1 Corinto 4:1-21
4 Bãrãba crĩchaɗida panʉa daira Crito nezocarãda. Ãcõrẽba daira ɓʉsia idjiɗebema cawabiẽ́ ɓaɗada ebuɗa jaradiaɗamãrẽã.
2 Wãrãda nezocaba idji boroba obi ɓʉra jũma jipa o ɓaida ɓʉa dji boroba bia unumãrẽã.
3 Maʉ̃ bẽrã bãrãba wa baridua ẽberãba mʉ̃nebema biẽ́ jarabʉdaɗe mãcua crĩchacaa. Idjaɓa ara mʉ̃djiduɓa jaraẽ́a mʉ̃a o ɓʉra sãwã ɓʉda.
4 Mʉ̃a ni maãrĩ biɗa ãĩ oẽ́ ɓʉda cawa ɓʉmĩna maʉ̃ba jaraẽ́ ɓʉa mʉ̃a jũma jipa osida. Dadjirã Borobʉrʉ cawa jaraya.
5 Maʉ̃ carea idjia cawa oi ewari naẽna dadjia jaraɗiẽ́ panʉa idji traju o ɓʉba jipa o ɓʉda wa jipa oẽ́ ɓʉda. Dadjirã Boro zebʉrʉɗe dadjia soɗe crĩcha ɓaɗada, ne jũma dadji soɗe mẽrã ɓeaɗada ebuɗa cawabiya. Maʉ̃ ewariɗe Ãcõrẽbʉrʉ dadjirãza bia jaraya dadjia bia opeɗaɗa quĩrãca.
6 Djabarã, mʉ̃nebemada Apoloɗebema siɗa ɓʉsia bãrã carebai carea. Daiɗeba cawaɗida panʉa Ãcõrẽ Beɗeaɗe ɓʉ́ ɓʉ auɗu crĩchaɗiẽ́ panʉda.* Mãwãra bãrãba ni aɓaʉda dewara cãyãbara biara ɓʉda crĩchaɗaẽ́a.
7 ¿Caiba bʉra dewara cãyãbara biara ɓʉsi? Ãcõrẽba diaɗa awara ¿bʉa cãrẽda eroɓʉ? Bʉa Ãcõrẽneba ne jũmada edasibʉrʉ, ¿cãrẽ cãrẽã ara bʉduɓa edaɗa quĩrãca beɗea ɓʉ?
8 Ãcõrẽneba eda quĩrĩã pananara bãrãba jũma eropanʉana abadaa. Ãcõrẽba dia ɓʉra aɗuba eropanʉana abadaa. Dai neẽ́ bãduɓa Ãcõrẽ quĩrãpita dji dromarãda panesiɗada crĩcha panʉa. Baribʉrʉ mãwãẽ́a. Bãrãra wãrãda dji dromarãda panenabara bia ɓacasia. Mãwãra dai siɗa bãrã ume ãbaa dji dromarãda panecasiɗaa.
9 Baribʉrʉ mʉ̃a crĩcha ɓʉa dairã dji Jesucritoba diabueɗarãda Ãcõrẽba jũmarã cãyãbara eɗaara ɓʉsida. Dairãra dji cawa obariba jũmarã quĩrãpita beaɗe edebʉrʉ quĩrãca panʉa. Ẽberãrãba, bajãnebema nezocarãba, jũmarãba acʉ duanʉa beuɗi cawaya.
10 Ẽberãrãmaarã daira Crito carea ne adua ɓeaa idjaɓa ʉɓʉaẽ́ ɓeaa. Baribʉrʉ bãrãra Crito ume panʉ bẽrã dji ne cawaara ɓeaɗa abadaa idjaɓa dji ʉɓʉa ɓeaɗa abadaa. Ẽberãrãba bãrãnebemada bia beɗea panʉa, baribʉrʉ daira igara panʉa.
11 Waɗi ara naʉ̃ ewariɗe daiba jarrabada droa panʉa, opichiada droa panʉa, idjaɓa soresorea queɗeadrʉ jʉ̃ni carea eropanʉa. Dai de arada neẽ́ panʉa idjaɓa ẽberãrãba daira biẽ́ obadaa.
12 Daira ʉ̃nãũnaẽ́ traja panʉa ne eropanani carea. Ẽberãrãba daia biẽ́ beɗeabʉdaɗe daiba ãdjía bia beɗeabadaa. Dai biẽ́ obʉdaɗe droabadaa.
13 Sewaɗeba dai biẽ́ jarabʉdaɗe beɗea biaɗeba panubadaa. Waɗi ara naʉ̃ ewariɗe ẽberãrãba daira ne ɓatabueɗa quĩrãca unubadaa, ne mititia quĩrãca unubadaa.
14 Mʉ̃a maʉ̃gʉra ɓʉẽ́ ɓʉa bãrã perabi carea. Ãtebʉrʉ mʉ̃ warrarã quĩrãca bãrãra quĩrĩã ɓʉ bẽrã mãwã ɓʉ́ ɓʉa jipa crĩchabi carea.
15 Bãrãba Critoɗebema jaradiabadarãda zocãrã eropanʉbara waɗi zezada aɓa eropanacasiɗaa.* Mʉ̃neba bãrãba beɗea bia Jesucritoɗebema ĩjãpeɗaɗa bẽrã idjiɗeba mʉ̃ra bãrã zezaa.
16 Maʉ̃ carea mʉ̃a bãrãa beɗea djuburiaya mʉ̃ nĩbabari quĩrãca nĩbaɗamãrẽã.
17 Maʉ̃ bẽrã Timoteoda bãrãmaa diabuebʉrʉa. Idjira dadjirã Boro ume jipa nĩbabaria. Dadjirã Boroɗeba mʉ̃ warraca ɓʉa. Mʉ̃a idjira bio quĩrĩã ɓʉa. Idjia bãrãa quĩrãnebabiya mʉ̃ra Jesucrito ume sãwã jipa nĩda. Mʉ̃a mãwã nĩbaira Jesucrito ẽberãrã ɓeaza jaradia ɓʉa.
18 Ʉ̃cʉrʉ bãrãnebemada dji dromarã quĩrãca nĩnaa, crĩcha panʉ bẽrã mʉ̃ra bãrãmaa wãẽ́da.
19 Baribʉrʉ dadjirã Boroba quĩrĩãibʉrʉ, mʉ̃ra bãrãmaa isabe wãya. Maʉ̃ne dji dromaana abadaba jara panʉ awa ũrĩne wãẽ́a, ãtebʉrʉ acʉɗe wãya ãdjia wãrãda Ãcõrẽ ʉɓʉada eropanʉ cawaya.
20 Ãcõrẽba pe eroɓʉɗebemarãba ara jãwã idjiɗebemada beɗeaɗacaa, ãtebʉrʉ idji ʉɓʉaɗeba jipa obadaa.
21 Maʉ̃da ¿bãrãba sãwã quĩrĩã panʉ? ¿Quĩrĩã panʉca mʉ̃a quẽãne wãida wa quĩrĩãneba, ibiaɗeba wãida?*
