1 Corinto 14:1-40
14 Quĩrĩãda biara ẽpẽnadua. Idjaɓa Ãcõrẽ Jaureba obi ɓʉra jũma o quĩrĩãnadua. Baribʉrʉ biara Ãcõrẽneba beɗeaɗida quĩrĩãnadua.
2 Dadjia ũrĩnaca beɗeaɗe beɗea ɓʉba ẽberãrãa beɗea ɓʉẽ́a, idjia jarabʉrʉra ni aɓaʉba cawa ũrĩnaca bẽrã. Aɓabe Ãcõrẽa beɗea ɓʉa. Dadjia cawaɗacada Ãcõrẽ Jaureɗeba beɗea ɓʉa.
3 Baribʉrʉ Ãcõrẽneba beɗea ɓʉba ẽberãrãa beɗea ɓʉa biara ĩjãnamãrẽã, zareaara ɓeaɗamãrẽã, idjaɓa sobiaɗamãrẽã.
4 Dadjia ũrĩnaca beɗeaɗe beɗea ɓʉba ara idjida careba ɓʉa biara ĩjãi carea. Baribʉrʉ Ãcõrẽneba beɗea ɓʉba djabarãda careba ɓʉa biara ĩjãnamãrẽã.
5 Mʉ̃maarã jũma bãrãra dadjia ũrĩnaca beɗeaɗe poya beɗeabʉdabara bia ɓacasia. Baribʉrʉ jũmarãda Ãcõrẽneba poya beɗeabʉdabara biara ɓacasia. Wãrãda dadjia ũrĩnaca beɗeaɗe beɗeai cãyãbara Ãcõrẽneba beɗeaida biara ɓʉa. Baribʉrʉ aɓaʉba dadjia ũrĩnaca beɗeaɗe beɗeapeɗa cawa jaraibʉrʉ, maʉ̃ siɗa bia ɓʉa. Djabarãba cawa ũrĩnapeɗa Ãcõrẽra biara ĩjãnia.
6 Maʉ̃ carea djabarã, mʉ̃da bãrãmaa wãpeɗa dadjia ũrĩnaca beɗeaɗe beɗeaibʉrʉ, ¿bãrãda sãwã carebai? Carebaẽ́a. Baribʉrʉ dadjia ũrĩbada beɗeaɗe Ãcõrẽba mʉ̃́a cawabiɗada jaraibʉrʉ, wa Ãcõrẽ necawaaɗeba beɗeaibʉrʉ, wa Ãcõrẽneba beɗeaibʉrʉ, wa Ãcõrẽ beɗeada jaradiaibʉrʉ poya carebaya.
7 Ara maʉ̃ quĩrãca aɓaʉba chiruda wa arpada zaibʉrʉ baribʉrʉ jipa zaẽ́bʉrʉ, jĩgua ɓʉmĩna dadjia cawaɗaẽ́a cãrẽ trʉ̃ãbida za ɓʉda.
8 Cachiru siɗa jipa zaẽ́bʉrʉ, ¿sordaorãda sãwã isabe coɓeaɗi djõni carea?
9 Ara maʉ̃ quĩrãca bãrãba ũrĩbada beɗeaɗe beɗeaɗaẽ́bʉrʉ, ẽberãrãba ¿sãwã cawaɗi bãrãba jara panʉda? Mãwã beɗeaɗibʉrʉ, bãrãra ara jãwã beɗea panʉa.
10 Naʉ̃ ẽjũãne beɗea quĩrãtanoa baraa. Maʉ̃ beɗeaza dji cawa ɓʉba cawa ũrĩbaria.
11 Baribʉrʉ mʉ̃a maʉ̃ beɗeada adua ɓʉbʉrʉ, dji beɗeabʉrʉmaarã mʉ̃ra drua ãĩbema quĩrãca ɓʉa, idjaɓa mʉ̃maarã idjida drua ãĩbema quĩrãca ɓʉa.
12 Bãrãra ara maʉ̃ quĩrãca ɓeaa. Ãcõrẽ Jaureba obi ɓʉra bãrãba bio o quĩrĩã panʉ bẽrã djabarã carebai careabemada biara o quĩrĩãnadua ãdjirãba biara Ãcõrẽra ĩjãnamãrẽã.
