1 Corinto 15:1-58
15 Maʉ̃ awara djabarã, mʉ̃a bãrãa quĩrãnebabiya beɗea bia Jesucritoɗebema mʉ̃a bãrãa jaradiaɗada. Maʉ̃ beɗeara bãrãba mʉ̃neba cawasiɗaa idjaɓa bio ĩjã panʉa.
2 Mʉ̃a jaradiaɗara wãrãda ĩjã pananibʉrʉ, Ãcõrẽba ẽdrʉ edaya. Ĩjã pananaẽ́bʉrʉ, bãdji quĩrĩãbe ĩjãsiɗaa.
3 Mʉ̃a cawaɗa crĩcha dromaara ɓʉda naãrã bãrãa jaradiasia. Naʉ̃gʉ basía: Critora dadjirã cadjirua carea beusia Ãcõrẽ Beɗeaɗe ɓʉ́ ɓʉ quĩrãca.*
4 Idjira tʉɓarisiɗaa, maʉ̃be ewari ũbeaɗe beu ɓaɗada ʉ̃rẽbasia Ãcõrẽ Beɗeaɗe ɓʉ́ ɓʉ quĩrãca.*
5 Ʉ̃rẽbaɗacarea ara idjida Pedroa unubisia.* Maʉ̃are idjia doce edaɗarãa ara idjida unubisia.
6 Mãwãnacarea ara idjida djabarã quiniento auɗu ãbaa panʉ́a unubisia. Ãdjirãnebemada ʉ̃cʉrʉ jaiɗasiɗaa baribʉrʉ zocãrã waɗibiɗa zocai panʉa.
7 Maʉ̃ quiniento djabarãba Jesu unupeɗaɗacarea ara idjida Santiagoa unubisia.* Mãwãnacarea ara idjida jũma idjia diabueɗarãa unubisia.
8 Jĩrũare mʉ̃́a unubisia. Mʉ̃ra warra ʉradʉgaɗa quĩrãca dji biẽ́ baɗamĩna mãwã unubisia.*
9 Wãrãda mʉ̃ra Jesucritoba diabueɗaɗebema dji eɗaara ɓʉa. Ãcõrẽ ẽberãrã biẽ́ oi carea ẽpẽ ɓaɗa bẽrã bia ɓʉẽ́a ẽberãrãba mʉ̃ra idjia diabueɗada jaraɗamãrẽã.
10 Baribʉrʉ Ãcõrẽba idji biaɗeba mʉ̃ra ɓʉsia Jesucritoba diabueɗada ɓamãrẽã. Idji quĩrĩãbe mʉ̃ra mãwã ɓʉẽ́ basía. Ãtebʉrʉ jũma Jesucritoba diabueɗarã cãyãbara mʉ̃a idji itea auɗuara o ɓʉa. Baribʉrʉ ara mʉ̃djiɗeba mãwã oẽ́ ɓʉa. Ãcõrẽbʉrʉ idji biaɗeba mʉ̃ra careba ɓʉa mãwã omãrẽã.
11 Waabema Jesuba diabueɗarãba idjiɗebemada jaradia panʉbʉrʉ wa mʉ̃a jaradia ɓʉbʉrʉ, aɓarida jaradia panʉa. Idjaɓa bãrãba ara maʉ̃ beɗeara ĩjãsiɗaa.
Djabarã beupeɗaɗa ʉ̃rẽbaɗiɗebema
12 Dairãba Crito ʉ̃rẽbaɗaɗebemada jaradia panʉa. Maʉ̃da ¿sãwã ʉ̃cʉrʉ bãrãnebemaba beupeɗaɗara ʉ̃rẽbaɗaẽ́ana a panʉ?
13 Beupeɗaɗada ʉ̃rẽbaɗaẽ́bʉrʉ, maʉ̃ba jara ɓʉa Crito siɗa ʉ̃rẽbaẽ́ basida.
14 Critoda ʉ̃rẽbaẽ́ basibʉrʉ, mãwãra dadji quĩrĩãbe jaradia panʉa idjaɓa bãrãba bãdji quĩrĩãbe idjira ĩjã panʉa.
15 15:15-16 Critoda ʉ̃rẽbaẽ́ basibʉrʉ, Ãcõrẽba idji ʉ̃rẽbabisiaɗa abʉdaɗe daiba Ãcõrẽnebemada sewada jara panʉa. Wãrãda beupeɗaɗada ʉ̃rẽbaɗaẽ́bʉrʉ, maʉ̃ba jara ɓʉa Crito siɗa ʉ̃rẽbaẽ́ basida.
