1 Corinto 12:1-31
12 Djabarã, mʉ̃a quĩrĩã ɓʉa Ãcõrẽ Jaureba obi ɓʉɗebemada bãrãba bio cawaɗida.
2 Bãrãba cawa panʉa Ãcõrẽ adua ɓeasiɗe baridua carea ãĩ crĩchabadjiɗada. Maʉ̃ bẽrã jʉwaba oɗa ãcõrẽ ɓeada ẽpẽbadjiɗaa. Maʉ̃ra zocai ɓeaẽ́ bẽrã beɗeaɗacaa.
3 Maʉ̃ carea mʉ̃a quĩrĩã ɓʉa bãrãba naʉ̃da cawaɗida: Ãcõrẽ Jaureɗeba beɗea ɓʉba Jesura biẽ́ ɓʉaɗa acaa. Idjaɓa Ãcõrẽ Jaureɗeba beɗeaẽ́ ɓʉba Jesura jũmarã Boroaɗa acaa.
4 Ãcõrẽ Jaure aɓa ɓʉba dadjirãa dia ɓʉa ne quĩrãtanoa oɗamãrẽã.
5 Dadjirã Boro aɓa ɓʉ itea ne quĩrãtanoa obadaa.
6 Ãcõrẽ aɓa ɓʉba dadjirãa ne quĩrãtanoa obi ɓʉa. Idjiabʉrʉ dadjirãneba maʉ̃ra jũma obaria.
7 Ãcõrẽ Jaureba dadjirãza ne obibaria djabarã jũmarãda carebaɗamãrẽã.
8 Ãcõrẽ Jaureba ʉ̃cʉrʉa dia ɓʉa idji necawaaɗeba poya beɗeaɗamãrẽã. Aɓari Ãcõrẽ Jaureba ʉ̃cʉrʉa dia ɓʉa idjiɗeba cawapeɗaɗada poya jaradiaɗamãrẽã.
9 Aɓari Ãcõrẽ Jaureba ʉ̃cʉrʉa dia ɓʉa poya bio ĩjã pananamãrẽã. Idjaɓa aɓari Ãcõrẽ Jaureba ʉ̃cʉrʉa dia ɓʉa cacua biẽ́ ɓeara poya biabiɗamãrẽã.
10 Idjaɓa Ãcõrẽ Jaureba ʉ̃cʉrʉa dia ɓʉa ne ununacada poya oɗamãrẽã. Ʉ̃cʉrʉa dia ɓʉa poya Ãcõrẽneba beɗeaɗamãrẽã. Ʉ̃cʉrʉa dia ɓʉa poya cawaɗamãrẽã aɓaʉba Ãcõrẽ Jaureɗeba beɗea ɓʉda wa jaiɗeba beɗea ɓʉda. Idjaɓa ʉ̃cʉrʉa dia ɓʉa quĩrãtanoa dadjia ũrĩnaca beɗeaɗe beɗeaɗamãrẽã. Idjaɓa ʉ̃cʉrʉa dia ɓʉa dadjia ũrĩnaca beɗeaɗe jaraɗara cawa jaraɗamãrẽã.
11 Aɓari Ãcõrẽ Jaureba jũma maʉ̃ra obi ɓʉa. Idjia dadjirãza obi ɓʉa idjia quĩrĩã ɓʉ quĩrãca.
12 Dadji cacuara aɓa ɓʉa. Baribʉrʉ dadji cacuaɗe ne jũmada eropanʉa. Critora idji ĩjã ɓea ume ara maʉ̃ quĩrãca panʉa.
13 Ʉ̃cʉrʉ dadjirãra judiorãa, ʉ̃cʉrʉra judiorãẽ́a, ʉ̃cʉrʉra nezocarãa, ʉ̃cʉrʉra nezocarãẽ́a. Baribʉrʉ aɓari Ãcõrẽ Jaureba dadjirã jũmarãda cacua aɓaʉɗe ɓʉsia.* Jũma dadjirãba aɓari Ãcõrẽ Jaureda edasiɗaa.
14 Dadji cacuaɗe ne jũmada eropanʉa. Baribʉrʉ dadji cacuaɗe ɓeara aɓarica ɓeaẽ́a.
15 Dadji jĩrũba jaraibʉrʉ: “Mʉ̃ra jʉwaẽ́ bẽrã naʉ̃ cacuaɗebemaẽ́a,” maʉ̃ba ¿wãrãda dadji cacuaɗebemaẽ́ca?
16 Idjaɓa cʉwʉrʉba jaraibʉrʉ: “Mʉ̃ra dauẽ́ bẽrã naʉ̃ cacuaɗebemaẽ́a,” maʉ̃ba ¿wãrãda dadji cacuaɗebemaẽ́ca?
17 Dadji cacuaɗe aɓabe dauda ɓʉbara ¿cãrẽba ũrĩcasi? Dadji cacuaɗe aɓabe cʉwʉrʉda ɓʉbara ¿cãrẽba ʉ̃casi?
18 Ãcõrẽba dadji cacuaɗe ne jũmada ɓʉsia idjia quĩrĩã ɓaɗa quĩrãca.