13 Maʉ̃ carea dadjia ũrĩnaca beɗeaɗe beɗea ɓʉba Ãcõrẽa iwiɗida ɓʉa ara idjia jaraɗara poya cawa jarai carea.
14 Dadjia ũrĩnaca beɗeaɗe mʉ̃a Ãcõrẽa iwiɗibʉrʉ, mʉ̃ jaureba iwiɗi ɓʉa. Baribʉrʉ mʉ̃a adua ɓʉa cãrẽda iwiɗi ɓʉda.
15 Mãwãra ¿sãwã jipaara oi? Mʉ̃ jaureba Ãcõrẽa iwiɗiya baribʉrʉ mʉ̃a cawa ɓʉ beɗeaɗe biɗa iwiɗiya. Mʉ̃ jaureba Ãcõrẽa bia jara trʉ̃ãya, baribʉrʉ mʉ̃a cawa ɓʉ beɗeaɗe biɗa trʉ̃ãya.
16 Bʉ jaureba Ãcõrẽa bia beɗeaibʉrʉ, bʉa jaraɗa cawa ũrĩcaba ¿sãwã wãrãana ai?*
17 Wãrãda bʉa mãwã beɗeabʉrʉɗe Ãcõrẽa bia beɗea ɓʉa, baribʉrʉ dewararãda carebaẽ́ ɓʉa biara ĩjãnamãrẽã.
18 Mʉ̃a Ãcõrẽa bia ɓʉaɗa abaria mʉ̃ra bãrã cãyãbara dadjia ũrĩnaca beɗeaɗe auɗuara beɗeabari bẽrã.
19 Baribʉrʉ djabarã dji jʉre duanʉne mʉ̃maarã dadjia ũrĩnaca beɗeaɗe dãrã beɗeai cãyãbara biara ɓʉa dadjia ũrĩbada beɗeaɗe dãrãẽ́ jaradiaida.*
20 Djabarã, warra zaquerã quĩrãca ɓeaɗadua. Ãdjirãba cadjiruada bio adua panʉa. Baribʉrʉ Ãcõrẽ Jaureba obi ɓʉɗebemada drõãrã quĩrãca crĩcha ɓeaɗadua. Waa warra zaquerã quĩrãca crĩcharãnadua.
21 Ãcõrẽ Beɗeaɗe nãwã ɓʉ́ ɓʉa: “Dadjirã Boroba jara ɓʉa: mʉ̃ra naʉ̃ puru ume drua ãĩbemarã iteɗeba, ãdjia ũrĩnaca beɗeabada ẽberãrãneba beɗeaya. Mãwãmĩna mʉ̃ beɗeara ũrĩ ama panania.”*
22 Maʉ̃ba cawa panʉa dadjia ũrĩnaca beɗeaɗe beɗeaira Jesu ĩjã ɓea carea ɓʉẽ́da, ãtebʉrʉ Jesu ĩjãẽ́ ɓeaa unubi ɓʉa Ãcõrẽba cawa oida.* Baribʉrʉ Ãcõrẽneba beɗeaira Jesu ĩjã ɓea carea ɓʉa, Jesu ĩjãẽ́ ɓea carea ɓʉẽ́a.
23 Maʉ̃ carea djabarã ãbaa dji jʉre duanʉne jũmarãda dadjia ũrĩnaca beɗeaɗe beɗea duananibʉrʉ, maʉ̃ne ʉ̃cʉrʉ Jesu ĩjãẽ́ ɓeada wa Ãcõrẽ beɗea ũrĩ quĩrĩã ɓeada eɗa zesiɗara ¿ãdjia jaraɗaẽ́ca bãrãra quĩrãẽ́ duanʉda?
24 Baribʉrʉ jũmarãda Ãcõrẽneba beɗeaɗibʉrʉ, maʉ̃ne Jesu ĩjãẽ́ ɓʉda wa Ãcõrẽ beɗea ũrĩ quĩrĩã ɓʉda eɗa zesira bãrãba jara panʉ ũrĩ ɓʉɗeba idjia cawaya cadjirua obarida idjaɓa Ãcõrẽ quĩrãpita beɗeaɗe ɓʉda.
25 Idji soɗe mẽrã eroɓaɗara ebuɗa cawaya. Maʉ̃ne chĩrãboroɗe coɓepeɗa Ãcõrẽa bia beɗeaya idjaɓa jaraya Ãcõrẽra wãrãda bãrã ume ɓʉda.
Ãbaa dji jʉrebʉdaɗe jũma quĩrãipa oɗadua
26 Maʉ̃ carea djabarã, ¿sãwã jipaara oɗi? Bãrã ãbaa dji jʉre panʉne ʉ̃cʉrʉba trʉ̃ãbi Ãcõrẽ Beɗeaɗebemada trʉ̃ãnida panʉa, ʉ̃cʉrʉba Ãcõrẽ beɗeara jaradiaɗida panʉa, ʉ̃cʉrʉba Ãcõrẽba cawabiɗada jaraɗida panʉa, ʉ̃cʉrʉba dadjia ũrĩnaca beɗeaɗe beɗeaɗida panʉa, idjaɓa ʉ̃cʉrʉba maʉ̃ beɗeaɗara cawa jaraɗida panʉa. Baribʉrʉ jũma maʉ̃gʉra oɗida panʉa djabarãba biara ĩjãnamãrẽã.
