1 Corinto 11:1-34
11 Mʉ̃ra Crito nĩbaɗa quĩrãca nĩbabari bẽrã mʉ̃ quĩrãca nĩbaɗadua.
Djabawẽrãrã boro ãnẽɓaribadaɗebema
2 Djabarã, ewariza mʉ̃ra quĩrãneba panʉ bẽrã idjaɓa mʉ̃a jaradiaɗara ẽpẽ panʉ bẽrã bãrãra bia jaraya.
3 Mʉ̃a quĩrĩã ɓʉa bãrãba cawaɗida Critora umaquĩrã Boroda, umaquĩrãra dji wẽrã boroda, idjaɓa Ãcõrẽra Crito Boroda.
4 Djabarã ãbaa dji jʉre panʉne umaquĩrãda boro ãnẽɓaripeɗa Ãcõrẽa iwiɗibʉrʉ wa Ãcõrẽneba beɗeaibʉrʉ, idji Boro Critora wayaẽ́ ɓʉda unubi ɓʉa.
5 Baribʉrʉ wẽrãba Ãcõrẽa iwiɗi ɓʉɗe wa Ãcõrẽneba beɗea ɓʉɗe boro ãnẽɓariẽ́bʉrʉ, idji quimara wayaẽ́ ɓʉda unubi ɓʉa. Mãwã o ɓʉra boroɓichia tʉ ɓʉ quĩrãca ɓʉa.
6 Wẽrãda boro ãnẽɓari quĩrĩãẽ́bʉrʉ, boroɓichia tʉida ɓʉa. Baribʉrʉ boroɓichia tʉsira peraida ɓʉ bẽrã boro ãnẽɓarida ɓʉa.
7 Djabarã ãbaa dji jʉre panʉne umaquĩrãrãda boro ãnẽɓariɗiẽ́ panʉa Ãcõrẽba ara idji quĩrãca oɗa bẽrã idjaɓa umaquĩrãrãba Ãcõrẽra ãdji boroda unubi panʉ bẽrã. Baribʉrʉ wẽrãrãba unubi panʉa umaquĩrãra ãdji boroda.
8 Ãcõrẽba umaquĩrãra wẽrãneba oẽ́ basía, ãtebʉrʉ wẽrãra umaquĩrãneba osia.
9 Idjaɓa umaquĩrãra oẽ́ basía wẽrã carebamãrẽã, ãtebʉrʉ wẽrãda osia umaquĩrã carebamãrẽã.
10 Maʉ̃ carea djabarã ãbaa dji jʉre panʉne wẽrãba idji borora ãnẽɓarida ɓʉa unubi carea dji quimara idji boroda. Mãwã oida ɓʉa bajãnebema nezocarãba bia ununamãrẽã.
11 Baribʉrʉ Jesucrito ĩjã ɓea bẽrã wẽrãba idji quimada carebaida ɓʉa idjaɓa umaquĩrãba idji quimada carebaida ɓʉa.
12 Naãrãbema wẽrãda umaquĩrãneba zesia. Mamaʉba ʉ̃taa umaquĩrãra wẽrãba tobaria. Baribʉrʉ wãrãda jũmaena Ãcõrẽneba ze panʉa.
13 Bãrãmaarã, ¿bia ɓʉca wẽrãba boro ãnẽɓariẽ́ne Ãcõrẽa iwiɗida? Bio crĩchaɗadua bia ɓʉ cawaya.
14 Ara dadji ɓeaɗeba cawa panʉa umaquĩrãba buɗa ureabisira peraida ɓʉda.
15 Baribʉrʉ wẽrã buɗa urea ɓʉra bia unubadaa. Ãcõrẽba wẽrãa buɗara diasia boro ãnẽɓarimãrẽã.
16 Bariduada maʉ̃gʉ carea caicaya ɓeibʉrʉ, mʉ̃a naʉ̃da idjía jaraya: daiba, Ãcõrẽ ẽberãrã biɗa awara oɗacaa.
Crito quĩrãnebaɗi carea cobada djabarãba ãĩ opeɗaɗa
17 Naʉ̃ ɓʉbʉrʉɗe mʉ̃a bãrãra poya bia jaraẽ́a. Bãrã ãbaa dji jʉrebʉdaɗe quĩrãipa oɗacaa. Bia panani cãyãbara biẽ́ panebadaa.
18 Naãrã jaraya mʉ̃a ũrĩ ɓʉda bãrãra ãbaa dji jʉre duanʉne crĩcha awara awara duanabarida. Maʉ̃ beɗeara jũma wãrãẽ́ siɗa mʉ̃a ĩjãbaria.