17 Critoda ʉ̃rẽbaẽ́ basibʉrʉ, bãdji quĩrĩãbe idjira ĩjã panʉa idjaɓa waɗibiɗa cadjiruaɗe panʉa.
18 Mãwãra jũma Crito ĩjã ɓea beupeɗaɗara aduasiɗaa.
19 Dadjirãba Critoɗeba aɓabe naʉ̃ ẽjũãne bia ɓeaɗida crĩcha panʉbʉrʉ, jũmarã cãyãbara mĩã djuburiara panʉa.
20 Baribʉrʉ Ãcõrẽba wãrãda Critora beu ɓaɗada ʉ̃rẽbabisia. Beupeɗaɗaɗebemada idjidrʉ dji naãrã ʉ̃rẽbaɗaa. Mãwã Ãcõrẽba unubisia jũma idjiɗerã siɗa wãrãda ʉ̃rẽbaɗida.
21 Ẽberã aɓaʉba cadjirua oɗa carea dadjirãra beuɗia. Ara maʉ̃ quĩrãca ẽberã aɓaʉba bia oɗa carea dadjirãra ʉ̃rẽbaɗia.
22 Jũmarãda Adaʉ̃neba zepeɗaɗa bẽrã beubadaa. Ara maʉ̃ quĩrãca Critoɗeba jũma idjiɗerãda wayacusa zocai panania.
23 Critoda naãrã ʉ̃rẽbasia. Idji waya zebʉrʉɗe idjiɗerãda ʉ̃rẽbaɗia.
24 Mãwãnacarea naʉ̃ ẽjũãra jõya. Maʉ̃ ewariɗe Critoba jai bororãda, jai dromarãda, jai mẽsrã ɓea siɗa jũma poyaya. Maʉ̃be idji puruda dadji Zeza Ãcõrẽa diaya.
25 Wãrãda Critora jũmarã boroda ɓaida ɓʉa aɓa jũma idji dji quĩrũra poyabʉrʉɗaa.*
26 Jĩrũare idjia dadji beuira jõbiya, maʉ̃gʉ siɗa idji ume dji quĩrũ bẽrã.
27 Ãcõrẽ Beɗeaɗe jara ɓʉa: “Bʉa ne jũmada idji jʉwaeɗa ɓʉsia.”* Ne jũma Crito jʉwaeɗa ɓʉsida jara ɓʉmĩna ebuɗa ɓʉa Ãcõrẽba ara idjida Crito jʉwaeɗa ɓʉẽ́ basida. Ãcõrẽbʉrʉ ne jũmada Crito jʉwaeɗa ɓʉsia.
28 Ãcõrẽ Warra Critoba ne jũma poyaɗacarea ara idjida Ãcõrẽ jʉwaeɗa ɓeya Ãcõrẽba ne jũmada idji jʉwaeɗa ɓʉɗa quĩrãca. Mãwãbʉrʉ Ãcõrẽba ne jũmada idji jʉwaeɗa eroɓaya.
29 Beupeɗaɗada ʉ̃rẽbaɗaẽ́bʉrʉ, ¿cãrẽ cãrẽã ʉ̃cʉrʉra beupeɗaɗa cacuabari borocue panʉ? Ãcõrẽba beupeɗaɗara ʉ̃rẽbabiẽ́bʉrʉ, ¿cãrẽ cãrẽã ãdjirã cacuabari borocueɗi?*
30 Idjaɓa beupeɗaɗada ʉ̃rẽbaɗaẽ́bʉrʉ, ¿daira cãrẽ cãrẽã Jesucrito beɗea carea ewariza minijĩchiaɗe bia mĩga panʉ?
31 Djabarã, bãrãba dadjirã Boro Jesucrito ĩjã panʉ carea mʉ̃ra wãrãda ɓʉsriɗa ɓʉa. Wãrãda jaraya: ewariza crĩcha ɓʉa ẽberãrãba mʉ̃ra Jesu beɗea carea beaɗida.
