1 Juaʉ̃ 5:1-21
5 Jesura Ãcõrẽba ẽdrʉ edabari diai jaraɗada aɓaʉba ĩjãibʉrʉ, maʉ̃ ẽberãra Ãcõrẽ warraa.* Dadji Zeza Ãcõrẽ quĩrĩã ɓʉba idji warrarã siɗa quĩrĩã ɓʉa.
2 Dadjirãba Ãcõrẽda quĩrĩã panʉbʉrʉ idjaɓa idjia obi ɓʉda ĩjã o panʉbʉrʉ, cawa panʉa idji warrarã siɗa quĩrĩã panʉda.
3 Dadjirãba Ãcõrẽda wãrãda quĩrĩã panʉbʉrʉ, idjia obi ɓʉra jũma ĩjã oɗia. Idjia obi ɓʉra zareaẽ́ ɓʉa.
4 Jũma Ãcõrẽ warrarãba naʉ̃ ẽjũãnebema cadjiruara igarabadaa. Wãrãda dadjia Jesucritoda ĩjã panʉ bẽrã naʉ̃ ẽjũãnebema cadjiruara poya igaraɗia.
5 ¿Caiba naʉ̃ ẽjũãnebema cadjiruara poya igarai? Aɓaʉba Jesura wãrãda Ãcõrẽ Warrada ĩjã ɓʉbʉrʉ, maʉ̃ ẽberãba naʉ̃ ẽjũãnebema cadjiruara poya igaraya.
Ãcõrẽ Jaureba Jesura wãrãda Ãcõrẽ Warra cawabiɗa
6 Jesucritora naʉ̃ ẽjũãnaa zepeɗa baidoɗe borocuesia idjaɓa idji oara cruɗe erozoasia. Naʉ̃ ẽjũãnaa zepeɗa aɓabe baidoɗe borocueẽ́ basía, ãtebʉrʉ idji oa siɗa cruɗe erozoasia. Ãcõrẽ Jaureba cawabi ɓʉa maʉ̃gʉra wãrãda, idjia wãrã beɗeara cawabibari bẽrã. [
7 Idjaɓa bajãne ũbea panʉba maʉ̃gʉra wãrã arada jara panʉa; dadji Zeza Ãcõrẽba mãwã jara ɓʉa, “Beɗea” abadaba mãwã jara ɓʉa, idji Jaure biɗa mãwã jara ɓʉa. Maʉ̃ ũbeara aɓa ɓʉda mãwã ɓʉa.*]
8 Naʉ̃ sẽyã ũbea panʉba cawabibadaa Jesuɗebema beɗeara wãrãda: Jesura borocueɗa bẽrã, idji oara cruɗe erozoaɗa bẽrã, idjaɓa Ãcõrẽ Jaureba cawabi ɓʉ bẽrã. Maʉ̃ ũbea panʉba aɓarida cawabi panʉa.
9 Ẽberãba ununara wãrãana aibʉrʉ dadjirãba ĩjãbadaa. Baribʉrʉ Ãcõrẽba jara ɓʉra biara ĩjãnida panʉa, idji Warraɗebemada wãrãda jara ɓʉ bẽrã.
10 Ãcõrẽ Warra ĩjã ɓʉba idji soɗe cawa ɓʉa Ãcõrẽba jara ɓʉra wãrãda. Baribʉrʉ Ãcõrẽba jara ɓʉ ĩjãẽ́ ɓʉba Ãcõrẽra sewaiɗa ɓʉda crĩcha ɓʉa, Ãcõrẽba idji Warraɗebema jara ɓʉra ĩjãẽ́ ɓʉ bẽrã.
11 Ãcõrẽba jara ɓʉra naʉ̃gʉa: idji Warraɗeba dadjirãa diasia ewariza idji ume zocai ɓeaɗida.
12 Wãrãda Ãcõrẽ Warra ĩjã ɓʉra idji ume ewariza zocai ɓaya. Baribʉrʉ Ãcõrẽ Warra ĩjãẽ́ ɓʉba idji ume ewariza zocai ɓaida neẽ́ ɓʉa.
Juaʉ̃ba naʉ̃ cartaɗe jĩrũare ɓʉɗa
13 Mʉ̃a naʉ̃ cartara bãrã dji Ãcõrẽ Warra ĩjã ɓea itea ɓʉbʉrʉa cawaɗamãrẽã ewariza Ãcõrẽ ume zocai ɓeaɗida.
14 Ãcõrẽba quĩrĩã ɓʉ quĩrãca dadjirãba iwiɗiɗibʉrʉ, cawa panʉa idjia bia ũrĩbarida. Maʉ̃ bẽrã poya ne wayaa neẽ́ idjía iwiɗiɗida panʉa.
15 Dadjia iwiɗibʉdara ũrĩbarida cawa panʉ bẽrã, idjaɓa cawa panʉa maʉ̃ iwiɗibʉdara idjia diaida.
16 Cadjiruada ɓʉa Ãcõrẽba quĩrãdoacada. Aɓaʉba maʉ̃ cadjiruada osira beuya. Maʉ̃ bẽrã mʉ̃a jaraẽ́ ɓʉa ẽberã maʉ̃ cadjirua oɗa carea iwiɗiɗamãrẽã. Baribʉrʉ cadjiruada ɓʉa Ãcõrẽba quĩrãdoabarida. Aɓaʉba maʉ̃ cadjiruada osira waɗibiɗa poya ẽdrʉya ewariza Ãcõrẽ neẽ́ ɓaiɗebemada.* Maʉ̃ bẽrã aɓaʉba idji djababa maʉ̃ cadjiruada o ɓʉda unuibʉrʉ, idji carea Ãcõrẽa iwiɗida ɓʉa. Maʉ̃ne Ãcõrẽba dji ẽberã cadjirua oɗaa idji ume ewariza zocai ɓaida diaya.
17 Jũma Ãcõrẽ quĩrãpita biẽ́ o ɓʉra cadjiruaa. Baribʉrʉ cadjiruada ɓʉa Ãcõrẽba quĩrãdoabarida. Aɓaʉba maʉ̃ cadjiruada osira waɗibiɗa beuɗebemada poya ẽdrʉya.
18 Dadjirãba cawa panʉa Ãcõrẽ warrarãba cadjiruara o pananacada, Ãcõrẽ Warra Jesucritoba ãdjirãra waga ɓʉ bẽrã. Maʉ̃ba diauruba ãdjirãra poya biẽ́ oẽ́a.
19 Dadjirãba cawa panʉa dadjirãra Ãcõrẽneda. Idjaɓa cawa panʉa jũma naʉ̃ ẽjũãne Ãcõrẽ adua ɓeara diauru jʉwaeɗa panʉda.
20 Dadjirãba cawa panʉa Ãcõrẽ Warrara zesida idjaɓa crĩcha cawaada dadjirãa diasida wãrã Ãcõrẽda cawaɗamãrẽã. Idji Warra Jesucrito ume panʉ bẽrã dadjirãra wãrã Ãcõrẽ ume panʉa. Ãcõrẽdrʉ dji wãrã Ãcõrẽa. Idjiabʉrʉ ẽberãrãa diabaria idji ume ewariza zocai ɓeaɗida.
21 Djabarã mʉ̃ warrarãca ɓea, jʉwaba oɗa ãcõrẽ ɓeara ẽpẽrãnadua.
