1 Juaʉ̃ 4:1-21
4 Djabarã, Ãcõrẽ Jaureɗeba beɗea panʉana abadara jũma ĩjãrãnadua, ãtebʉrʉ quĩrãcuita acʉɗadua ãdjia wãrãda Ãcõrẽ Jaureɗeba wa dewaraɗeba beɗea panʉ cawaya. Mãwã oɗadua zocãrãba naʉ̃ ẽjũãne sewaɗeba ãdjia Ãcõrẽ Jaureɗeba beɗea panʉana abada bẽrã.
2 Nãwãbʉrʉ bãrãba cawaɗia caida Ãcõrẽ Jaureɗeba beɗea ɓʉda: aɓaʉba Jesucritora naʉ̃ djaraɗe wãrãda zesiaɗa aibʉrʉ, Ãcõrẽ Jaureɗeba beɗea ɓʉa.
3 Baribʉrʉ aɓaʉba Jesucritora naʉ̃ djaraɗe zeẽ́ basiaɗa aibʉrʉ, Ãcõrẽ Jaureɗeba beɗea ɓʉẽ́a. Crito ume dji quĩrũneba beɗea ɓʉa.* Bãrãba ũrĩsiɗaa Crito ume dji quĩrũra zeida ɓʉda. Wãrãda idjira ara nawena naʉ̃ ẽjũãne ɓʉa.
4 Djabarã mʉ̃ warrarãca ɓea, bãrãra Ãcõrẽnea. Bãrãba maʉ̃ sewaiɗa ɓeaa idu cũrũgabiɗaẽ́ basía bãrã soɗe ɓʉra naʉ̃ ẽjũãne ɓea soɗe ɓʉ cãyãbara ʉɓʉara ɓʉ bẽrã.
5 Maʉ̃ sewaiɗa ɓeara naʉ̃ ẽjũã cadjiruaɗebemaa. Maʉ̃ bẽrã ãdjirãba naʉ̃ ẽjũãnebema crĩchada jaradiabadaa idjaɓa ãdjia jaradia panʉra naʉ̃ ẽjũãne Ãcõrẽ adua ɓeaba ĩjãbadaa.
6 Baribʉrʉ dadjirãra Ãcõrẽnea. Ãcõrẽ cawa ɓʉba dadjia jaradia panʉra ĩjãbaria. Baribʉrʉ Ãcõrẽ adua ɓʉba dadjia jaradia panʉra ĩjãcaa. Maʉ̃neba dadjirãba cawa panʉa caiba Ãcõrẽ Jaureɗeba wãrã beɗeara jaradia ɓʉda idjaɓa caiba dewara jaureɗeba sewara jaradia ɓʉda.
Ãcõrẽba ẽberãrã quĩrĩã ɓʉɗebema
7 Djabarã, dadjirãra dji quĩrĩã ɓeaɗida panʉa, wãrã quĩrĩãra Ãcõrẽneba ze ɓʉ bẽrã. Jũma dji quĩrĩã eroɓeara Ãcõrẽ warrarãa idjaɓa Ãcõrẽra cawa panʉa.
8 Ãcõrẽra ne jũmane quĩrĩã bara ɓʉ bẽrã quĩrĩã neẽ́ ɓʉba Ãcõrẽra adua ɓʉa.
9 Ãcõrẽba dadjirãra quĩrĩã ɓʉda unubisia idji Warra aɓa ɓʉda naʉ̃ ẽjũãnaa diabuesiɗe idjiɗeba ewariza zocai ɓeaɗamãrẽã.
10 Wãrã quĩrĩãra nãwãbʉrʉ ɓʉa: quĩrĩãneba Ãcõrẽba idji Warrara diabuesia beumãrẽã dadjirã cadjirua poya quĩrãdoai carea. Ãcõrẽba mãwã oẽ́ basía dadjirãba idjira quĩrĩã panana bẽrã, ãtebʉrʉ mãwã osia idjia dadjirãra quĩrĩãna bẽrã.
11 Djabarã, Ãcõrẽba dadjirãra mãwã quĩrĩãna bẽrã dadjirã siɗa dji quĩrĩã ɓeaɗida panʉa.
12 Ni aɓaʉba Ãcõrẽra ununacaa. Baribʉrʉ dadjirãda dji quĩrĩã panʉbʉrʉ, Ãcõrẽra dadjirã ume ɓʉa idjaɓa idji quĩrĩãneba dadjirãba wãrãda jũmarãda quĩrĩã panʉa.
13 Ãcõrẽba idji Jaureda dadjirãa diaɗa bẽrã cawa panʉa dadjirãra Ãcõrẽ ume panʉda idjaɓa idjira dadjirã ume ɓʉda.
14 Daiba unusiɗaa idjaɓa jara panʉa dadjirã Zeza Ãcõrẽba idji Warrara wãrãda diabuesida naʉ̃ ẽjũãnebemarã ẽdrʉ edamãrẽã.
15 Bariduaba Jesura wãrãda Ãcõrẽ Warraaɗa aibʉrʉ, Ãcõrẽra idji ume ɓʉa idjaɓa idjira Ãcõrẽ ume ɓʉa.
16 Dadjirãba cawa panʉa idjaɓa ĩjã panʉa Ãcõrẽba dadjirãra quĩrĩã ɓʉda. Ãcõrẽba ne jũmane quĩrĩã ɓʉa. Wãrã quĩrĩã eroɓʉra Ãcõrẽ ume ɓʉa idjaɓa Ãcõrẽra idji ume ɓʉa.
17 Mãwã dadjirãba Ãcõrẽra, jũma ẽberãrã siɗa wãrãda quĩrĩã panʉa. Ãcõrẽba cawa oi ewariɗe dadjirãra ne wayaa neẽ́ ɓeaɗia, naʉ̃ ẽjũãne Jesucrito nĩbaɗa quĩrãca nĩbapeɗaɗa bẽrã.
18 Dadjirãba Ãcõrẽda, jũma ẽberãrã siɗa quĩrĩã panʉbʉrʉ, Ãcõrẽba cawa oiɗebemada wayaɗaẽ́ panʉa, wãrã quĩrĩãba maʉ̃ wayaɗira jõbibari bẽrã. Ãcõrẽba cawa oi waya ɓʉba cawa ɓʉa Ãcõrẽba idjira cawa oida. Idjia Ãcõrẽra, jũma ẽberãrã siɗa waɗibiɗa wãrãda quĩrĩã ɓʉẽ́a.
19 Dadjirãba Ãcõrẽra quĩrĩã panʉa idjia dadjirãra naãrã quĩrĩãna bẽrã.
20 Aɓaʉba Ãcõrẽda quĩrĩã ɓʉaɗa aibʉrʉ, maʉ̃ne idji djabada quĩrãma ɓaibʉrʉ, idjira sewaiɗa ɓʉa. Idji djaba unu ɓʉda quĩrĩãẽ́ ɓaibʉrʉ, ¿sãwã Ãcõrẽ unuẽ́ ɓʉda quĩrĩã ɓai?
21 Jesucritoba dadjirãa obi ɓʉra naʉ̃gʉa: Ãcõrẽ quĩrĩã ɓʉba idji djabara quĩrĩã ɓaida ɓʉa.
Beɗea eɗaare
^ 4:3. Crito ume dji quĩrũ. Griego beɗeaɗe “Anticrito” ɓʉ́ ɓʉa.
