1 Corinto 10:1-33
10 Djabarã, mʉ̃a quĩrĩã ɓʉa bãrãba Moise ewariɗe mãwãnada quĩrãdoaɗaẽ́da. Maʉ̃ ewariɗe jũma dadji drõãenabemarã Moise ume nĩbapeɗaɗara Ãcõrẽba diabueɗa jʉ̃rãrã edre nĩbasiɗaa idjaɓa Pusa Purruɗe chãsiɗaa.*
2 Maʉ̃ pusaɗe, jʉ̃rãrã edre biɗa jũma ãdjirãra Moise ume ãbaa panasiɗa bẽrã Moise trʉ̃neba borocuepeɗaɗa quĩrãca panasiɗaa.
3 Idjaɓa jũmarãba aɓari djico Ãcõrẽba bajãneba diabueɗada cobadjiɗaa.*
4 Jũmarãba aɓari baido Ãcõrẽba mõgaraɗeba weabiɗada dobadjiɗaa.* Maʉ̃ mõgarara Critoda mãwã ɓasia, ãdjirã wãbʉdaza Critora jaureɗeba ãdjirã ume ɓaɗa bẽrã.
5 Baribʉrʉ Ãcõrẽba zocãrãda biẽ́ unusia ãdjia o panana carea. Maʉ̃ bẽrã ẽjũã põãsa ewaraga ɓʉɗe quinisiɗaa.
6 Maʉ̃ ewariɗe mãwãnaba dadjirãa cawabi ɓʉa ne cadjiruara awuaɗiẽ́ panʉda ãdjirãba awuapeɗaɗa quĩrãca.
7 Jʉwaba oɗa ãcõrẽra ẽpẽrãnadua ʉ̃cʉrʉ ãdjirãba ẽpẽpeɗaɗa quĩrãca.* Ãcõrẽ Beɗeaɗe ãdjirãnebemada nãwã ɓʉ́ ɓʉa: “Ẽberãrãra chũpanenapeɗa ɓʉsriɗa ãbaa ne co duanasiɗaa idjaɓa itua do duanasiɗaa. Mãwãnacarea piraɓariɗapeɗa ãdji cacuaba o quĩrĩã ɓʉra o duanesiɗaa.”*
8 Dadjirãba auɗuada oɗiẽ́ panʉa ʉ̃cʉrʉ ãdjirãba opeɗaɗa quĩrãca. Ãdjia mãwã o panʉ carea ewari aɓaʉɗe veintitres mil quinisiɗaa.*
9 Idjaɓa Ãcõrẽba sãwã oi cawaya dadjirãba biẽ́ oɗiẽ́ panʉa ʉ̃cʉrʉ ãdjirãba opeɗaɗa quĩrãca. Maʉ̃ carea ãdjirãra damaba zocãrã cácuapeɗa quinisiɗaa.*
10 Idjaɓa sobiẽ́ panʉneba Ãcõrẽnebemada biẽ́ beɗearãnadua ʉ̃cʉrʉ ãdjirãba opeɗaɗa quĩrãca. Maʉ̃ carea bajãnebema nezoca dadji quinibibariba ãdjirãra zocãrã quinibisia.*
11 Jũma ãdjirã mãwãnaba unubi ɓʉa sãwã Ãcõrẽba cadjiruara cawa obarida. Maʉ̃gʉra Ãcõrẽ Beɗeaɗe ɓʉ́ ɓʉa dadjirã naʉ̃ jĩrũarebema ewariɗe ɓearãba aɓari quĩrãca orãnamãrẽã.
12 Maʉ̃ bẽrã aɓaʉba bio ĩjã ɓʉda crĩcha ɓʉbʉrʉ, ara iduɓa quĩrãcuita ɓaida ɓʉa cadjiruaɗe ɓae amaaba.
13 Dadji cadjiruaɗe ɓaebida ɓʉ crĩchada bãrãmaa zebaria jũmarãmaa zebari quĩrãca. Baribʉrʉ Ãcõrẽra beɗea aɓa ɓʉa. Maʉ̃ crĩchara poya droaɗaẽ́bʉrʉ, idjia idu jũmawãyã zebiẽ́a. Idjaɓa maʉ̃ crĩcha zebʉrʉɗe Ãcõrẽba carebaya droaɗapeɗa ẽdrʉɗamãrẽã.
