1 Juaʉ̃ 3:1-24
3 Crĩchaɗadua sãwã dadji Zeza Ãcõrẽba dadjirãra jãcua quĩrĩã ɓʉda. Jãcua quĩrĩã ɓʉ bẽrã dadjirãra idji warrarãana abaria. Wãrãda dadjirãra idji warrarãa. Naʉ̃ ẽjũãnebemarãba dadjirãra Ãcõrẽ warrarãda adua panʉa, Ãcõrẽra adua panʉ bẽrã.
2 Djabarã, dadjirãra Ãcõrẽ warrarãa. Mãwãmĩna Ãcõrẽba waɗibiɗa cawabiẽ́ ɓʉa dadjirãra sãwã ɓeaɗida. Baribʉrʉ dadjirãba cawa panʉa Crito zebʉrʉɗe idji quĩrãca ɓeaɗida, maʉ̃ ewariɗe idjira sãwãbʉrʉ ɓʉda ununi bẽrã.
3 Crito quĩrãca ɓai carea jʉ̃ã ɓʉra cadjirua neẽ́ ɓabaria Crito cadjirua neẽ́ ɓʉ quĩrãca.
4 Cadjirua o ɓʉba Ãcõrẽ beɗeara ĩjã ocaa. Idjia maʉ̃ beɗeara aɓeɗa igara ɓʉa.
5 Baribʉrʉ bãrãba cawa panʉa Jesucritora naʉ̃ ẽjũãnaa zesida dadjirã cadjirua ãyã ɓʉi carea. Ni maãrĩ biɗa idjira cadjirua neẽ́ ɓʉa.
6 Idji ume ãbaa ɓʉba cadjiruara ocaa. Baribʉrʉ cadjirua o ɓʉba Jesucritora adua ɓʉa idjaɓa sãwãbʉrʉ ɓʉda cawacaa.
7 Djabarã mʉ̃ warrarãca ɓea, ni aɓaʉa idu cũrũgabirãnadua. Jipa o ɓʉra Ãcõrẽ quĩrãpita jipa ɓʉa Crito jipa ɓʉ quĩrãca.
8 Baribʉrʉ cadjirua o ɓʉra diauruɗea, diaurura naãrãeɗaʉba cadjirua obari bẽrã. Ãcõrẽ Warrara naʉ̃ ẽjũãnaa zesia diauruba o ɓʉ poyai carea.
9 Ãcõrẽneba toɗaba cadjiruara o ɓacaa, idji Zeza Ãcõrẽba obari quĩrãca o ɓʉ bẽrã. Ãcõrẽneba toɗa bẽrã cadjiruara o ɓaẽ́a.
10 Naʉ̃gʉɗeba dadjirãba cawa panʉa cairãda Ãcõrẽ warrarãda idjaɓa cairãda diauru warrarãda. Jipa oẽ́ ɓʉra Ãcõrẽ warraẽ́a. Idjaɓa idji djaba quĩrĩãẽ́ ɓʉra Ãcõrẽ warraẽ́a.
Dji quĩrĩã ɓeaɗida panʉa
11 Bãrãba ĩjãpeɗaɗaɗeba ʉ̃taa ũrĩ panʉ beɗeara naʉ̃gʉa: dadjirãra dji quĩrĩã ɓeaɗida panʉa.
12 Caiʉ̃ quĩrãca ɓeaɗiẽ́ panʉa.* Idjira diauruɗe basía. Maʉ̃ bẽrã idji djabara beasia. ¿Cãrẽ cãrẽã idji djabara beasi? Beasia idji djababa o ɓaɗara Ãcõrẽ quĩrãpita bia ɓaɗa bẽrã baribʉrʉ idjia oɗara biẽ́ ɓaɗa bẽrã.
13 Djabarã, naʉ̃ ẽjũãnebemarãba bãrãda quĩrãmanibʉrʉ, jũmawãyã crĩcharãnadua.
14 Dadjirãba djabarãra quĩrĩã panʉ bẽrã cawa panʉa dadjirãra beu pananada zocai panesiɗada. Idji djaba quĩrĩãẽ́ ɓʉra waɗibiɗa beu ɓʉa.
15 Idji djaba quĩrãma ɓʉra Ãcõrẽ quĩrãpita mĩã beabaria. Bãrãba cawa panʉa mĩã beabarira ewariza Ãcõrẽ ume zocai ɓaẽ́da.
16 Wãrã quĩrĩãra sãwãbʉrʉ ɓʉda dadjirãba cawa panʉa naʉ̃gʉɗeba: Jesucritora dadjirã carea beusia. Ara maʉ̃ quĩrãca dadjirã siɗa quĩrĩãneba djabarã carea beuɗi carea ɓeaɗida panʉa.
17 Naʉ̃ ẽjũãne ne bara ɓʉ djababa ne neẽ́ ɓʉ djabada unu ɓʉda carebaẽ́bʉrʉ, ¿Ãcõrẽ quĩrĩãra idji soɗe eroɓʉca? Neẽ́ ɓʉa.
18 Djabarã mʉ̃ warrarãca ɓea, dadjirã quĩrĩãra aɓabe beɗeaɗeba ɓaiẽ́ ɓʉa, ãtebʉrʉ dadjia o panʉneba wãrãda quĩrĩã bara panʉda unubiɗida panʉa.
19 3:19-20 Maʉ̃neba cawa panʉa dadjirãra wãrãda Ãcõrẽneda. Idjaɓa ara dadjirãda soɗe dji biaẽ́da crĩchaɗibʉrʉ, Ãcõrẽ quĩrãpita poya necai panania. Ãcõrẽba dadjirãnebemada biara cawa ɓʉa dadjirã soɗe crĩcha panʉ cãyãbara. Idjia aɓeɗa jũma cawa ɓʉa.
21 Djabarã, dadjirã soɗe cawa panʉbʉrʉ cadjiruaɗe panʉẽ́da, ne wayaa neẽ́ Ãcõrẽa poya iwiɗiɗia.
22 Maʉ̃ne dadjirãba Ãcõrẽa iwiɗibʉdara idjia diaya, idjia obi ɓʉda idjaɓa bia unu ɓʉda ĩjã o panʉ bẽrã.
23 Idjia obi ɓʉra naʉ̃gʉa: idji Warra Jesucritora ĩjãnida idjaɓa dji quĩrĩã ɓeaɗida idjia dadjirãa jaraɗa quĩrãca.
24 Ãcõrẽba obi ɓʉ beɗea ĩjã o ɓʉra Ãcõrẽ ume ɓʉa, idjaɓa Ãcõrẽra idji ume ɓʉa. Dadjirãba cawa panʉa Ãcõrẽra dadjirã ume ɓʉda, idji Jaureda dadjirãa diaɗa bẽrã.
Beɗea eɗaare
^ 3:12. Genesi 4:1-15.
