1 Corinto 13:1-13
13 Mʉ̃da naʉ̃ ẽjũãne ɓea beɗeaɗe beɗeaibʉrʉ idjaɓa bajãnebema nezoca beɗeaɗe beɗeaibʉrʉ, maʉ̃ne quĩrĩãda neẽ́ ɓʉbʉrʉ, mʉ̃ra jiorro oɗa jĩguabari quĩrãca wa pĩrãchiru jĩguabari quĩrãca ɓʉa.
2 Mʉ̃da Ãcõrẽneba beɗeaibʉrʉ, Ãcõrẽba crĩcha cawabiẽ́ ɓaɗada jũma cawa ɓʉbʉrʉ, Ãcõrẽ necawaada jũma cawa ɓʉbʉrʉ, idjaɓa soɗeba wãrãda ĩjã ɓʉɗeba eyada poya ãyã ɓʉibʉrʉ, maʉ̃ne quĩrĩãda neẽ́ ɓʉbʉrʉ, mʉ̃ra ara jãwãbema quĩrãca ɓʉa.
3 Ne jũma mʉ̃a eroɓʉda ne neẽ́ queɗeaa diaibʉrʉ idjaɓa Ãcõrẽ carea ara mʉ̃djida idu bá beabibʉrʉ, baribʉrʉ quĩrĩãda neẽ́ ɓʉbʉrʉ, mʉ̃ra ara jãwãbema quĩrãca ɓʉa.
4 Quĩrĩã eroɓʉba jũma droa ɓʉa, djãrãra quĩrã djuburiabaria, djãrãba eroɓʉra awuacaa, djãrã cãyãbara biara ɓʉda jaracaa ni dji dromada crĩchacaa.
5 Quĩrĩã eroɓʉba djãrãra wayabaria, aɓabe idji iteabʉrʉ crĩchacaa, maãrĩã carea quĩrũcaa, djãrãba idji biẽ́ oɗara quĩrãdoabaria.
6 Quĩrĩã eroɓʉra ne cadjirua carea ɓʉsriɗacaa, ãtebʉrʉ jũma wãrã careabʉrʉ ɓʉsriɗabaria.
7 Quĩrĩã eroɓʉba djãrãba biẽ́ oɗara jũma droabaria, ne jũma biada ĩjãbaria, jũma bia odjamãrẽã jʉ̃ãbaria, idjaɓa ne jũmane droa ɓabaria.
8 Quĩrĩãra jõcaa. Baribʉrʉ ewari aɓa Ãcõrẽneba beɗeabadara waa beɗeaɗaẽ́a, dadjia ũrĩnaca beɗeaɗe beɗeabadara waa beɗeaɗaẽ́a, Ãcõrẽ Jaureɗeba cawapeɗaɗa jaradiabadaba waa jaradiaɗaẽ́a.
9 Dadjirãba aɓabe maãrĩ cawa panʉa idjaɓa Ãcõrẽneba maãrĩ beɗeabadaa.
10 Baribʉrʉ dji biara ɓʉ zebʉrʉɗe maʉ̃ maãrĩ ɓʉra jõya. Maʉ̃ne ne jũmada cawaɗia.
11 Mʉ̃ waɗi caibe querasiɗe warra zaque quĩrãca beɗeabadjia idjaɓa warra zaque quĩrãca crĩchabadjia. Baribʉrʉ drõã ɓeɗacarea warra zaque quĩrãca ɓaɗara idu ɓʉsia.
12 Ara nawena dadjirãba Ãcõrẽnebemada jarijaria unu panʉa quĩrã acʉbadaɗe unu panʉ quĩrãca. Baribʉrʉ ewari aɓa dadjirãba jũma ebuɗa ununia sãwãbʉrʉ ɓʉda. Ara nawena mʉ̃a maãrĩ cawa ɓʉa, baribʉrʉ ewari aɓa jũma cawaya Ãcõrẽba mʉ̃ cawa ɓʉ quĩrãca.
13 Naʉ̃ ũbea panʉra jõcaa: ne jũma biada ĩjã ɓaida, jũma bia odjamãrẽã jʉ̃ã ɓaida idjaɓa quĩrĩãda. Baribʉrʉ maʉ̃ ũbeaɗebemada quĩrĩãda biara ɓʉa.
