1 Corinto 1:1-31
1 Mʉ̃ra Pauloa. Ãcõrẽba quĩrĩãna bẽrã mʉ̃ra trʉ̃sia Jesucritoba diabueɗada ɓamãrẽã. Dadjirã djaba Sosteneda mʉ̃ ume ɓʉa.
2 Mʉ̃a naʉ̃ cartara ɓʉbʉrʉa Ãcõrẽ ẽberãrã Corinto puruɗebema itea. Jesucritoɗeba Ãcõrẽba bãrãra edasia idji itea bia ɓeaɗamãrẽã. Ara maʉ̃ quĩrãca idjia druaza jũma dadjirã Boro Jesucritoa iwiɗibadara edasia. Idjira ãdjirã Boroa idjaɓa dadjirã Boroa.
3 Daiba quĩrĩã panʉa dadjirã Zeza Ãcõrẽba, dadjirã Boro Jesucrito biɗa ãdji biaɗeba bãrãra careba pananida idjaɓa necai ɓaira dia pananida.
Pauloba djabarã carea Ãcõrẽa bia ɓʉaɗa aɗa
4 Bãrãra Jesucrito ume panʉ bẽrã Ãcõrẽba idji biaɗeba careba ɓʉa. Maʉ̃ bẽrã mʉ̃a Ãcõrẽa iwiɗibʉrʉza bãrã carea bia ɓʉaɗa abaria.
5 Jesucrito ume panʉ bẽrã Ãcõrẽba bãrãa jũma diasia bia oɗamãrẽã. Idji beɗeara poya cawa jaradia panania idjaɓa idjiɗebemada poya bio cawa panania.
6 Jũma Ãcõrẽba bãrãa diaɗaba unubi ɓʉa Crito beɗea daiba jaradiapeɗaɗara wãrã arada.
7 Bãrãba dadjirã Boro Jesucrito ununi carea jʉ̃ã panʉmisa Ãcõrẽba idji Jaureɗeba dia ɓʉra jũma eropanʉa.
8 Maʉ̃ba Ãcõrẽba bãrãra zarea eroɓaya aɓa naʉ̃ ewari jõbʉrʉɗaa. Mãwãra dadjirã Boro Jesucritoba cawa oɗe zebʉrʉɗe bãrãra biẽ́ jaraɗi neẽ́ ɓeaɗia.
9 Ãcõrẽra beɗea aɓa ɓʉa. Idjia bãrãra trʉ̃sia idji Warra dadjirã Boro Jesucrito ume ãbaa ɓeaɗamãrẽã.
Djabarã crĩcha awara awara panʉnebema
10 Djabarã, dadjirã Boro Jesucritoɗeba mʉ̃a bãrãa beɗea djuburiaya ãbaa bia duananamãrẽã. Crĩcha awara awara duananiẽ́ panʉa, ãtebʉrʉ crĩcha aɓaʉɗeba ãbaa bia duananida panʉa.
11 Djabarã, mʉ̃a ũrĩna carea mãwã jara ɓʉa. Djabawẽrã Cloe ẽberãrãba mʉ̃́a jarasiɗaa bãrãra ijara duanabarida.
12 Ebuɗa jaraibʉrʉ, ʉ̃cʉrʉ bãrãnebemaba jarabadaa: “Mʉ̃ra Pauloɗea.” Dewararãba jarabadaa: “Mʉ̃ra Apoloɗea.” Dewararãba jarabadaa: “Mʉ̃ra Pedroɗea.”* Idjaɓa dewararãba jarabadaa: “Mʉ̃ra Critoɗea.”
13 Mãwãra ¿Critora zocãrã ɓʉca? ¿Mʉ̃da bãrã carea cruɗe cachisiɗaca? ¿Bãrãra mʉ̃ trʉ̃neba borocuesiɗaca?
14 Mʉ̃a ni aɓaʉ bãrãnebemada borocueɗaẽ́ bẽrã ɓʉsriɗa ɓʉa. Mʉ̃a aɓabe djaba Crispoda, Gayo siɗa borocuesia.
15 Mãwã ni aɓaʉba poya jaraɗaẽ́a mʉ̃ trʉ̃neba borocuesiɗada.
16 Idjaɓa mʉ̃a djaba Estepana ẽberãrã siɗa borocuesia. Ãdjirã awara dewarada borocuesibʉrʉ mʉ̃a quĩrãnebaẽ́a.
17 Critoba mʉ̃ra diabueẽ́ basía ẽberãrã borocue ɓamãrẽã, ãtebʉrʉ diabuesia beɗea bia idjiɗebemada jaradiamãrẽã. Baribʉrʉ naʉ̃ duɗabema necawaaɗeba mʉ̃a jaradiaẽ́ ɓʉa Crito cruɗe beuɗada ara idji quĩrĩãbe beuɗa quĩrãca ɓerãmãrẽã.
Critora Ãcõrẽ necawaa idjaɓa Ãcõrẽ ʉɓʉaa
18 Tʉbʉ uruaɗaa wãni ẽberãrãmaarã Crito cruɗe beuɗaɗebema beɗeara siriẽ́ ɓʉa. Baribʉrʉ dadjirã, dji Ãcõrẽba ẽdrʉ edaɗarãba cawa panʉa maʉ̃ beɗeaba Ãcõrẽ ʉɓʉara cawabi ɓʉda.
