1 Corinto 6:1-20
6 Bãrã ijarabʉdaɗe ¿cãrẽ cãrẽã Ãcõrẽ adua ɓea cawa obadamaa jaraɗe wãbada? ¿Biara ɓʉẽ́ca Ãcõrẽ ẽberãrãba cawa oɗida?
2 ¿Bãrãba adua panʉca Jesu zebʉrʉɗe Ãcõrẽ ẽberãrãba naʉ̃ ẽjũãne ɓeara cawa oɗida? Bãrãba naʉ̃ ẽjũãne ɓeara cawa oɗi bẽrã ¿sãwãẽrã nẽbʉra maãrĩ queɗeada poya cawa oɗaẽ́?
3 ¿Adua panʉca dadjirãba bajãnebema nezocarã siɗa cawa oɗida? Mãwã ɓʉ bẽrã ¿naʉ̃ ewariɗe nẽbʉra bãrã tãẽna ɓeara poya cawa oɗaẽ́ca?
4 Bãrãda ijaraɗibʉrʉ, ¿cãrẽ cãrẽã Ãcõrẽ adua ɓeamaa wãbadaa cawa oɗamãrẽã?*
5 Mʉ̃a maʉ̃gʉra jara ɓʉa bãrã peraɗamãrẽã. ¿Bãrã tãẽna crĩcha cawa ɓʉra ni aɓa biɗa neẽ́ca djabarã ijara panʉra ibiabi carea?
6 Baribʉrʉ djabada djaba ume ijaraɗapeɗa naʉ̃ ẽjũãnebema cawa obadarãmaa wãbadaa. Mãwã oɗira wãrãda bio biẽ́ ɓʉa Ãcõrẽ ĩjãẽ́ ɓea quĩrãpita ijarabada bẽrã.
7 Wãrãda ʉ̃cʉrʉ bãrãnebemada ijarabada bẽrã unubi panʉa jipa nĩbaɗacada. ¿Biara ɓʉẽ́ca bʉ biẽ́ oɗara droaida cawa obadamaa edei cãyãbara? ¿Biara ɓʉẽ́ca bʉa eroɓʉra bʉ djabaa idu drʉabida cawa obadamaa edei cãyãbara?
8 Baribʉrʉ bãrãba ẽberãrãra biẽ́ obadaa idjaɓa ne drʉabadaa. Wãrãda bio biẽ́ o panʉa ara bãrã djabarãda mãwã obada bẽrã.
9 6:9-10 ¿Bãrãba adua panʉca cadjirua obadara Ãcõrẽ puruɗe ɓeaɗaẽ́da? Ara bãdjiduɓa cũrũgarãnadua. Auɗua nĩbabadara, jʉwaba oɗa ãcõrẽ ẽpẽ ɓeara, daunemabadara, umaquĩrã wẽrã quĩrãca ɓeabadara, umaquĩrãda aɓari umaquĩrã ume ɓeabadara, ne drʉabadara, parata awua ɓeara, beu nĩbabadara, sewaɗeba djãrã biẽ́ jarabadara, djãrã cũrũgabada siɗa Ãcõrẽ puruɗe ɓeaɗaẽ́a.
11 Ʉ̃cʉrʉ bãrãra naẽna mãwã ɓeasia. Baribʉrʉ bãrãba cadjirua opeɗaɗara Ãcõrẽba sʉgʉsia, idji itea bia ɓʉsia, idjaɓa jipa unusia dadjirã Boro Jesucritoɗeba idjaɓa idji Jaureɗeba.
Djabarãba auɗuada oɗiẽ́ panʉa
12 Ʉ̃cʉrʉba jarabadaa: “Crito ĩjã ɓʉ bẽrã mʉ̃a quĩrĩã ɓʉ quĩrãca jũma oida ɓʉa.” Baribʉrʉ mʉ̃a jaraya mʉ̃a quĩrĩã ɓʉda jũma oida ɓʉmĩna, jũma mʉ̃a o quĩrĩã ɓʉba mʉ̃ra carebacaa. Maʉ̃ bẽrã jũma mʉ̃a o quĩrĩã ɓʉ́a iduaribiẽ́a.
13 Idjaɓa ʉ̃cʉrʉba jarabadaa: “Djicora dadji ɓi itea ɓʉa, idjaɓa dadji ɓira djico itea ɓʉa.” Baribʉrʉ mʉ̃a jaraya mãwã ɓʉmĩna Ãcõrẽba umena jõbiya. Dadji cacuara ɓʉẽ́a auɗua o ɓamãrẽã, ãtebʉrʉ dadjirã Boro Ãcõrẽ itea ɓʉa. Idjaɓa dadjirã Boro Ãcõrẽra dadji cacua wagai carea ɓʉa.
14 Ãcõrẽba idji ʉɓʉaɗeba dadjirã Boro Jesura beu ɓaɗada ʉ̃rẽbabisia. Ara maʉ̃ quĩrãca idji ʉɓʉaɗeba dadjirã siɗa ʉ̃rẽbabiya.
15 ¿Bãrãba adua panʉca bãrã cacuara Critoɗeda? Mãwãra ¿mʉ̃a Critoɗeda wẽrã auɗua ume ɓʉica? Wãrãda mãwã oira biẽ́ ɓʉa.
16 ¿Bãrãba adua panʉca wẽrã auɗua ume ɓʉra maʉ̃ wẽrã ume cacua aɓa ɓʉ quĩrãca ɓʉda? Ãcõrẽ Beɗeaɗe nãwã jara ɓʉa: “Ãdjira cacua aɓa ɓʉ quĩrãca panania.”*
17 Baribʉrʉ dadjirã Boro Crito ume ãbaa ɓʉra idji ume jaure aɓa ɓʉ quĩrãca panʉa.
18 Ni maãrĩ biɗa auɗua nĩbarãnadua. Dewara cadjiruada oibʉrʉ, maʉ̃gʉba dadji cacuara ãrĩẽ́a. Baribʉrʉ auɗuada oibʉrʉ, dadji cacuada biẽ́ ɓeya.
19 ¿Bãrãba adua panʉca bãrã cacuara Ãcõrẽ Jaure deda? Ãcõrẽba idji Jaurera bãrãa diasia. Idjira bãrã soɗe ɓʉa. Bãrãra ara bãrãneẽ́a ãtebʉrʉ Ãcõrẽnea.
20 Ãcõrẽba bãrãra nẽbʉa nẽdosia. Ãcõrẽne bẽrã bãrã cacuaɗe, jaureɗe biɗa quĩrãipa ɓeaɗadua.*
