca. Dadjirãda mãwã nĩbaɗibʉrʉ, cawa panʉa wãrãda idji ume ãbaa panʉda.
6 –
Ãcõrẽba obi ɓʉ djiwiɗi
7 Djabarã, mʉ̃a bãrãa ɓʉẽ́ ɓʉa Ãcõrẽba obi ɓʉ beɗea djiwiɗida, ãtebʉrʉ ɓʉ́ ɓʉa idjia naẽna obi jaraɗada.* Maʉ̃ obi jaraɗara bãrãba Crito ĩjãpeɗaɗaɗeba ʉ̃taa cawa panʉa. Wãrãda bãrãba ũrĩpeɗaɗara Ãcõrẽba naẽna obi jaraɗa basía.
8 Mãwãmĩna mʉ̃a ɓʉbʉrʉra Ãcõrẽba obi ɓʉ beɗea djiwiɗi quĩrãca ɓʉa. Maʉ̃ beɗeara djiwiɗi quĩrãca ɓʉa Critoba ĩjã oɗa bẽrã idjaɓa bãrã biɗa wãrãda ĩjã o panʉ bẽrã. Djiwiɗi quĩrãca ɓʉa pãĩma jãrãdrʉbʉrʉ quĩrãca bãrãba cadjiruara igara wãbʉda bẽrã. Idjaɓa djiwiɗi quĩrãca ɓʉa wãrã ʉ̃naa odjabʉrʉ quĩrãca bãrãba quĩrĩãneba jipa o wãbʉda bẽrã.
9 Bariduaba ʉ̃naane ɓʉaɗa aibʉrʉ, baribʉrʉ idji djabada quĩrãma ɓaibʉrʉ, waɗibiɗa pãĩmane ɓʉa.
10 Idji djaba quĩrĩã ɓʉra ʉ̃naane ɓʉa. Idji soɗe neẽ́a cãrẽba cadjiruaɗe ɓaebida.
11 Baribʉrʉ idji djaba quĩrãma ɓʉra pãĩmane ɓʉa. Pãĩmane nĩ bẽrã adua ɓʉa sãmaa wãda, pãĩmaba idjira dauɓerrea eroɓʉ bẽrã.
12 Warrarã, mʉ̃a naʉ̃ cartara bãrãa ɓʉbʉrʉa Ãcõrẽba Critoɗeba bãrã cadjiruara quĩrãdoaɗa bẽrã.
13 Drõãrã, mʉ̃a naʉ̃ cartara bãrãa ɓʉbʉrʉa naãrãeɗa ɓaɗada waɗibiɗa ɓʉda cawa panʉ bẽrã.
Cũdrarã, mʉ̃a naʉ̃ cartara bãrãa ɓʉbʉrʉa diaurura poyapeɗaɗa bẽrã.
Warrarã, mʉ̃a naʉ̃ cartara bãrãa ɓʉbʉrʉa dadji Zeza Ãcõrẽra cawasiɗa bẽrã.
14 Drõãrã, mʉ̃a naʉ̃ cartara bãrãa ɓʉbʉrʉa naãrãeɗa ɓaɗada waɗibiɗa ɓʉda cawasiɗa bẽrã.
Cũdrarã, mʉ̃a naʉ̃ cartara bãrãa ɓʉbʉrʉa bio ĩjã panʉ bẽrã, Ãcõrẽ beɗeara bãrã soɗe ɓʉ bẽrã, idjaɓa diaurura poyapeɗaɗa bẽrã.
15 Naʉ̃ ẽjũãnebema crĩchara, ne jũma cadjirua naʉ̃ ẽjũãne ɓʉ siɗa quĩrĩãrãnadua. Naʉ̃ ẽjũãnebema cadjirua quĩrĩã ɓʉba dadji Zeza Ãcõrẽra quĩrĩãẽ́ ɓʉa.
16 Naʉ̃ ẽjũãnebema cadjiruara naʉ̃gʉa: naʉ̃ cacuaba awua ɓʉ cadjirua o ɓaida, dadji dauba unu ɓʉ awua ɓaida, idjaɓa dadjia eroɓʉ carea wa o ɓʉ carea ara dadjida dji biara ɓʉda crĩcha ɓai siɗa. Jũma maʉ̃gʉra dadjirã Zeza Ãcõrẽneba zeẽ́ ɓʉa, ãtebʉrʉ naʉ̃ ẽjũã cadjiruaɗeba ze ɓʉa.