14 Maʉ̃ carea mʉ̃ djabarã, jʉwaba oɗa ãcõrẽra igaraɗadua.
15 Mʉ̃a bãrãa beɗeabʉrʉa crĩcha cawa ɓearãa beɗeabʉrʉ quĩrãca. Bio crĩchaɗadua mʉ̃a jara ɓʉra wãrã cawaya.
16 Crito quĩrãnebaɗi carea cobadara co panʉne dadjirãba uva ɓa tazaɗe ɓʉ carea Ãcõrẽa bia ɓʉaɗa aɗapeɗa dobadaa. Maʉ̃ dobʉdaɗe unubibadaa dadjirãra Crito oaɗeba idji ume ãbaa panʉda. Idjaɓa paʉ̃ cõrãcuaɗa cobʉdaɗe unubibadaa Crito naʉ̃ djaraɗe bia mĩgaɗaɗeba dadjirãra idji ume ãbaa panʉda.
17 Dadjirãba paʉ̃ aɓa ɓʉda zocãrã cõrãcuapeɗa cobadaa. Ara maʉ̃ quĩrãca dadjirãra zocãrã panʉmĩna cacua aɓa ɓʉ quĩrãca panʉa.
18 Israelerãba obadaɗebemada crĩchaɗadua. Ãdjirãba animarã Ãcõrẽa babue diabʉdaɗe maʉ̃ djaraɗebemada cobadaa. Maʉ̃ cobʉdaɗe unubibadaa Ãcõrẽra ẽpẽ panʉda. (Ara maʉ̃ quĩrãca aɓaʉba jʉwaba oɗa ãcõrẽa nedjara diaɗaɗebemada coibʉrʉ, unubiya maʉ̃ jʉwaba oɗa ãcõrẽra ẽpẽ ɓʉda.)
19 Baribʉrʉ mʉ̃a jaraẽ́ ɓʉa jʉwaba oɗa ãcõrẽra wãrã arada. Jʉwaba oɗa ãcõrẽa nedjara diaɗara ara jãwãbema djara quĩrãca ɓʉa.
20 Mãwãmĩna Ãcõrẽ adua ɓeaba nedjarada ãdji jʉwaba oɗa ãcõrẽa diabʉdaɗe wãrãda jairãa dia panʉa. Ãcõrẽa dia panʉẽ́a. Bãrãba maʉ̃ djarara coɗibʉrʉ, unubiɗia jaida ẽpẽ panʉda. Maʉ̃gʉra mʉ̃a quĩrĩãẽ́a.
21 Jaia diaɗa tazaɗe ɓʉda bãrãba doɗibʉrʉ, Jesucrito oa quĩrãnebaɗi careabema tazaɗe ɓʉda doɗiẽ́ panʉa. Jaia djico diaɗada bãrãba coɗibʉrʉ, dadjirã Boro quĩrãnebaɗi careabema cobadara coɗiẽ́ panʉa.
22 Mãwã oɗibʉrʉ ¿dadjirã Borora quĩrũbiɗaẽ́ca? ¿Dadjirãra idji cãyãbara ʉɓʉara panʉca?
Jũma oɗadua djabarãba bia crĩchaɗamãrẽã
23 Ʉ̃cʉrʉba jara panʉa dadjia o quĩrĩã ɓʉra jũma oida ɓʉda. Baribʉrʉ mʉ̃a jaraya: ne jũma oida ɓʉmĩna jũma dadjia o quĩrĩã ɓʉba dadjira carebacaa. Wãrãda jũma dadjia o quĩrĩã ɓʉra oida ɓʉmĩna jũma maʉ̃gʉba djabarãra carebacaa.
