1 Corinto 3:1-23
3 Djabarã, mʉ̃a bãrãa jaradiasiɗe Ãcõrẽ Jaureɗeba nĩbabadarãa jaradia ɓʉ quĩrãca poya jaradiaẽ́ basía. Ãtebʉrʉ naʉ̃ ẽjũãnebemarãa, Crito ĩjãna djiwiɗi ɓearãa jaradiaida ɓʉ quĩrãca jaradiasia.
2 Mʉ̃a Critoɗebema zareaẽ́ ɓʉda jaradiasia warra zaquerãa juɓa dobi ɓʉ quĩrãca. Djico cobi ɓʉ quĩrãca zareara ɓʉda jaradiaẽ́ basía, bãrãba poya cawaɗaẽ́ basi bẽrã. Idjaɓa waɗibiɗa poya cawaɗaẽ́a.
3 Bãrãra waɗibiɗa naʉ̃ djaraba o quĩrĩã ɓʉɗeba nĩnaa: djãrãba eroɓʉ carea biẽ́ crĩchabadaa idjaɓa caicayabadaa. Mãwã ɓea bẽrã ebuɗa ɓʉa waɗibiɗa naʉ̃ djaraba o quĩrĩã ɓʉɗeba nĩnada naʉ̃ ẽjũãnebemarã quĩrãca.
4 Aɓaʉba jarabaria: “Mʉ̃ra Pauloɗea.” Dewaraba jarabaria: “Mʉ̃ra Apoloɗea.” Bãrãba mãwã jarabada bẽrã naʉ̃ ẽjũãnebemarã quĩrãca ɓeaa.
5 Baribʉrʉ ¿Paulora cai? ¿Apolora cai? Aɓabe daira Ãcõrẽ nezocaa. Daiɗeba bãrãba dadjirã Borora ĩjãsiɗaa. Ãcõrẽba daiza obiɗa quĩrãca osiɗaa.
6 Ne ubʉrʉ quĩrãca mʉ̃a bãrãa Jesuɗebemada naãrã jaradiasia. Maʉ̃be mʉ̃a uɗa cuebʉrʉ quĩrãca Apoloba Ãcõrẽ beɗeara biara jaradiasia. Baribʉrʉ Ãcõrẽbʉrʉ carebasia bãrãba ĩjãnamãrẽã mʉ̃a uɗa waribibʉrʉ quĩrãca.
7 Maʉ̃ bẽrã ne ubarira dji dromaẽ́a. Cuebari siɗa dji dromaẽ́a. Ãcõrẽdrʉ dji dromaa. Idjiabʉrʉ néura waribibaria.
8 Ne ubarira, cuebari siɗa Ãcõrẽ quĩrãpita aɓaria. Idjia dadjiza ne biada diaya dadjia o ɓaɗa quĩrãca.
9 Mʉ̃a Apolo ume aɓarica Ãcõrẽ trajura o panʉa. Bãrãra Ãcõrẽ néua.
Maʉ̃ awara bãrãra Ãcõrẽba de quĩrãca o ɓʉa.
10 Mʉ̃ra de obari bia quĩrãca ɓʉa. Ãcõrẽba idji biaɗeba mʉ̃́a diaɗaba de jĩrũda bio eɗu jousia. Dewararãba carawabadaa. Baribʉrʉ dadjiza quĩrãcuita ɓaida ɓʉa sãwã idji trajura o ɓʉda.
11 De jĩrũra eɗu jouɗa bẽrã ni aɓaʉba dewara de jĩrũda poya ɓʉɗaẽ́a. Jesucritoda dji de jĩrũa.
12 Maʉ̃ne ʉ̃cʉrʉba Ãcõrẽ beɗeara ariɗe jaradiabadaa de bia o panʉ quĩrãca. Ãdjia o panʉra oro, parata, mõgara bia queɗea ãrĩca quĩrãca ɓaya. Baribʉrʉ ʉ̃cʉrʉba Ãcõrẽ beɗeara ariɗe jaradiaɗacaa de biẽ́ o panʉ quĩrãca. Ãdjia o panʉra bacuru, quedua, chaba oɗa de quĩrãca ɓaya.
13 Critoba cawa oi ewariɗe dadjiza oɗara tʉbʉ uruaba acʉ zaya droai cawaya. Maʉ̃ba ebuɗa cawabiya dadjia oɗara sãwã ɓasida.
14 Dadjia oɗaba maʉ̃ tʉbʉ uruada droasira Critoba dji o ɓaɗaa ne biada diaya.
15 Baribʉrʉ dadjia oɗara bá wãsira dji o ɓaɗaba ni cãrẽ bia siɗa edaẽ́a. Idjira ẽdrʉimĩna de babʉrʉɗe ẽdrʉbʉrʉ quĩrãca ẽdrʉya.
16 ¿Adua panʉca Ãcõrẽ Jaurera bãrã soɗe ɓʉda? ¿Adua panʉca bãrãra Ãcõrẽ deda?
17 Bariduaba Ãcõrẽ dera ãrĩbʉrʉ, maʉ̃gʉ ẽberãra Ãcõrẽba bio cawa oya idji dera aɓabe idji itea ɓʉ bẽrã. Idji dera bãrãa.
18 Ara bãdjiduɓa cũrũgarãnadua. Naʉ̃ ẽjũãnebema necawaada wãrãda ɓʉa. Aɓaʉba maʉ̃ quĩrãca ne cawa ɓʉda crĩcha ɓʉbʉrʉ, waa mãwã crĩchaiẽ́ ɓʉa. Ãtebʉrʉ wãrã necawaara eroɓai carea naʉ̃ ẽjũãnebemarã quĩrãpita ne adua ɓʉ quĩrãca ɓaida ɓʉa.
19 Naʉ̃ ẽjũãnebema necawaara Ãcõrẽmaarã siriẽ́ ɓʉa. Ãcõrẽ Beɗeaɗe nãwã ɓʉ́ ɓʉa: “Ãcõrẽba naʉ̃ ẽjũãne ne cawa ɓeara ara ãdji necawaaɗeba cawabibaria ne cawa panʉẽ́da.”*
20 Idjaɓa nãwã ɓʉ́ ɓʉa: “Ãcõrẽba cawa ɓʉa naʉ̃ ẽjũãne ne cawa ɓea crĩchara siriẽ́ ɓʉda.”*
21 Maʉ̃ carea crĩcharãnadua aɓaʉ ẽberã ẽpẽ panʉneba dewararã cãyãbara biara ɓeada. Ãcõrẽneba bãrãba ne jũmada eropanʉa bia ɓeaɗi carea.
22 Bãrãba mʉ̃da, Apoloda, Pedro siɗa eropanʉa. Jũma naʉ̃ ẽjũãne ɓʉ siɗa eropanʉa. Ara nawenabema, nubema siɗa eropanʉa. Dadjirãra zocai pananibʉrʉ wa beuɗibʉrʉ Ãcõrẽneba ne jũmada eropanania bia ɓeaɗi carea.
23 Jũma bãrãra Critoɗerãa. Idjaɓa Critora Ãcõrẽnea.