19 Ãcõrẽ Beɗeaɗe nãwã ɓʉ́ ɓʉa:
Ne cawa ɓea necawaada mʉ̃a siriẽ́ ɓʉda unubiya. Crĩcha cawa ɓea crĩchara biẽ́ taɓʉda cawabiya.*
20 Wãrãda Ãcõrẽba naʉ̃ ẽjũãnebema necawaara siriẽ́ ɓʉda cawabisia. Jãʉ̃be ¿ne cawa ɓeara sãwãsiɗa? ¿Judiorã ley jaradiabadara sãwãsiɗa? ¿Naʉ̃ ewariɗe necawaaɗeba beɗeabadara sãwãsiɗa?
21 Ãcõrẽba idji necawaaɗeba oɗaba idjida cawabi ɓʉa. Baribʉrʉ naʉ̃ ẽjũãnebemarãba ara ãdji necawaaɗeba idjira cawaɗacaa.* Ãdjirãmaarã daiba jaradia panʉra siriẽ́ ɓʉmĩna Ãcõrẽmaarã bia ɓasia maʉ̃neba jũma idji ĩjãbʉdara ẽdrʉ edaida.
22 Crito ĩjãni carea judiorãba ne ununacada unu quĩrĩãbadaa. Judiorãẽ́ba naʉ̃ ẽjũãnebema necawaada jʉrʉbadaa.
23 Baribʉrʉ daiba Crito cruɗe beuɗada jaradia panʉa. Maʉ̃ beɗeara judiorãba bia ũrĩnacaa. Idjaɓa judiorãẽ́ba maʉ̃ beɗeara siriẽ́ ɓʉda crĩchabadaa.
24 Baribʉrʉ Ãcõrẽba ʉ̃cʉrʉ judiorãda, ʉ̃cʉrʉ judiorãẽ́ siɗa trʉ̃sia Critoɗeba ẽdrʉ edai carea. Maʉ̃gʉrãba cawa panʉa Ãcõrẽba Critoɗeba idji ʉɓʉada, necawaa siɗa unubisida.
25 Ẽberãrãmaarã Critora cruɗe beuɗa bẽrã Ãcõrẽra ne cawa ɓʉẽ́a, ʉɓʉaẽ́ ɓʉa. Baribʉrʉ ne adua ɓʉ quĩrãca ɓʉmĩna Ãcõrẽra jũma naʉ̃ ẽjũãnebemarã cãyãbara ne cawaara ɓʉa. Idjaɓa Ãcõrẽra ʉɓʉaẽ́ ɓʉca ɓʉmĩna jũma naʉ̃ ẽjũãnebemarã cãyãbara ʉɓʉara ɓʉa.
26 Djabarã, crĩchaɗadua Ãcõrẽba bãrã edasiɗe sãwã ɓeasida. Ẽberãmaarã zocãrã bãrãnebemada ne cawa ɓeaɗaẽ́ basía, dji dromada ɓeaɗaẽ́ basía, dji droma ɓeaɗeba toɗaẽ́ basía.
27 Maʉ̃ bẽrã naʉ̃ ẽjũãnebema ne cawa ɓeamaarã bãrãra ne adua queɗeaa. Baribʉrʉ ãdjirãba ne adua queɗea abadara Ãcõrẽba edasia. Mãwã naʉ̃ ẽjũãnebema ne cawa ɓeara perabibaria. Ara maʉ̃ quĩrãca naʉ̃ ẽjũãnebema ʉɓʉa ɓeamaarã bãrãra ʉɓʉaẽ́ ɓeaa. Baribʉrʉ ãdjirãba ʉɓʉaẽ́ ɓea abadara Ãcõrẽba edasia. Mãwã naʉ̃ ẽjũãnebema ʉɓʉa ɓeara perabibaria.
28 Naʉ̃ ẽjũãnebemarãba dji eɗaara queɗea abadara, ãdjia igarabada siɗa Ãcõrẽba edasia. Mãwã dji dromaẽ́ ɓeara edasia dji droma ɓea eɗaara ɓʉi carea.
29 Maʉ̃ bẽrã ni aɓaʉba ara idjiɗebemada Ãcõrẽ quĩrãpita poya bia beɗeaɗaẽ́a.
30 Baribʉrʉ Ãcõrẽba bãrãra Jesucrito ume ãbaa ɓʉsia. Mãwã Critoɗeba Ãcõrẽba idji necawaada dadjirãa cawabisia. Idjia dadjirãra jipa ɓʉsia, ara idji itea bia ɓʉsia, idjaɓa cadjiruaɗebemada ẽdrʉ edasia.
31 Maʉ̃ bẽrã Ãcõrẽ Beɗeaɗe ɓʉ́ ɓʉ quĩrãca dadjia oɗida panʉa. Nãwã ɓʉ́ ɓʉa: “Aɓaʉda bia beɗeaibʉrʉ, dadji Boroɗebemada bia beɗeaida ɓʉa.”*
Beɗea eɗaare
^ 1:12. Pedro. Griego beɗeaɗe “Cepa” ɓʉ́ ɓʉa.
^ 1:19. Isaía 29:14.
^ 1:21. Ãcõrẽba idji necawaaɗeba oɗaba idjida cawabi ɓʉa. Baribʉrʉ naʉ̃ ẽjũãnebemarãba ara ãdji necawaaɗeba idjira cawaɗacaa. Griego beɗeaɗe maʉ̃ba idjaɓa nãwã jara ɓʉa: “Ãcõrẽba idji necawaaɗeba ɓʉsia ẽberãrãba naʉ̃ ẽjũãnebema necawaaɗeba idjira poya cawarãnamãrẽã.”
^ 1:31. Jeremia 9:24.