19 Wãrãda bãrãra crĩcha awara awara duanʉneba ebuɗa ɓaya cairãdrʉ Ãcõrẽba bia unu ɓʉda.
20 Bãrã ãbaa dji jʉre duanʉne Crito quĩrãnebaɗi carea cobadara quĩrãipa coɗacaa. Ãcõrẽmaa maʉ̃ co panʉra wãrã araẽ́a.
21 Jũmarã jũẽni naẽna bãdjiza enepeɗaɗara cobadaa. Maʉ̃ne ʉ̃cʉrʉra jarra duanebaria idjaɓa ʉ̃cʉrʉra beu duanebaria.
22 ¿Bãrãra de neẽ́ ɓeaca mama ne coɗi carea? ¿Bãrãba Ãcõrẽ ẽberãrãra igara panʉẽ́ca? ¿Maʉ̃ba dji ne neẽ́ queɗeara perabi panʉẽ́ca? ¿Mʉ̃a cãrẽda jarai? ¿Maʉ̃gʉ carea mʉ̃a bãrãra bia jaraica? Maʉ̃ carea bia jaraẽ́a.
Crito quĩrãnebaɗi carea cobada
23 Mʉ̃a bãrãa jaradiaɗara dadjirã Boro Jesuɗeba cawasia. Maʉ̃gʉra nãwã ɓʉa: diamasi dadjirã Boro Jesu jidabi naẽna idji jʉwaɗe paʉ̃da edasia.
24 Ãcõrẽa bia ɓʉaɗa apeɗa cõrãcuabʉrʉɗe jarasia: “Edaɗadua. Coɗadua.* Naʉ̃ra mʉ̃ cacuaa, bãrã carea diabʉrʉa. Mʉ̃ quĩrãnebaɗi carea ara naʉ̃ quĩrãca o pananadua.”
25 Ara maʉ̃ quĩrãca ne copeɗaɗacarea tazara idji jʉwaɗe edapeɗa jarasia: “Naʉ̃ tazaɗe ɓʉra mʉ̃ oaa. Mʉ̃ oaɗeba Ãcõrẽba bãrã ume beɗea djiwiɗida ɓʉbʉrʉa. Naʉ̃ dobʉdaza mʉ̃ quĩrãnebaɗi carea doɗadua.”
26 Dadjirã Boro Jesu zebʉrʉmisa maʉ̃ paʉ̃ cobʉdaza idjaɓa maʉ̃ tazaɗe ɓʉ dobʉdaza bãrãba idji beuɗaɗebemada jara panʉa.
27 Maʉ̃ carea bariduaba dadjirã Boro wayaẽ́ maʉ̃ paʉ̃da coibʉrʉ, maʉ̃ tazaɗe ɓʉda doibʉrʉ, cadjiruada o ɓʉa. Dadjirã Boro cacuara, oa siɗa siriẽ́ ɓʉda crĩcha ɓʉa.
28 Maʉ̃ paʉ̃ coi naẽna, maʉ̃ tazaɗe ɓʉ doi naẽna dadjiza bio acʉida ɓʉa wãrãda dadjirã Boro waya ɓʉ cawaya.
29 Dadjirã Boro Jesu cacua wayaẽ́ ɓʉba maʉ̃ paʉ̃da coibʉrʉ, maʉ̃ tazaɗe ɓʉda doibʉrʉ, Ãcõrẽba cawa oya.*
30 Maʉ̃ carea zocãrã bãrãra cacua biẽ́ ɓeaa, cacua norraɓari ɓeaa, idjaɓa ʉ̃cʉrʉ beusiɗaa.
31 Baribʉrʉ ara dadjiza bio quĩrãcuita acʉɗida panʉa jipa o panʉ cawaya. Mãwãra Ãcõrẽba cawa oẽ́a.
32 Dadjirã Boroba ubaria jipa nĩbaɗamãrẽã. Mãwã dadjirãra naʉ̃ ẽjũãne ɓea ume biẽ́ ɓʉẽ́a.
33 Maʉ̃ bẽrã mʉ̃ djabarã, dadjirã Boro quĩrãnebaɗi carea cobadara obʉdaɗe jũmarãda jʉ̃ãnadua ãbaa coɗi carea.
34 Aɓaʉda jarra ɓʉbʉrʉ idji diguiɗa ne coida ɓʉa. Mãwã ãbaa dji jʉrebʉdaɗe Ãcõrẽba bãrãra cawa oẽ́a biẽ́ o panʉ carea. Mʉ̃a waɗi jaradiaida ɓʉra jãmaa wãbʉrʉɗe jũma jaradiaya.
