1 Corinto 5:1-12
5 Ẽberãrãba jara panʉa bãrã tãẽna aɓaʉda daunemaya ɓʉda. Jara panʉa maʉ̃ba dji papacauda eroɓʉda. Wãrãda Jesucrito ĩjãẽ́ ɓea biɗa maʉ̃ cadjiruara oɗacaa.
2 Mãwãmĩna bãrãba waɗibiɗa jara panʉa dewararã cãyãbara biara ɓeada. Baribʉrʉ ¿maʉ̃ cadjirua carea bio sopua ɓeaɗida panʉẽ́ca? ¿Maʉ̃ cadjirua o ɓʉra bãrã umebemada ãyã ɓʉɗida panasiɗaẽ́ca?
3 Mʉ̃ra bãrã ume ɓʉẽ́mĩna crĩchaɗeba bãrã ume ãbaa ɓʉa. Maʉ̃ carea bãrã ume ɓʉ quĩrãca maʉ̃ cadjirua o ɓʉ ẽberãra dadjirã Boro Jesu trʉ̃neba cawa osia.
4 Bãrã ãbaa dji jʉrebʉdaɗe mʉ̃ra crĩchaɗeba bãrã ume ɓaya. Idjaɓa dadjirã Boro Jesuba ʉɓʉada bãrãa diaya maʉ̃ ẽberãra jipa cawa oɗamãrẽã.
5 Idjira ãyã ɓʉɗida panʉa diauruba bia mĩgabimãrẽã. Mãwãra naʉ̃ djaraba cadjirua o quĩrĩã ɓʉda igaraya. Idjaɓa Ãcõrẽba cawa oi ewariɗe idjira ẽdrʉ edaya.
6 Ara bãdjida dewararã cãyãbara biara ɓeaɗa abadaa. Baribʉrʉ mãwã jaraira biẽ́ ɓʉa. ¿Bãrãba adua panʉca harina ẽsãbibari maãrĩ ɓʉba harinara jũma ẽsãbibarida? Ara maʉ̃ quĩrãca cadjirua maãrĩ ɓʉba jũmarãda ãrĩbaria.
7 Maʉ̃ bẽrã harina ẽsãbibari drõã ãyã ɓatabuebʉda quĩrãca maʉ̃ cadjirua o ɓʉra bãrã tãẽnabemada ãyã ɓʉɗadua.* Mãwã bãrãra cadjirua neẽ́ ɓeaɗia harina djiwiɗi bʉratʉɗa ẽsãbari neẽ́ ɓʉ quĩrãca. Bãrãra maʉ̃ quĩrãca ɓeaa, Critora dadjirã cadjirua carea beuɗa bẽrã. Idjira dadjirã ẽdrʉ edai carea beapeɗaɗa oveja basía.*
8 Dadjirãba cadjiruaɗebema ẽdrʉpeɗaɗara quĩrãnebabada bẽrã crĩcha biaɗeba, wãrãneba nĩbaɗida panʉa.* Mãwã nĩbaira paʉ̃ ẽsãbari neẽ́ ɓʉ quĩrãca ɓʉa. Djãrã quĩrãma ɓʉɗeba idjaɓa biẽ́ o ɓʉɗeba waa nĩbaɗiẽ́ panʉa. Mãwã nĩbaira harina ẽsãbibari drõã quĩrãca ɓʉa.
9 Naẽna mʉ̃a cartaɗe ɓʉsia bãrãra dji auɗua ɓea ume ãbaa ɓeaɗiẽ́ panʉda.
10 Baribʉrʉ maʉ̃ba jaraẽ́ ɓʉa naʉ̃ ẽjũãnebema auɗua ɓea ume, parata awua ɓea ume, ne drʉabada ume, idjaɓa jʉwaba oɗa ãcõrẽ ẽpẽbada ume ɓeaɗiẽ́ panʉda. Ãdjirã ume pana quĩrĩãnaẽ́bʉrʉ, naʉ̃ ẽjũãnebemada ẽdrʉɗida panʉa.
11 Ãtebʉrʉ mʉ̃a bãrã itea ɓʉsia bariduaba ara idjida djabaaɗa aibʉrʉ, baribʉrʉ auɗuada o nĩbaibʉrʉ, parata awua ɓaibʉrʉ, jʉwaba oɗa ãcõrẽ ẽpẽ ɓaibʉrʉ, sewaɗeba djãrãda biẽ́ jara ɓaibʉrʉ, beu nĩbaibʉrʉ, wa ne drʉa ɓaibʉrʉ, maʉ̃gʉ ẽberã ume ãbaa ɓeaɗiẽ́ panʉda idjaɓa ãbaa ne coɗiẽ́ panʉda.
12 5:12-13 Ãcõrẽ ĩjãẽ́ ɓeara cawa oi carea mʉ̃ra ɓʉẽ́a. Ãcõrẽbʉrʉ idji ĩjãẽ́ ɓeara cawa oya. Baribʉrʉ bãrã tãẽna ɓeara bãrãba cawa oɗida panʉa. Ãcõrẽ Beɗeaɗe ɓʉ́ ɓʉa: “Cadjirua o ɓʉra bãrã tãẽnabemada ãyã ɓʉɗadua.”*