17 Naʉ̃ ẽjũã cadjiruara idjaɓa jũma cadjirua ẽberãrãba o awua panʉ siɗa jõya. Baribʉrʉ Ãcõrẽba jara ɓʉ ĩjã o ɓʉra ewariza idji ume zocai ɓaya.
Crito ume dji quĩrũ
18 Djabarã mʉ̃ warrarãca ɓea, naʉ̃ ewarira jõboɗoa. Bãrãba ũrĩsiɗaa Crito ume dji quĩrũda zeida.* Crito ume dji quĩrũrã iɗira baraa. Maʉ̃ bẽrã dadjirãba cawa panʉa naʉ̃ ewarira jõboɗoda.
19 Ãdjirãra dadjirã ume pananada ẽdrʉsiɗaa, baribʉrʉ wãrãda dadjirãnebemaẽ́ basía. Ãdjirãda wãrãda dadjirãnebema baɗabara, dadjirã ume ãbaa waɗi panacasiɗaa. Baribʉrʉ maʉ̃gʉra mãwãsia ebuɗa ɓamãrẽã jũmarãda dadjirãnebemaẽ́da.
20 Baribʉrʉ bãrãba Ãcõrẽ Jaure Critoba diaɗada eropanʉa. Idjiɗeba jũma bãrãba wãrã beɗeara cawa panʉa.
21 Mʉ̃a naʉ̃ cartara ɓʉẽ́ ɓʉa bãrãba wãrã beɗeada adua panʉ bẽrã ãtebʉrʉ ɓʉbʉrʉa cawa panʉ bẽrã. Idjaɓa bãrãba cawa panʉa sewara wãrãneba zecada.
22 ¿Caida sewaiɗa ɓʉ? Jesura Ãcõrẽba diai jaraɗa ẽdrʉ edabariẽ́ana a ɓʉda sewaiɗa ɓʉa.* Idjira Crito ume dji quĩrũa. Idjia dadji Zeza Ãcõrẽra, Ãcõrẽ Warra siɗa igara ɓʉa.
23 Ãcõrẽ Warra igara ɓʉba dadji Zeza Ãcõrẽra neẽ́ ɓʉa. Jesura Ãcõrẽ Warraaɗa a ɓʉba dadji Zeza Ãcõrẽ siɗa eroɓʉa.
24 Maʉ̃ bẽrã bãrãba ĩjãpeɗaɗaɗeba ʉ̃taa Critoɗebema ũrĩ panʉra bãrã soɗe bio waga eroɓeaɗadua. Maʉ̃da bio waga panʉbʉrʉ, bãrãra dadji Zeza Ãcõrẽ ume, idji Warra ume biɗa ãbaa panʉa.
25 Mãwã ãbaa panʉbʉrʉ, Critoba dadjirãa wãrãneba jarasia ewariza Ãcõrẽ ume zocai pananida.
26 Mʉ̃a maʉ̃ra ɓʉsia ʉ̃cʉrʉba bãrãra cũrũga quĩrĩã panʉ bẽrã.
27 Baribʉrʉ bãrãba Ãcõrẽ Jaure Critoba diaɗara eropanʉa. Maʉ̃ bẽrã jʉrʉɗiẽ́ panʉa dewararãba bãrãa jaradiaɗamãrẽã. Ãcõrẽ Jaureba bãrãa ne jũmada jaradia ɓʉa. Idjia jaradia ɓʉra sewaẽ́a, ãtebʉrʉ wãrã araa. Maʉ̃ carea Crito ume ãbaa ɓeaɗadua Ãcõrẽ Jaureba bãrãa jaradiaɗa quĩrãca.
28 Djabarã mʉ̃ warrarãca ɓea, Crito ume ãbaa ɓeaɗadua. Mãwã idji zebʉrʉɗe dadjirãra ne wayaa neẽ́, quĩrã pera neẽ́ idji quĩrãpita ɓeaɗia.
29 Bãrãba cawa panʉa Jesucritora jipa ɓʉda. Idjaɓa cawa panʉa jũma jipa o ɓeara Ãcõrẽ warrarãda.