32 Epeso puruɗe Ãcõrẽ beɗea jaradiai carea mʉ̃ra bia mĩgasia animarã cadjirua ɓea ume djõ ɓʉ quĩrãca.* Beupeɗaɗada ʉ̃rẽbaɗaẽ́bʉrʉ, ¿mʉ̃ bia mĩgaɗa carea cãrẽ biada edasi? Wãrãda dadjirãra ʉ̃rẽbaɗaẽ́bʉrʉ, biara ɓʉa oɗida ʉ̃cʉrʉba jarabada quĩrãca: “Bia ne coɗia, itua doɗia nu beuɗi bẽrã.”*
33 Idu cũrũgabirãnadua. Bãrãda cadjirua obadarã ume ãbaa nĩbaɗibʉrʉ, ãdjirãba bãrã bia nĩbabadara ãrĩnia.
34 Jipa crĩchaɗadua. Cadjiruada waa orãnadua. Ʉ̃cʉrʉ bãrãnebemaba Ãcõrẽra adua ɓeaa. Maʉ̃ carea bãrãra peraɗida panʉa.
Djabarã ʉ̃rẽbabʉdaɗe ãdji cacua sãwã ɓaiɗebema
35 Ʉ̃cʉrʉba iwiɗiɗisicada: “¿Beupeɗaɗada sãwãbʉrʉ ʉ̃rẽbaɗi? ¿Ãdjirã cacuara sãwã ɓeaɗi?”
36 ¡Dji mãwã iwiɗi ɓʉra crĩcha neẽ́ taɓʉa! Ne uɗa tunubʉrʉɗe dji tara ɓerawabaria.
37 Trigoda uibʉrʉ wa baridua tada uibʉrʉ, dji ɓʉwʉrʉda ucaa ãtebʉrʉ dji tadrʉ ubaria.
38 Baribʉrʉ maʉ̃ taɗeba Ãcõrẽba dji ɓʉwʉrʉda tunubibaria idji ɓaida ɓʉ quĩrãca.
39 Naʉ̃ ẽjũãne zocai ɓeara aɓari cacua quĩrãca ɓeaẽ́a. Ẽberã cacuara awara ɓʉa, animarã cacuara awara ɓʉa, ĩbana cacuara awara ɓʉa, ɓeda cacuara awara ɓʉa.
40 Idjaɓa bajãne ne quĩrãtanoa baraa. Naʉ̃ ẽjũãne biɗa ne quĩrãtanoa baraa. Baribʉrʉ bajãne ne biya queɗeara awara ɓeaa. Naʉ̃ ẽjũãne ne biya queɗeara awara ɓeaa.
41 Ʉ̃mãdau ʉ̃naara awara ɓʉa, jeɗeco ʉ̃naara awara ɓʉa, chĩdau ʉ̃naara awara ɓʉa. Chĩdauza ʉ̃naara awara ɓeaa.
42 Beupeɗaɗa ʉ̃rẽbaɗira ne uɗa quĩrãca ɓʉa. Cacua ɓerawabarida joubadaa baribʉrʉ cacua ɓerawacada ʉ̃rẽbaya.
43 Cacua biaẽ́da joubadaa baribʉrʉ cacua biya quiruda ʉ̃rẽbaya. Cacua ʉɓʉaẽ́ ɓʉda joubadaa baribʉrʉ cacua ʉɓʉa ɓʉda ʉ̃rẽbaya.
44 Naʉ̃ ẽjũãnebema cacuada joubadaa baribʉrʉ bajãnebema cacuada ʉ̃rẽbaya. Naʉ̃ ẽjũãnebema cacuada ɓʉbʉrʉ bajãnebema cacua siɗa ɓʉa.
45 Ãcõrẽ Beɗeaɗe ɓʉ́ ɓʉa: “Nabema ẽberã Adaʉ̃ abadara Ãcõrẽba zocai ɓabisia.” Baribʉrʉ Crito dji jĩrũarebema Adaʉ̃ abadada ɓʉsia idji jaureɗeba zocai ɓaida diamãrẽã.
46 Bajãnebema cacuada naãrãbema cacuaẽ́a, ãtebʉrʉ naʉ̃ ẽjũãnebema cacuadrʉ dji naãrãbemaa. Dji naãrãbema cacua jõnacarea bajãnebema cacuada edaya.