24 Ni aɓaʉba ara idji bia ɓaira jʉrʉ ɓaiẽ́ ɓʉa, ãtebʉrʉ dewararãda bia ɓeaɗamãrẽã jʉrʉ ɓaida ɓʉa.
25 Nedjara nẽdobuebadama nẽdoɗada coɗida panʉa. Baribʉrʉ bãrã crĩcha ãrĩna amaaba iwiɗirãnadua maʉ̃ nedjarara jʉwaba oɗa ãcõrẽa diaɗa basi cawaya.
26 Naʉ̃ ẽjũãra, ne jũma naʉ̃ ẽjũãne nũmʉ siɗa dadjirã Boro Ãcõrẽba osia. Maʉ̃ bẽrã ne jũmada coɗida panʉa.
27 Jesu ĩjãẽ́ ɓʉba bʉda ne comãrẽã eɗoibʉrʉ, maʉ̃ne wã quĩrĩãibʉrʉ, wãdua. Idjia diabʉrʉra codua. Bʉ crĩcha ãrĩ amaaba iwiɗirãdua maʉ̃ djicora jʉwaba oɗa ãcõrẽa diaɗa basi cawaya.
28 Baribʉrʉ aɓaʉba nedjarara jʉwaba oɗa ãcõrẽa diaɗaaɗa aibʉrʉ, corãdua idji crĩcha ãrĩ amaaba.*
29 Mʉ̃a jaraẽ́ ɓʉa bãrãmaarã maʉ̃ djicora cocara panʉda. Baribʉrʉ dewaraba mãwã crĩcha ɓʉbʉrʉ, idji crĩchara ãrĩya.
Aɓaʉba nãwã crĩchaisicada: “Mʉ̃a o quĩrĩã ɓʉda obʉrʉɗe aɓaʉba biẽ́ crĩchaibʉrʉ, ¿maʉ̃gʉra ocara ɓʉca? ¿Mʉ̃a o quĩrĩã ɓʉ quĩrãca oida ɓʉẽ́ca?
30 Mʉ̃a cobʉrʉ carea Ãcõrẽa bia ɓʉaɗa aibʉrʉ, ¿cãrẽ cãrẽã dewaraba mʉ̃da biẽ́ jaraida ɓʉ? Biẽ́ jaraiẽ́ ɓʉa.”
31 Baribʉrʉ mʉ̃a jaraya: bãrã ne co panʉne, ne o panʉne biɗa jũma oɗadua ẽberãrãba Ãcõrẽda bia jaraɗamãrẽã.
32 Bãrãba ne o panʉneba judiorãra, judiorãẽ́ra, Ãcõrẽ ẽberãrã siɗa cadjiruaɗe ɓaebirãnadua.
33 Ara maʉ̃ quĩrãca mʉ̃a o ɓʉɗeba jũmarãa bia crĩchabi quĩrĩã ɓʉa. Aɓabe mʉ̃djidrʉ bia ɓai carea jʉrʉcaa, ãtebʉrʉ ẽberãrã zocãrã bia ɓeaɗamãrẽã jʉrʉbaria. Mãwã mʉ̃a o ɓʉɗeba ãdjirãba Critora ĩjãnia Ãcõrẽba ẽdrʉ edamãrẽã.
Beɗea eɗaare
^ 10:1. Numero 10:34; Exodo 14:1-31.
^ 10:3. Exodo 16:4,35.
^ 10:4. Exodo 17:6; Numero 20:11.
^ 10:7. Exodo 32:1-35.
^ 10:7. Exodo 32:6.
^ 10:8. Numero 25:1-9.
^ 10:9. Numero 21:4-9.
^ 10:10. Numero 16:41-50.
^ 10:28. Griego beɗeaɗe ʉ̃cʉrʉ cartaɗe idjaɓa naʉ̃ siɗa ɓʉ́ ɓʉa: “Naʉ̃ ẽjũãra, ne jũma naʉ̃ ẽjũãne nũmʉ siɗa dadjirã Boro Ãcõrẽba osia.”
