1 Corinto 2:1-16
2 Djabarã, mʉ̃a Ãcõrẽnebemada bãrãmaa jaradiaɗe wãsiɗe beɗea bia quiruɗeba ni mʉ̃ necawaaɗeba jaradiaẽ́ basía.
2 Bãrã tãẽna ɓasiɗe mʉ̃a aɓabe Jesucritoɗebemada, idji cruɗe beapeɗaɗada cawabi quĩrĩã ɓasia.
3 Maʉ̃ne mʉ̃ra ʉɓʉaẽ́ ɓʉda crĩchasia. Idjaɓa poya bia jaradiaẽ́da crĩcha ɓaɗa bẽrã ne wayaaba cacua ure nũmabadjia.
4 Mʉ̃a Jesuɗebema nẽbʉrʉ ɓasiɗe idjaɓa jaradia ɓasiɗe mʉ̃ necawaaɗeba mãwã oẽ́ basía bãrãba ĩjãnamãrẽã. Ãtebʉrʉ jaradia ɓʉɗe Ãcõrẽ Jaureba idji ʉɓʉaɗeba cawabisia maʉ̃ beɗeara wãrã arada.
5 Mãwã bãrãba naʉ̃ ẽjũãnebema necawaaɗeba Jesucritora ĩjãnaẽ́ basía, ãtebʉrʉ Ãcõrẽ ʉɓʉaɗeba ĩjãsiɗaa.
Ãcõrẽba naẽna cawabiẽ́ ɓaɗara idji Jaureɗeba cawabiɗa
6 Mãwãmĩna daiba necawaada Ãcõrẽ bio ĩjã ɓeaa jaradia panʉa. Maʉ̃ necawaara naʉ̃ ẽjũãnebemaẽ́a, naʉ̃ ẽjũãnebema bororã necawaẽ́a. Ãdjirãra dãrã pananaẽ́a.
7 Daiba Ãcõrẽ necawaa naẽna cawabiẽ́ ɓaɗada jaradia panʉa. Naʉ̃ ẽjũã oi naẽna Ãcõrẽba maʉ̃ necawaaɗeba ne oida ɓʉsia dadjirãra idji ume ãbaa bia ɓeaɗamãrẽã.
8 Naʉ̃ ẽjũãnebema bororã ni aɓaʉba maʉ̃ necawaara cawaɗaẽ́ basía. Cawa pananabara dadjirã Boro biya quirura cruɗe beaɗaẽ́ bacasia.
9 Baribʉrʉ cawaɗaẽ́ basía Ãcõrẽ Beɗeaɗe ɓʉ́ ɓʉ quĩrãca. Nãwã ɓʉ́ ɓʉa:
Ãcõrẽba idji quĩrĩã ɓea itea bia o eroɓʉra ni aɓaʉba waɗi ununacaa, cʉwʉrʉba ũrĩnacaa, ni cawa crĩchaɗacaa.*
10 Jũma maʉ̃gʉra Ãcõrẽba idji Jaureɗeba dadjirãa cawabisia. Idji Jaureba ne jũmada cawa ɓʉa. Ãcõrẽ crĩcha siɗa jũma cawa ɓʉa.
11 ¿Ẽberã crĩchara caiba cawa ɓʉ? Ara idjiduɓabʉrʉ cawa ɓʉa. Ara maʉ̃ quĩrãca ni aɓaʉba Ãcõrẽ crĩchara poya cawaɗaẽ́a. Aɓabe Ãcõrẽ Jaurebʉrʉ cawa ɓʉa.
12 Dadjirãba naʉ̃ ẽjũãnebema crĩchada edaɗaẽ́ basía, ãtebʉrʉ Ãcõrẽ Jauredrʉ edasiɗaa jũma Ãcõrẽba idji biaɗeba diaɗada cawaɗamãrẽã.
13 Ara maʉ̃gʉɗebemada daiba beɗea panʉa. Baribʉrʉ daiba naʉ̃ ẽjũãnebema necawaaɗeba beɗea panʉẽ́a, ãtebʉrʉ Ãcõrẽ Jaureba daia jaradia ɓʉ quĩrãca beɗea panʉa. Mãwã Ãcõrẽ Jaureba cawabi ɓʉra daiba jaradia panʉa idjia beɗeabi ɓʉ quĩrãca.*
14 Baribʉrʉ Ãcõrẽ Jaureba cawabi ɓʉra Ãcõrẽ Jaure neẽ́ ɓʉba cawa quĩrĩãcaa, idjimaarã siriẽ́ ɓʉ bẽrã. Idjaɓa poya cawacaa, aɓabe Ãcõrẽ Jaureɗeba cawaida ɓʉ bẽrã.
15 Ãcõrẽ Jaure neẽ́ ɓʉba Ãcõrẽ Jaure eroɓʉ crĩchara poya cawaẽ́a. Baribʉrʉ Ãcõrẽ Jaure eroɓʉba Ãcõrẽnebemada poya bio cawaya.
16 Ãcõrẽ Beɗeaɗe nãwã ɓʉ́ ɓʉa: “¿Caiba dadjirã Boro crĩchara cawa ɓʉ? ¿Caiba idjía jaradiai?”* Baribʉrʉ dadjirãba Crito crĩchada eropanʉa.