27 Dadjia ũrĩnaca beɗeaɗe beɗeaɗibʉrʉ, djaba umé wa ũbeabe mãwã beɗeaɗida panʉa. Baribʉrʉ aɓa aɓa beɗeaɗida panʉa. Beɗeaɗacarea aɓaʉba maʉ̃ beɗeaɗara cawa jaraida ɓʉa.
28 Baribʉrʉ djabarã ãbaa dji jʉre panʉne maʉ̃ beɗeaɗa cawa jarabarida neẽ́bʉrʉ, dadjia ũrĩnaca beɗeaɗe beɗea quĩrĩã ɓʉra chupea ɓaida ɓʉa. Idji crĩchaɗe Ãcõrẽa chupea beɗeaida ɓʉa.
29 Ara maʉ̃ quĩrãca Ãcõrẽneba beɗeabadara umé wa ũbea beɗeaɗida panʉa. Maʉ̃ne jũmarãba ãdjia beɗea panʉra quĩrãcuita ũrĩnida panʉa wãrã cawaya.
30 Djaba aɓa beɗea ɓʉɗe Ãcõrẽba dji ũrĩ duanʉnebema aɓaʉa ne cawabisira, dji beɗea ɓʉba maʉ̃ djabara idu beɗeabida ɓʉa.
31 Jũmarãda aɓa aɓa Ãcõrẽneba beɗeaɗida panʉa cawa wãnamãrẽã idjaɓa biara ĩjãnamãrẽã.
32 Ãcõrẽneba beɗeabarira cawaẽ́ne beɗea nũmecaa, ãtebʉrʉ poya jʉ̃ãbaria beɗeai carea.
33 Ãcõrẽba ɓʉga nũmebicaa, ãtebʉrʉ necai ɓaida diabaria.
34 Ãcõrẽ ẽberãrã ãbaa dji jʉrebʉdaza wẽrãrãra beɗeaɗiẽ́ panʉa, ãtebʉrʉ chupea ũrĩnida panʉa. Ãdji quima beɗeara ĩjã ɓeaɗida panʉa judiorã leyba jara ɓʉ quĩrãca.
35 Wẽrãrãba iwiɗi quĩrĩãnibʉrʉ, diguiɗa panʉne ãdji quimaa iwiɗiɗida panʉa. Djabarã ãbaa dji jʉre duanʉne wẽrã beɗeaira biẽ́ ɓʉa.
36 ¿Ãcõrẽ beɗeara bãrãneba zesica? ¿Aɓabe bãrãmaa zesica?
37 Bariduaba Ãcõrẽneba beɗeabarida crĩcha ɓʉbʉrʉ, wa Ãcõrẽ Jaureɗeba ne o ɓʉda crĩcha ɓʉbʉrʉ, maʉ̃ ẽberãba jaraya mʉ̃a naʉ̃ cartaɗe ɓʉbʉrʉra dadjirã Boroba obi ɓʉda.
38 Bariduaba maʉ̃gʉda igaraibʉrʉ, idji siɗa igaraɗadua.
39 Maʉ̃ba djabarã, biara jʉrʉɗadua Ãcõrẽneba beɗeaɗida. Idjaɓa dadjia ũrĩnaca beɗeaɗe beɗeabadara idu beɗeabiɗadua.
40 Baribʉrʉ jũmaena quĩrãcuita quĩrãipa oɗadua.
Beɗea eɗaare
^ 14:16. Wãrãana ai. Griego beɗeaɗe ɓʉ́ ɓʉa: “Amén.” Maʉ̃ beɗeara hebreo beɗeaa. Crĩchada umé jara ɓʉa. Eɗauɗe jara ɓʉa “bia ɓʉa mãwã ɓaida” idjaɓa eɗauɗe jara ɓʉa “wãrã.”
^ 14:19. Dãrã beɗeai. Griego beɗeaɗe ɓʉ́ ɓʉa “beɗea die mil.” Dãrãẽ́. Griego beɗeaɗe ɓʉ́ ɓʉa “beɗea juesumabe.”
^ 14:21. Isaía 28:11-12. Ãcõrẽba israelerãa jarasia ãdjia ĩjãnaẽ́ panʉ carea drua ãĩbemarãba ãdjirãra ãyã edeɗida.
^ 14:22. Jesu ĩjãẽ́ ɓeaa unubi ɓʉa Ãcõrẽba cawa oida. Griego beɗeaɗe maʉ̃ra ebuɗa ɓʉẽ́a.