47 Nabema ẽberã Adaʉ̃ abadara egoro oɗa basía. Jĩrũarebema ẽberã Jesucrito abadara bajãnebemaa.
48 Adaʉ̃ cacuara egoro oɗa basía. Ara maʉ̃ quĩrãca naʉ̃ ẽjũãnebemarãba eropanʉa. Baribʉrʉ Critoba bajãnebema cacuada eroɓʉ quĩrãca bajãnaa wãbʉda ẽberãrãba eropanania.
49 Dadjirãra nabema ẽberã egoro oɗa quĩrãca panʉa idjaɓa bajãneba zeɗa ẽberã Crito quĩrãca panania.
50 Djabarã, mʉ̃a naʉ̃da jaraya: naʉ̃ ẽjũãnebema cacuara Ãcõrẽ bajãnebema puruɗe poya ɓaẽ́a. Cacua ɓerawabarira cacua ɓerawacama poya ɓaẽ́a.
51 Ũrĩnadua. Ãcõrẽba naẽna cawabiẽ́ ɓaɗara mʉ̃a cawabiya: jũma dadjirãra beuɗaẽ́a, ãtebʉrʉ cacua quĩrã awara panenia.
52 Cawaẽ́ne, daupica edabʉrʉɗe, jĩrũarebema cachiru jĩguabʉrʉɗe mãwã quĩrã awara panenia. Wãrãda Ãcõrẽ cachirura jĩguaya. Maʉ̃ne beupeɗaɗada cacua ãrĩnacaɗe ʉ̃rẽbaɗia. Idjaɓa dadjirã waɗi zocai ɓeara cacua quĩrã awara panenia.
53 Dadjirã cacua ãrĩbarira cacua ãrĩcada ɓeya. Dadji beuida ɓʉ cacuara beuca cacuada ɓeya.
54 Naʉ̃ cacua beuida ɓʉra cacua beuca ɓebʉrʉɗe Ãcõrẽ Beɗeaɗe ɓʉ́ ɓʉ quĩrãca wãrãda ɓaya. Nãwã ɓʉ́ ɓʉa: “Ãcõrẽba dadji beuira jõbisia.”*
55 Idjaɓa ɓʉ́ ɓʉa:
Beuba waa poya beubiẽ́a. Beuba waa poya puabiẽ́a.*
56 Ãcõrẽba Moisea diaɗa leyba cawabi ɓʉa dadjirãba cadjirua obadada. Cadjiruada obada bẽrã beuɗia.
57 Baribʉrʉ Ãcõrẽa bia ɓʉaɗa aɗida panʉa dadjirã Boro Jesucritoɗeba beuɗiɗebemada ẽdrʉ edaɗa bẽrã.
58 Maʉ̃ carea mʉ̃ djabarã, bio ĩjã pananadua. Dadjirã Boroba quĩrĩã ɓʉra bio ẽpẽ oɗadua. Bãrãba cawa panʉa dadjirã Boro itea o panʉra bãdji quĩrĩãbe o panʉẽ́da.
Beɗea eɗaare
^ 15:3. Isaía 53:5-12.
^ 15:4. Salmo 16:8-11; Isaía 26:19.
^ 15:5. Pedro. Griego beɗeaɗe ɓʉ́ ɓʉa “Cepa.”
^ 15:7. Santiago. Santiagora idjaɓa Jacobo abadaa. Idjira Jesu djaba basía.
^ 15:8. Hecho 9:1-6.
^ 15:25. Aɓa jũma idji dji quĩrũra poyabʉrʉɗaa. Griego beɗeaɗe nãwã ɓʉ́ ɓʉa: “Aɓa idji jĩrũ edre ɓʉbʉrʉɗaa.”
^ 15:27. Salmo 8:6.
^ 15:29. Corintoɗebema djabarãba dji beupeɗaɗa cacuabari borocue pananamĩna Ãcõrẽ Beɗeaɗe jaracaa dadjia mãwã oɗida panʉda.
^ 15:32. Hecho 19:23-41.
^ 15:32. Isaía 22:13.
^ 15:54. Isaía 25:8. Ãcõrẽba dadji beuira jõbisia. Griego beɗeaɗe nãwã ɓʉ́ ɓʉa: “Dji poya ɓʉba beuira mĩbuesia.”
^ 15:55. Osea 13:14. Griego beɗeaɗe maʉ̃ versículoda nãwã ɓʉ́ ɓʉa: “Beu, ¿bʉ cũmiara sãma ɓʉ? Joubada uria, ¿bʉa poya ɓaɗara sãma ɓʉ?”