19 Dadji cacuaɗe ɓeara jũma aɓarica ɓaɗabara cacuara neẽ́ bacasia.
20 Dadji cacuaɗe ne jũmada eropanʉmĩna dadji cacuara aɓa ɓʉa.
21 Maʉ̃ bẽrã dauba jʉwaa poya jaraẽ́a: “Bʉ neẽ́ mʉ̃ra bia ɓaya.” Idjaɓa boroba jĩrũa poya jaraẽ́a: “Bãrã neẽ́ mʉ̃ra bia ɓaya.”
22 Wãrãda naʉ̃ cacuaɗe ɓeara ʉ̃cʉrʉ dadjirãmaarã mãcua siriẽ́ ɓeaa. Baribʉrʉ maʉ̃gʉ neẽ́ dadji cacuara bia ɓacaa.
23 Idjaɓa naʉ̃ cacuaɗe ɓea dadjirãmaarã mãcuaẽ́ ɓeara biara djiobadaa bia ununamãrẽã. Idjaɓa naʉ̃ cacuaɗe ɓea dadjia unubiɗiẽ́ panʉra quĩrãcuita mẽrãbadaa.
24 Baribʉrʉ dadji cacuaɗe quĩrãwãrẽã ɓeara mẽrãnacaa. Ãcõrẽba dadji cacuaɗe ɓeara jũma ariɗe osia. Dadjia unubiɗaca siɗa osia bia wagaɗamãrẽã.
25 Mãwã osia dadji cacuara biẽ́ ɓerãmãrẽã, ãtebʉrʉ dadji cacuaɗe ɓeara dji careba pananamãrẽã.
26 Dadji cacuaɗebemada aɓa puaibʉrʉ, jũmaena puabaria. Ara maʉ̃ quĩrãca dadji cacuaɗebemada aɓa bia jaraɗibʉrʉ, jũmaena capipia ɓabaria.
27 Ara maʉ̃ quĩrãca bãrãra jũma ãbaa Crito cacua quĩrãca panʉa. Bãrãra idji cacuaɗebemarãa.
28 Ãcõrẽba djabarã tãẽna Jesucritoba diabueɗarãda naãrã ɓʉsia. Maʉ̃are idjiɗeba beɗeabadarãda ɓʉsia. Maʉ̃are idji beɗea jaradiabadarãda ɓʉsia. Maʉ̃are ʉ̃cʉrʉda ɓʉsia ne ununacada poya oɗamãrẽã, ʉ̃cʉrʉda ɓʉsia cacua biẽ́ ɓeara poya biabiɗamãrẽã, ʉ̃cʉrʉda ɓʉsia djabarã carebaɗamãrẽã, ʉ̃cʉrʉda ɓʉsia djabarã cawa jipa edeɗamãrẽã, idjaɓa ʉ̃cʉrʉda ɓʉsia quĩrãtanoa dadjia ũrĩnaca beɗeaɗe beɗeaɗamãrẽã.
29 ¿Jũmarãda Jesucritoba diabueɗarãca? ¿Jũmarãda Ãcõrẽneba beɗeabadarãca? ¿Jũmarãda Ãcõrẽ beɗea jaradiabadarãca? ¿Jũmarãba ne ununacada poya obadaca?
30 ¿Ãcõrẽba jũmarãa diasica cacua biẽ́ ɓeara poya biabiɗamãrẽã? ¿Ãcõrẽba jũmarãa diasica dadjia ũrĩnaca beɗeaɗe poya beɗeaɗamãrẽã? ¿Jũmarãba dadjia ũrĩnaca beɗeaɗe jaraɗara poya cawa jaraɗica?
31 Ãcõrẽ Jaureba obi ɓʉɗebema dji biara carebaida ɓeadrʉ jʉrʉɗadua.
Jãʉ̃be mʉ̃a bãrãa cawabiya sãwã ne jũmada poya biara o pananida.
Beɗea eɗaare
^ 12:13. Ɓʉsia. Griego beɗeaɗe ɓʉ́ ɓʉa “borocuesia.” Naʉ̃ versículoɗe maʉ̃ beɗeaba jaraẽ́ ɓʉa baidoɗe borocueɗaɗebemada, ãtebʉrʉ jara ɓʉa Ãcõrẽ Jaureba Crito ĩjã ɓʉra idji ume ãbaa ɓʉɗaɗebemada.
